KUNGLA SHAMAN POI, C SHANING
(Palm Sunday)
Hkristu hta tsawra hkungga ai nu wa hpunau ni ndai laban gaw Shaning C a Kungla Shaman Poi Laban rai nga ai hte Madu Yesu a nni nkri hkam ai bat magam Laban hta mung du nga sai rai nga ai.
Voltaire gaw tsaban 18 hta Karai Kasang n nga ai ngu tsun lai wa ai French myit sawn hpaji ninghkring langai mi rai nga ai. Shi a prat ting Karai Kasang n nga ai ngu ai hpe tsun shabra nna, hkaw tsun lai wa ai rai nga ai. Shi gaw nawku htung lam hpe grai nden ja ai hte asan sha tsun shaga ai wa rai nga ai. Raitim, si wa maw ai shaloi, shi gaw hkrit gari nna, myit tsang hpang wa ai. Shi hpe yu lajang nga ai tsi sarawun hpe, “Ngai hpe shata kru asak galu hkra naw galaw ya yang, ngai hta nga ai manu dan ai sut gan ni hta na daw mi hpe ngai jaw na,” ngu nna tsun lai wa ai. Shi a tsi sarawun gaw, “Sara e, nang gaw bat Kru daram pyi hkrung na n mai byin sai,” ngu nna tsun lai wa ai. Dai shaloi Voltaire gaw myit daw myit hten mat ai hte “Dai rai yang ngai ngarai mung de sa ai shaloi nang mung ngai hte rau woi mat na” ngu nna tsun lai wa ai. Hpang jahtum myit daw myit hten nna sha si mat ai. Si ai lam byin wa ai gaw shi a kam sham lam ni hte myit simsa lam hpe gayat hkra shangun lai wa ai rai nga ai.
Dai ni anhte gaw Yesu awng padang hte Yerusalem mare de shang wa ai hpe myit dum poi galaw nga ga ai. Shi gaw chyoi pra ai buga de Lawze jawn nna, shang wa ai shaloi, masha ni gaw hpun lakung ni hpe la nna, lam ntsa e nyep da nhtawm – Shi hpe David hkawhkam a kasha Hosanna ngu nna mahkawn hte e shagrau lai wa ai rai nga ai.
Yesu gaw si na matu masat da hkrum lam rai nga ai. Lazaru hpe si ai kaw na sharawt la ngut ai hpang, hkinjawng agyi ni hte Hparishe ni zuphpawng nna, “Anhte hpa galaw ra na kun? Ndai wa gaw lamik kumla law law galaw dan nga ai hte, masha ni shi hpe kam sham nga ma ai. Anhte shi hpe matut nna dat da yang, Roma myu sha ni gaw anhte a shara hte anhte a amyu masha ni hpe jahten kau na mara ai.” Kayahpa, hkinjawng agyi wa tsun ai gaw, “Nanhte n chye na myit dai. Amyu ting hten bya hkrum na hta, marai langai mi si mat na gaw grau mai nga ai (Yhn 11:49-50).”
Yuda masha ni gaw, masha ni hpe si na matu masat ai lam hpe ra sharawng nga ma ai. Israela mungdan a Hkringmang Daju Ariel Sharon gaw, Hamas – jahkrit shama hpung hpe hpaw ninghtan ai ningbaw hte wenyi lam yan woi awn ai Sheik Ahmed Yassin hte Yasser Arafat yan hpe sat na matu matsun da lai wa ai. bat loi mi na ai hpang, Yassin hpe Israela Hpyen Dap ni sat kau ma ai. Sheik Yassin a lata hta mara n kap ai masha law law si hkrum lai wa ai. Shi gaw mara n kap ai masha law law hpe sat kau ai jahkrit shama hpung Hamas hpe hpaw ninghtan lai wa ai wa mung rai nga ai.
Raitim, Yesu hpe hpa majaw si na masat ma ai kun? Shi gaw kadai hpe mung n sat lai wa ai; Shi gaw, shi a sape ni hpe tinang a hpyen wa hpe pi tsawra nna shi a matu akyu hpyi ya na matu shrin achyin lai wa ai. Madu gaw tsawra myit hpe sharin ya lai wa ai rai tim, Yuda masha ni gaw Shi hpe si na matu masat da lai wa ai.
Yesu gaw shi hpe si na matu masat da hkrum ai hpe chye tim, shi si na hpe n hkrit ai. Shi gaw dai shara de sa wa ai. Shi a prat hta sasana magam langai mi sha nga ai, dai gaw Shi a si hkam ai hku nna mungkan masha hpe hkye la na matu rai nga ai. Mungkan masha yawng gaw asak hkrung na matu shangai wa ai rai tim Yesu gaw si na matu shangai wa ai rai nga ai. Yesu gaw shi a si hkam ai marang e anhte hpe asak jaw ya nga ai. Kalang mi hta shi tsun ai gaw, “Sagu ni a matu nye a asak hpe ngai nawng kau nngai (Yhn 10:15).” Yerusalem mare hta sat kau hkrum na hpe chye da tim, Shi a si hkrung si htan lam de awng padang hte hkawm sa lai wa ai.
Yesu Yerusalem mare de shang wa ai shaloi, masha ni gaw namhtan lakung ni hpe ladawn nna, Shi hpe shakawn shagrau ai mahkawn ni hpe mahkawn hkawn lai wa ai. shakawn mahkawn ni hte mahkawn hkawn nna, Shi du sa wa ai hpe shagrau sha-a na matu ahkang jaw ai. Galoi mung, Shi gaw shawa masha ni a shakawn shagrau ai lam hte masha ni a shakawn shagrau ai lam ni hpe koi gam lai wa ai. Muk hpe shalaw jahtam lai wa ai hpang, shawa masha ni Shi hpe hkawhkam shatai mayu ai, shaloi, Shi gaw shanhte kaw na hprawng mat wa ai. Nat shang ai wa gaw Shi hpe , “Karai Kasang a kasha Yesu e” hkkye la rit ngu nna jahtau dat ai shaloi, shanhte hpe atsin sha nga na matu hkang dat wu ai.
Raitim ya gaw, si na matu masat da hkrum ai ten du wa ai shaloi, Yerusalem mare na shawa man de du shang nna, shawa masha ni hpe Shi hpe shakawn shagrau na ahkang jaw lai wa ai. Anhte a Hkyela Madu gaw, lachyum n nga ai sha galoi mung n galaw yu ai. Awng padang hte Yerusalem de shang wa ai hpe n dai lam manga hte bai yu yu ga..
1) Shi a aten gaw hpang jahtum e du wa sai. Masha Kasha a hpung shingkang dan hkung wa na aten du wa sai. Shi a magam bungli galaw ai aten hta, anhte a Hkyela Madu gaw, Shi a aten n du shi ai majaw, masha wunawng wuwa hpe Meshia ngu nna shi hpe ndau shabra na matu pat hkum da lai wa ai. Raitimung ya gaw Shi a aten hpang jahtum du wa sai majaw, Shi hpe Meshia ngu nna hkaw tsun na ahkang jaw lai wa ai..
2) Shi gaw Meshia re ai lam ndau shabra mayu lai wa ai. Shi gaw shanhte myit mada da nga ai Meshia re ngu nna Yuda masha ni hpe lang hte lang tsun lai wa sai raitim, shanhte gaw dai hpe n chye na ai zawn galaw lai wa ma ai. Shanhte gaw, Nang gaw Meshia rai nga ndai kun, anhte hpe asan sha tsun dan mi? Ya, Meshia ngu ai sagu hkungga gaw lawze ntsa e jawn nna, Shi gaw shanhte a Meshia re ai hpe asan sha tsun ndau dan lai wa ai.
3) Shi gaw shanhte a Hkawhkam re ai lam ndau shabra mayu lai wa ai. Shi gaw Dawi a Kasha rai nna, shanhte a Meshia re majaw, shangai wa ai kaw nna shanhte a Hkawhkam tai na ahkaw ahkang lu lai wa ai. Shi gaw myihtoi Zehkaria a myihtoi ga hpe gaja wa shadik shatup ya ai, “Ziun shayi sha e, grai kabu gara nga u! Yerusalem shayi sha e, nsen kaba hte jahtau nga u! Yu u, na a hkawhkam wa nang hpang de du ra ai; shi gaw awng dang ai hte awng padang lu ai wa rai nga ai, shi gaw shagrit shanem nna, lawze kasha ntsa e jawn nga ai (9:9).
4) Shi gaw shi a hpyen ni hpe masha law law a lapran e Shi a mying gumhkawng ai lam hte teng man ai n-gun atsam hpe madun dan mayu lai wa ai. Ndai zawn re ai law la ai hte myit rawt ai masha wunawng wuwa hpe shinggyin la lu ai rai yang, Shi tau hkrau hkyen lajang da ai rai yang, Shi a grup yin hta kade daram she masha law hkra shinggyin la lu na kun? Shi ra sharawng ai she rai yang, Shi hpe ninghkap nga ai Laika ka ai sara ni hte Hparishe ni hpe gasat na matu, shawa masha ni hpe shinggyin la lu na rai nga ai. Raitim anhte a Hkyela Madu gaw nawku htung hte mung masa hpe kayau kaya galaw na matu dai zawn re ai npawt nhpang yaw shada lam ni shi hta n nga lai wa ai. Shi a myit masin hta majan gasat na myit n nga ai. Shi gaw simsa lam sasana hte du sa wa ai wa rai nga ai. Shi gaw ja janmau hpe n myit mada ai sha, ju janmau hpe myit mada ra sharawng lai wa ai. Raitim daini e Shi gaw shi a hpyen ni hpe, n-gun kya ai majaw n re ai sha, shagrit shanem ai hte sumnung shingdi ai lam hpe madun dan lai wa ai. Shagrit shanem ai hte sumnung shingdi ai hku nna anhte a Madu gaw Shi a hpyen ni hpe Shi hkum shi nyet kau ai lam a sung htum ai lam hpe madun dan sai rai nga ai.
5) Shi a galu kaba ai lam shi a Sape ni hpe tau hkrau hkam sha shangun lai wa ai. Shi a sape ni gaw, Yesu hpe Laika ka ai sara ni hte Hparishe ni, jahpoi asawng ai hpe law law lang mu yu lai wa ai. Kalang mi hta, shi gaw shawa wunawng wuwa hpe shanhte a myit rawt ai lam hpe shapraw dan na ahkang jaw ai hku nna, shi a sape ni hpe Shi a galu kaba ai lam hpe sakse hkam shangun lai wa ai. kalang mi bai rai yang, shi sape ni a akyu a matu masha wunawng wuwa hpe Shi hpe shagrau nna, shawa man hta Shi a chyeju hpe shakawn na ahkang jaw lai wa ai.
Tsawra ai hpu nau ni e, nni nkri bat magam de anhte shang wa ai ten, Madu Yesu Yerusalem mare de shang wa ai zawn, nanhte a masin salum hta mung shang wa u ga law. Hosanna mahkawn ni hte Madu hpe hkap tau la na matu tinang hkum hpe hkyen lajang nga ga. Yawng hpe Karai kasang shaman ya u ga
Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw Kungla shaman poi Lanban rai nga ai
Hti Ang Ai Ja Chyum Mungga Ni Gaw –
Chyum Mungga Daw ( I ); Easia laika 50: 4-7
Chyum Mungga Daw ( II ); Phi 2: 6-11
Kabu Gara Shiga ; Lk 22: 14-23:56
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law.
