Daini na Ja Chyum Mungga hpe hti sum ru yu ai shaloi e, Nye a mungga madat ai wa htani htana asak lu na lam hpe na lu ga ai. Daini na Madu a kabu gara shiga hta e, Abraham gaw madu Karai Kasang hpe mu mada nna, kabu gara rai nga nngai ngu tsun dat ai shaloi, yuda masha ni nachying wa mau mahka mat ma ai. Grau nna n chye madat mat ma ai. Dai mabyin ni gaw gara hku mai byin na law nga tsun nga ma ai. Ya pi madu a asak gaw (50) pi n du shi ai Abraham hpe mu ga sai ngu tsun ai gaw, gara hku mai byin na i? nga mau mahka nga ma ai. Ndai mabyin gaw Madu Yesu shi a arawng sadang mabyin hpe hpaw tsun dan ai lam nan rai nga ai.
Chyum laika ga shaga dingsa hta e, Karai Kasang gaw kadai wa re ngu ai hpe chye mayu nna san ai shaloi e, Karai Kasang gaw, Ngai gaw Ngai rai nga nngai ngu bai htai dat ya sai. Ngai rai nngai, Ngai nga nngai, ngu ai ga si a lachyum gaw, Madu Yesu mung tsun dat ai lam nan rai nga ai. Abraham n nga shi ai kaw nna pi, Ngai nga taw sai. Ngai byin taw sai ngu tsun dat ai. Madu Yesu gaw kawa Karai Kasang kaw na yu hkrat wa ai. Kawa Karai Kasang shangun dat ai kasha Karai Kasang nan re ngu ai lachyum hpe, asan sha hpaw tsun dan sai rai nga ai. Dai majaw anhte mung tinang a makam masham hpe asan sha chye na lu hkra tut nawng hkaja shakut sa ga law.
