( God Longs for us to know His Voice )
Karai Kasang a nsen hpe madat ai gaw yak hkak ai lam rai chye nga ai. Masha law law a matu gaw Karai Kasang a nsen hpe madat ai, na lu ai ngu yang, n ging dan dum ai.
Daini, anhte tinang a kanu kawa ni, tinang a ning-rum ning-tau, shing n rai, manang ni a nsen hpe na lu ai zawn, Karai Kasang Shi a nsen hpe anhte na chye na matu sharawng nga ai lam hpe sharin la lu na ga ai. Karai Kasang a nsen hpe chye madat ai gaw, Shi hte hkrum katut lu na matu ahkyak nga ai. Ndai Mungga hpe sharin la ai hpang, anhte tinang hkum hpe grau kam wa nna, Yesu hte grau htep lahti kanawn mazum chye hkra hkyen da lu na ra ai.
Yeremia 33:3 hta, ” Ngai hpe shaga e, ngai nang hpe htan na de ai; nang n chye na ai, galu kaba ai hte yak la ai amu, ngai nang hpe madun na de ai.” nga nna Karai Kasang tsun nga ai.
Raitim, anhte a sak hkrung ten malawng hta, Karai Kasang gaw, n shaga ai, atsin sha nga ai; Shing n rai, Chyum Laika hku kaga masha ni hku, mabyin masa ni hku sha, anhte hpe matut mahkai shaga ai ngu nna kam chye ga ai. Karai Kasang gaw dai lam ni hku nna shaga ai zawn Shi a Kasha ni hpe dan tawk mung shaga mayu nga ai.
Chyum mungga ni hta, Karai a Amyu sha ni gaw Karai Kasang shaga ai nsen hpe na la nna madat mara hkan sa ma ai hpe law law mu lu ga ai. Ga shaka Dingsa kaw nna, Ga shaka Ningnan du hkra, Karai Kasang gaw, Shi a Amyu sha ni Kashu Kasha ni hpe asan sha shaga nga ai. Anhte mahtang Shi Kawa a nsen hpe madat, na la na matu aten ahkying shara jaw lu na kun?
San Yawhan 8: 47 hta Madu Yesu tsun ai, “Karai Kasang hte seng ai wa gaw Karai Kasang a ga madat nga ai. Nanhte gaw Karai Kasang hte n seng ai majaw, n madat myit dai“.
Daw kaba 10: 27 hta mung, “Nye a sagu ni gaw, Nye a nsen madat ma ai rai nna, ngai shanhte hpe chye nngai, shanhte mung nye a hpang hkan nang ma ai” ngu nna tsun da nga ai.
Anhte gaw Shi a nsen hpe na shangun mayu ai Karai Kasang lu ga ai; Shi gaw atsin sha nga nga ai n rai, a zim sha n nga ai. Shi anhte hpe lam madun ya mayu ai, shi a kraw hta rawng ai lam ni hpe tsun dan mayu ai, anhte hte rau sak hkrung hkawm sa mayu nga ai. Anhte hte matut manoi matut mahkai jahta shaga mayu nga ai.
Karai Kasang a nsen hpe na lu ai ngu ai gaw, lata san da hkrum ai masha loi mi a matu sha n rai nga ai. Laksan Hkristan ni, Shing n rai, shani tup, shani shagu, akyu hpyi myit sumru taw ai ni a matu sha mung n rai nga ai. Anhte kam sham ai hpung masha ni, Karai a nsen hpe na lu ai ngu ai gaw, shawng ningnan, Shi Kawa anhte hpe shaga mayu ai majaw rai nga ai. Raitim, Shi a nsen hpe chye madat na matu Shi a chyeju hte sha mai nga ai.
Dai rai yang, Karai Kasang a nsen hpe madat ai ngu ai gaw, kaning re ai hpe ngu ai kun? Kaning san ai kun? Karai Kasng gaw, Chyoi Pra ai Wenyi hku nna, nang hte ngai shaga chyai ai hta grau san ai hku, grau lachyum sung ai hku chye madat na la lu ga ai.
1Korinhtu 3:16 hta, Kasa Pawlu tsun ai, “Nanhte gaw Karai Kasang a nawku htingnu rai nga nna, Karai Kasang a Wenyi gaw nanhte hta rawng nga malit dai hpe nanhte n chye nga mit ni?“
Chyoi Pra ai Wenyi gaw, nang hte rau shanu nga ai. Dai majaw, Shi anhte a myit masin salum hta shaga lu ai lam lama ma hte seng ai lam hpe “ga si” hte, Shing nrai, machye machyang, shing n rai, kraw dung sindai kaw nna shi hkrai shi chye madat ai lam ni hku nna shaga nga ai.
Anhte lama ma hpe dawdan nna galaw sa wa ai shaloi, myit ngwi simsa ai hpe jaw ya ai zawn, Shi madu myit ra ai hte n htan shai ai hku galaw hkrup jang, anhte a myit hta n zim, kadau gadap nga shangun ai.
Karai Kasang anhte hte ga shaga ai shaloi, kaga masha ni hte jahta shaga chyai ai hta grau hku hkau, ni htep nna, asan sha shaga ai. Hpa majaw nga yang, Shi hte anhte a lapran hta dut dang ai lam hpa n nga lu ai. Raitim, Karai Kasang gaw Shi a nsen hpe adip arip rai nna gaw n shaga ai. Shi gaw, kaming kamawng rai nga ai lapran de jahtau marawn ai n rai, kaga nsen ni hpe dip shingdang kau mayu ai Karai Kasang n rai nga ai. Shi gaw Simsa ai hte myit galu kaba hkam sharang ai lam a Karai Kasang rai nga ai. Anhte, tinang a myit masin salum ni hpe hpaw nna madat ya ai ten du hkra ala nga ai.
Dai majaw, aten ahkying la nna anhte a Kawa shaga ai nsen hpe hkap la madat ya na matu hkyen u. Bungli ni grai kyin nga ai lapran hta Shi tsun mayu ai lam ni hpe madat ya na matu shara, aten jaw u. Nang shi hpe san mayu ai lam ni nga yang mung san u; hpa mi raitim, hkum tsup; htap htuk dik ai hku shi nang hpe htai ya na ra ai hpe mung kam u.
Akyu hpyi sumru ga;
- Karai Kasang shaga ai nsen hpe madat la na matu lu jaw ai aten hpe myit yu ga.
Karai Kasang nang hpe shaga ai mahkrum lam amyu myu hpe sumru yu u. Bai, Na Kawa Karai hte ga shaga lu na matu, chyum mungga hti nna na a makam masham hpe shangang shakang u.
Yawhan 16: 13 hta Madu Yesu tsun ai, “Dai teng man ai Wenyi du sa jang, Shi gaw teng man ai lam yawng mayawng, nanhte hpe madun na ra ai. Dai wa gaw, shi a myit hte tsun na ra ai n rai; na la lu ai hte made tsun dan na ra ai. Htawm hpang de byin na ra ai lam mung shi nanhte hpe tsun dan na ra ai.”
- Na a myit, masin, wenyi hpe asim sha da nna Karai Kasang shanu nga ai hpe hkam la u.
Shi nang hte ni htep, shanu nga ai hpe madun dan rit ngu nna hpyi u.
Chyoi Pra ai Wenyi gaw, ya ya nan, nang hte rau rai nga ai hpe kam u.
1Korinhtu 3:16 hta Kasa Pawlu shadum ya ai. “Nanhte gaw Karai Kasang a nawku htingnu rai nga nna, Karai Kasang a Wenyi gaw nanhte hta rawng nga malit dai hpe nanhte n chye nga mit ni? “
- Karai Kasang hpe Shi nang hte seng nna gara hku hkam sha ai ngu ai hpe san yu u. Shi nang hpe chye shangun mayu ai lam ni hpe tsun rit ngu nna hpyi u.
Na a kraw, myit hta hkam sha ai lam lai shai wa ai hpe dinglik yu u; na a wenyi myit masin kraw lawang hta na ai lam ni hpe matsing u. Myit galu ai hte sadi maja madat u.
Yeremia 33:3 hta, Karai Kasang tsun ai: “Ngai hpe shaga e, ngai nang hpe htan na de ai; nang n chye na ai, galu kaba ai hte yak la ai amu, ngai nang hpe madun na de ai.”
