Daini, anhte akyu hpyi sumru ai hta, “Karai Kasang anhte hpe hpan da ai a yaw shada lam; Shi hpa rai anhte hpe hpan da ai” ngu ai hpe jawm dinglik yu ga.
Hpa majaw nga yang, dai yaw shada ai lam hte maren anhte hkawm sa sak hkrung ga ai rai yang she, htani htana asak hpe nhpaw n-ya hkam la lu na rai nga ai.
Chyum Mungga daw mi hpe shawng madat yu ga, Myihtoi Yeremia 24:7 hta,
“Ngai Karai Kasang rai nga ai hpe, shanhte chye na myit, ngai shanhte hpe jaw na nngai; shanhte gaw, tinang myit masin mahkra hte, ngai hpang de kayin wa ai majaw, shanhte gaw nye a amyu, ngai gaw shanhte a Karai Kasang tai na nngai” nga nna Karai Kasang tsun da ai.
Karai Kasang gaw, anhte shi hpe chye chyang, tsaw ra nna, shi hte rau kanawn mazum hku hkau nga na matu anhte hpe hpan da sai. Dai lam gaw, anhte kadai ni rai ga ai ngu ai hte anhte hkan shadik ra ai lam ni hpe madun ya nga ai.
Dai hta mahta nna she, anhte myit mang, hkam sha, galaw sa wa ra ga ai. Karai Kasang hte hku hkau kanawn mazum ai lam hpe anhte a prat hta hkan tam shakut nga ai lam madung hku nna sak hkrung hkawm sa ga ai rai yang she, shi Kawa anhte a ntsa tawn da ai, agrin nga ai tsaw ra myit hte lanu lahku ai lam hpe shadan dan lu na rai ga ai.
Anhte a sak hkrung lam ka-ang hta – dinghta lam ni hta awng dang ai, kaga masha ni e shakawn shagrau ai, tinang a bungli ni hta ningtawn hkra, hkum tsup hkra ma-ja shakut ai zawn re ai lam ni hpe madung da, ningshawng jaw nna lani mi hpang lani mi hkan shachyut chye ga ai.
Dai lam hta, myit htum myit daw ai, ba galawp si ai, myit da ai de n du ai sha, myit n dik n pyaw ai lam ni hpe sha anhte hkam sha ga ai. Hkristan Hpung ngu ai kata hta pyi dai zawn, dinghta myit jasat hte hkan sa galaw na matu gunglau hkrum ai lam ni naw nga nga ai; myit n dik ai lam ni naw nga chye ai.
Karai Kasang hte rai jang gaw, shai nga ai. Chyeju hte hpring ai Karai Wa a tsaw ra myi hta gaw, ndai lam ni hpe hkan shachyut tam agrawp hkawm ai lam hpe jahkring kau nna, Shi, Hpan Da Madu hte rau, hku hkau hkawm sa ai lam hta myit pyaw sim sa ai hpe lu la ga ai.
Dai majaw, Myithtoi Yeremia Laika 24:7 hta Karai Wa tsun da ai, “Ngai Karai Kasang rai nga ai hpe, shanhte chye na myit, ngai shanhte hpe jaw na nngai; shanhte gaw, tinang myit masin mahkra hte, ngai hpang de kayin wa ai majaw, shanhte gaw nye a amyu, ngai gaw shanhte a Karai Kasang tai na nngai”.
Anhte marai hkum shagu a kraw hta gaw, Karai Kasang a Amyusha ni rai ga ai ngu ai hkam sha, marit ai lam nga nga ai. Anhte a Karai Kasang gaw kaja wa nga nga ai, Shi hpe chye lu ai, anhte hpe mung tutnawng tsaw ra ai, anhte hte ni htep nga ai.
Karai Kasang a tsaw ra ai hpe aten ladaw shagu hta hkam sha lu hkra anhte hpe hpan da sai. Madu gaw mai kaja nga ai ngu ai hpe chyim lu na matu hpan da hkrum saga ai. Shi anhte hte galoi mung rau ginlung kahkin nga na matu, anhte a ten shagu hta shi a shanu nga ai lam hte ka-up kahprwi da ya na matu anhte hpe hpan da sai.
Karai Kasang hta anhte a matu asak nga ai, tsaw ra myit nga ai. Anhte a myit masin salum ma hkra shi hte rau n rai dingsa, shi hkring nga sa nga na n rai; dingyang bungli galaw nga na sha rai nga ai.
Karai Kasang a tsaw ra ai gaw, maga mi hku rai yang grai manawn chye ai zawn, kaga maga mi de rai yang, shi tsaw ra ai ni a matu shi a asak hpe pyi ap kau nga ai.
Dai majaw, anhte a salum kraw lawang hpe shi kaw ap da ga. “Shi Kawa hte rau hku hkau kanawn mazum nga ai” lam hpe anhte a sak hkrung prat a ka-ang shatai ga.
Anhte a hkum hpe, shi a ngang grin ai hte sadi dung kangka ai tsaw ra myit hta ru jung shangun ga.
Nang hpe makam masham jaw ya nna jahkum shatsup ya ai Karai Kasang gaw na a prat hpe tutnawng galai shai ya u ga law (Hebre 12:2).
