Daini na Ja Chyum Mungga hpe hti sum ru yu ai shaloi e, Yesu gaw mungkan ga a ninghtoi rai nga ai lam hpe na hti lu na ga ai. Dai ni na kabu gara shiga hta, Madu Yesu gaw, n tara ai amu bungli ni hpe n’gun n jaw nga ai. Madu Yesu shi hkaum nan mung n tara ai hku galoi e mung n daw dan ai. Shi gaw teng man ai lam hpe chyu sha sakse hkam ai wa nan re. Shingrai Madu Yesu gaw shi hkum nan mungkan ga a ninghtoi re ngu tsun ai. Anhte ni mung ndai mungkan ga hpe anhte a matu ninghtoi langai mi re ngu mu mada chye ga ai. Karai Kasang jaw ai ninghtoi hpe n hkap la ai sha, mungkan a ninghtoi hpe chyu sha hkap la chye nga ga ai.
Dai gaw hpa hte bung nga ga ta nga yang e, mungkan a ninghtoi gaw wan shadaw zawn sha hkat htum mat wa chye ai baw rung rai re. Karai Kasang a ninghtoi gaw, galoi e mung htum mat ngu ai n nga ai, yawm mat n chye ai, Jan a htoi shing kang hte bung nga ai. Dai majaw shiga madat nga ai nu wa hpu nau ni, mungkan a arung arai ni hta, Karai Kasang hpe chyu sha, anhte a ninghtoi re ngu hkap la let, dai tinang a n`htoi hpe kaga masha wa a prat hta e mung garan gachyang ya let, n`htoi hta sak hkrung nga pra sa ga ngu n`gun jaw dat ga ai.
