Daini na Ja Chyum Mungga hpe hti sum ru yu ai shaloi e, Sumsing lamu na yu wa ai a sak muk a lam hpe na lu ga ai. Yak hkak ai lam ni gaw, anhte a makam masham hpe n lu jahkring kau ya lu ai ngu ai hpe daini na chyum mungga hta e hkaw tsun nga sai. Moi anhte a ji woi ni a prat hta nawku hpung gaw zingri zingrat sat nat hkrum nna, hprawng koi yen mat tim, tinang du ai shara ni hta e, Madu Yesu a lam hpe hkaw tsun sakse hkam lai wa masai. Kade yak hkak jam jau tim shi a lam hpe hkaw tsun na matu myit katu wa ai majaw, gwi gwi n hkrit n tsang ai sha, hkaw tsun sa ai rai nga ai. Dai gaw hpa hpe tsun mayu ga ta nga yang, tsawra ai shi ga madat ni e, anhte Karai Kasang hpe kam sham sai ni yawng gaw, Madu Yesu a Sai hte hkye la hkrum ai ni re ngu ai hpe, tinang hkum nan tsep kawp kam sham hkap la nna, nang gaw gara shara kaw mi du du Madu Yesu a lam hpe sharawng shara hkaw tsun sakse hkam na sha re. Dai hpe e tut e grin nga ai awng dang lam ngu ai rai nga ai. Dai majaw ndai mungkan ntsa na mayak mahkak lam ni gaw anhte a makam masham hte nawku daw jau ai lam hpe n lu manga lu mat sai. Dai prat dingsa grin nga ai awng dang ai wa byin na matu gaw, Ja chyum mungga hti sum ru na, Chyoi pra ai wenyi hpe kam hpa nga na, Sacramentu hpe tsawra nga na ndai lam masum hte sak hkrung nga sa ga law.
