Daini na Ja Chyum Mungga hpe hti sumru yu ai shaloi e, Sape majing tai na lam na chye lu ga ai. Ndai kabu gara shiga hta e Yuda masha ni shanhte gaw Abraham a amyu masha ni re majaw, wanglu wang lang awngdawm ahkaw ahkang lu ai ni re ngu hkap la nga ma ai. Raitim Madu Yesu bai tsun ai gaw, mara galaw ai ni gaw mara a mayam ni rai nga ai ngu tsun da nga ai. Mara galaw shagu mara kaw gyit hkang da hkrum nga ai ni re. Dai gyit hkang da ai mara kaw na lawt lu na matu gaw, madu a hkum hpe dingman ai hku nga sa ra ai. Karai Kasang a tara lam ni hpe hkan sa shatup ra ga ai.
Karai Kasang a tara lam ni hpe hkan sa let, shi Madu a tengman ai tara hte maren nga sa ai ni gaw, tut nawng e wanglu wanglang nga sa lu ai. Dai majaw Karai a tara lam ni gaw wanglu wanglang byin shangun ai ngu ai gaw, Madu Yesu shi tsun da ai gaman li la n rai nga ai. Shingrai wanglu wanglang re ai ngu ai gaw, anhte hkan sa na tara lam ni hpe tengman jaw kaja ai hku hkan sa galaw shakut ai rai yang e, wanglu wanglang awng dawm ahkaw ahkang lu la na teng sha re. Dai majaw madu a myit kraw kata kaw nna, a san sha sumru dinglik yu let, jaw kaja ai hku hkan sa shakut nga ga law.
