May shata praw 4 ya, Laban shana maga de, Wa Sarabyin Francis a matu, San Peter Nawku Htingnu hta, 9 lang ngu na hte hpang jahtum na Novemdiale Missa hkungga hpe, Cardinal Protodeacon Dominique Mamberti kawn woi awn lai wa ai dai lamang hta Cardinal ni sa du shanglawm ma ai. Bai San Petru a sasana magam bungli gaw, Hkristan wuhpung wuhpawng hte shinggyim masha yawng hpe tsawra myit hte ap nawng daw jau na matu re lam mungga hta tsun let bai myit dum shangun ai.
Wa Sarabyin Francis gaw Karai Kasang Tsawra myit a majaw shi hta nga ai atsam marai mahkra hte rau si ai ten du hkra sadi dung kam sham ai hte ap nawng lai wa ai hpe tsun lai wa ai. Ndai lam gaw Cardinal Mamberti’s kawn Pasaka Laban masum ya shani e hti ang ai yawhan a kabu gara shi ga hte la kap nna Wa Sarabyin a hpang jahtum Novemdiale Missa hkungga na mungga hta Madung da tsun lai wa ai rai nga ai. Chyum mungga hta hkrung rawt sai Madu gaw Tiberias nawng hking gau e Kasa ni hte hkrum shaga ai shaloi Kasa Petru hpe shi madu a Sa sana magam lit hpe ap ya ai hte shi a hpang hkan nang na matu tsun let ahkaw hkang jaw dang tawn da ai lam mu lu ai hpe tsun lai wa ai.
Cardinal Mamberti kawn ndai chyum mungga gaw du na May praw (7) ya shani e galaw sa wa na Petru a shara lahpa galai na Zuphpawng kaba a matu akyu hpyi karum nga ai hte ya ten anhte Nawku hpung ting a matu manu dan nga ai gin lam rai nga ai hpe tsun lai wa ai. daw langai kasa laika hta Petru hte Kasa ni kawn mung tsun da ai nga ai “Masha a ga madat na hta Karai Kasan a ga hpe she madat na” ngu ai hpe anhte ni mu hti lu ai lam tsun lai wa ai. French Cardinal kawn ndai lam hte seng nna Wa Sarabyin Francis mung Mungkan masha yawng a matu kabu gara chyum mungga a lam (joy of Gospel), Matsan dum lama ai Kawa Karai Kasang a lam, Hkye la Madu Yesu a lam hte hpung dagu kaba ai lam ni hpe tsun shadum lai wa ai hpe anthe bai myit dum mai ai lam tsun lai wa ai.
“shi gaw shi a sharin shaga ai lam, hkrun lam hkawm ai lam, shi hkum hkrang shamu shamawt ai hte shi a nga sat nga sa ai lam ni hku nna ndai lam ni hpe galaw lai wa ai. bai nna shi gaw ngai Pasaka laban shaloi The Loggia of the blessing of Basilica ngu ai shara makau e shi a hkam sha ai lam a sak se tai na matu tsap nga ai rai tim ndai lam ni yawng hta na grau ai gaw prat htum ten du hkra Karai Kasang a amyu masha ni yawng a matu ap nawng na hpe gwi gwi daw dan lai wa ai lam re hpe tsun lai wa ai.”
Cardinal Mamberti gaw Wa Sarabyin Benedict (16) a ga hpe bai myit dum let tsun lai wa ai. Yesu hpe tsawra ai shi a gawng kya ai tsawra myit hpe Simun myit dik nga ai hpe shi chye na ai. “Dai tsawra myit gaw shi hta atsam nga ai tsawra myit langai sha re” nga nna tsun lai wa ai. Ndai gaw nkam sham ai a majaw jam jau hkrum ai lam hpe chye ai Kasa ni a matu myit mada lam hpe jaw ya ai lam mung rai nga ai. Dai ten kaw na Petru gaw shi a myit kataw shut lai ai hpe atsawm sha chye nna Madu hpang de bai hkan nang lai wa ai.
Bai nna Cardinal Mamberti gaw 25 tup Wa Sarabyin magam hpe gun hpai lai wa sai Wa Sarabyin John Paul II tsun lai wa ai ga gaw “Nye a masin salum hta Madu Yesu the Petru shaga hkat ai lam sha galoi mung bai dum shing ran mu nga ai” dai zawn sha Madu ngai hpe shi hpe bai htan na matu atsam jaw nga ai, Petru zawn sha “Madu nang Ma hkra hpe chye nga ai, ngai nang hpe tsawra ai hpe mung nang chye nga ndai”. Dai hpang Madu mung shi hpe kalang bai shi a sasana magam lit hpe kam let bai ap ya ai hpe mung myit dum nga ai lam tsun lai wa ai.
Cardinal Mamberti kawn chyum mungga daw lahkawng ..Shingran Laika hta Karai Kasang hte Sagu kasha hpe tsawra hkungga let shakawn kungdawn ai lam hpe anhte ni mu hti lu ai lam hpe bai myit dum mai ai lam tsun lai wa ai. Wa Sarabyin Francis kawn jahkring hkring “anhte, Nawku hpung a Sa sana pan dung hte kam sham ai hpung masha ni a matu” Kam sham let nawku daw jau na gaw madung rai nga ai lam hpe tsun shadum lai wa ai hpe bai myit dum mai nga ai. 2024 shaning na hkawhkam masum poi Epiphany shani na Wa Sarabyin a mungga hta anhte ni Tsawra myit rau kam sham daw jau ai hte atsam ni htum mat sai lam hpe tsun lai wa ai. Anhte ni a kam sham ai myit hte akyu hpyi daw jau ai lam a tsawm htap ai hpe mung bai tam nga ga. Dai ni na prat hta anhte ni kaw ndai zawn re kam sham ai myit hte nawku dawjau ai lam (adoration) ni yawm mat wa ai hpe mu mada nga ai lam tsun lai wa ai.
“Ndai zawn re ai myit jung nna kam sham ai lam (adore) gaw Wa Sarabyin Francis kaw asan sha mu mada lu nga ai. Shi a shakut shaja ai Sa sana prat hte kyu hpyi ai hta ru jung ai gaw hti ndang ai shi a Ingatian prat na tara ni a majaw rai nga ai. Shi jahkring hkring anhte hpe tsun shadum nga ai lam gaw “anhte ni sung sung myit sawn sumru yu ra ai lam gaw “Tsawra myit a shadut ya ai” lam rai nga ai , dai gaw anhte hpe Mungkan ga kaw na garan gin hka kau ai lam nre sha anhte hte rau Karai Kasang hpang de grau nihtep hkra galaw ya nga ai hte nga sat nga sa ai lam hpe grau nna lachyum sung ai hku nga sa mai ai lam re hpe Nawku hpung hpe tsun shadum nga ai hpe anhte ni chye lu nga ai.”
Ngut nna, Cardinal Mamberti gaw, Wa Saradaw Francis gaw, Chyoi Pra ai Nu Maria Nawku Htingnu kaba hta, 126 lang akyu hpyi lai wa ai, Salus Populi Romani ngu ai Nu Maria a myi man npu e, lam shagu hpe gara hku galaw lai wa sai lam hpe bai myit dum lu mai nga ai. “Ya shi tsawra madu shadan ai sumla makau e hkring sa nga sai,” nga nna Cardinal Mamberti gaw, kam sham ai hpung masha ni hpe shi hpe Yesu a kanu Maria hte anhte kanu mung rai nga ai Maria a lata hta akyu hpyi ap nawng ya na matu saw shaga lai wa ai.
Kam sham ai hpung masha ni akyu hpyi ai aten hta, Nawku hpung gaw, Wa Saradaw Francis hpe shi Madu a mungdan de woi la na re, Nawku hpung a akyu hpyi ga hpe kam sham ai lam hpe hkap la let, “shinggyim masha a gawng kya ai lam kaw na” shi hpe jasan jaseng ya na matu, “sadi dung ai mayam ni a matu ga sadi jaw da ai shabrai kumhpa ” hpe jaw ya na matu akyu hpyi ya lai wa ai.
