PASKA LADAW LABAN (4): SAGU REM WA KAJA LABAN
(Good Shepherd Sunday)
Hkristu hta Tsawra hkungga ai nu wa hpunau ni ndai laban gaw shaning c a paska ladaw hta laban mali rai nga ai.
Mabyin lam langai mi tsun dan mayu ai si ai ni yawng a poi nhtoi hta, ramma marai 6 gaw lup wa langai mi de akyu hpyi na matu sa wa ma ai. Shanhte gaw, lup kata e si taw nga ai num langai a kasha ni gaw n rai tim, dai shara e nga ai num langai a gaw da ai lup ntsa e , “Dear Mama” Tsawra ai nu ngu ai laika hpe ka lai wa ai. dai num gaw shanhte a kanu n rai tim, shanhte a kanu tai wa ai. Shi gara hku nna shanhte a matu kanu tai wa ai lam hpe ramma marai 6 kawn tsun dan da nga ai:
“Ndai gaw chypra ai num langai a nrut nra rai nga ai,” nga nna dai marai kru a ningbaw wa gaw tsun lai wa ai, ” ndai num gaw lai wa sai lahkawng ning hta ngai hpe ndai Chicago myu mare na masha ni hte Karai Kasang hpe pi n chye ai jasam masha langai mi hku na nga lai wa ai. Shi gaw ngai hpe shi a Chyum Laika sharin hpawng de sa lawm na matu saw shaga lai wa ai, nye a hpun palawng ni gaw dingsa nga ai raitim, shi a nta de ngai hpe saw shaga lai wa ai. Shi gaw ngai hpe Yesu a lam tsun dan ai hte grau kaja ai sak hkrung lam hpe tsun dan lai wa ai. dai majaw nye a myit masin gaw karai kasang hpang de ap jaw na matu shadut shagwi ai lam n ra ai..daini du hkra Yesu gaw ngai a madu rai nga ai zawn ngai mung Shi a ma rai nga nngai.”
Lahkawng hte masum ngu na ma yan gaw, “Ngai hte nye manang gaw ndai mare hta nta nlu ai, manang nlu ai ni rai nga ga ai. Ndai numsha kawn hpaw da ai Chyum Laika sharin hpawng nga ai lam hpe na lu ai majaw, anhte sa nna hpang jahtum na dung ai shara e dung nna, an hpe n mu hkra makoi magap ai hte shang lawm lai wa ai rai tim ndai numsha a myi gaw, dinghkrai sha rai nga ai ni, manang nlu ai, nta nlu ai zawn rai nga ai ramma kadai hpe mung n ngam kau ai. sharin hpawng ngut ai hpang, shi gaw anlahkawng hpe mungkan a lam hte wenyi hte seng ai lam ni hpe asan sha tsun dan lai wa ai. Shi gaw anhte hpe nga shara jaw ya ai, anhte a prat hta mung gau ngwi ngwi Yesu hpe shara jaw chye na matu lam matsun madun ya lai wa ai.”
“Ngam nga ai ma ni hta na mali ngu na ma gaw, ndai numsha hpe chyeju dum na matu ngai hta grau nga ai. Lai wa sai lahkawng ning daram hta, ngai hte nye manang lahkawng gaw, nanghpam lu sha ai ni rai ga ai. Ndai numsha gaw, Ramma dabang hta anhte hpe mu nna, shi a nta de woi mat ai. Anhte gaw, shawng e Hkristan hpung masha ni rai yu saga ai, raitim, ya gaw, anhte yubak kata e pyaw len mat nna nawku hpung a shinggan de rai mat sai lam tsun dan ai shaloi shi gaw anhte a myi hpe azi yu nna myi prwi hte ‘Ngai kam sham ai Yesu gaw lam dam nga ai sagu ni hpe galoi mung hkan tam nna shaga nga ai..nanhte hpe shi a sagu lawng de bai woi na matu ngai hpe shangun ni ai.
Shi gaw anhte hpe akyu hpyi ya lai wa ai, Yesu a n-gaw nwoi matsan dum lama hkam la na matu, anhte a kanu ni a matu, anhte a matu hpyi nem ya ai. Shi gaw anhte hpe ga sadi laika hta lata masat na matu shadut ya ai; anhte a baw ntsa e lata mara nna, anhte a matu akyu hpyi ga ni hte hpyi ya lai wa ai. Dai ten kaw nna, anhte a prat hta n-gun nnan ni bai hkam la lu ai, dai shani kaw nna ya du hkra, Karai Kasang a chyeju hte, galu kaba ai prat hpe e hkawm sa lu saga ai.
Ndai bat na Kabu Gara Shiga hta Yesu gaw Sagu rem wa kaja hte sagu ni a ga shadawn hku nna anhte hte Shi a kanawn mazum lam hpe tsun dan nga ai.
Yesu Karai Kasang gaw shi a amyu masha ni a sagu rem wa kaja re ai lam hpe kahtap nna sanglang dan lai wa ai. Dai ni e, Sagu rem wa kaja a chyeju kumhpa ni hte shi a sagu ni a masat kumla ni hpe myit sumru yu nga ga.
1) Yesu gaw sagu rem wa kaja rai nga ai.
Anhte a Madu Yesu gaw, “Ngai gaw Sagu rem wa kaja rai nga nngai” nga nna tsun da ai. Dai gaw asan sha hte shut shai ai hku chye na ai lam n re sha yawng na chye lu na matu ndau shabra ai lam rai nga ai. Shi gaw Sagu rem wa kaja rai nna, Shi a malai kaga lam hpa n nga ai, ndai tsun shaga ai lam hpe shingjawng ai lam n nga ai. Shi a shawng e du sa ai ni yawng hte shi a hpang e du sa na ni, meshia re ngu nna masu tsun shaga ai ni yawng gaw lagut damya ni rai nga ma ai. Shanhte gaw sagu ni a matu tinang a asak nawng kau na matu n rai nga ai, sagu ni hpe kashun la na matu she du sa ma ai. Sagu rem wa kaja rai nga ai Yesu gaw, anhte hpe lanu lahku ai, matsan dum chye ai ngu ai lam sha n-ga, tengman ai sagu rem wa mung rai nga ai.
Hkawhkam Dawi gaw “Madu gaw nye a sagu rem wa rai nga ai” ngu nna shk 23:1 hta tsun da nga ai zawn “Karai Kasang gaw shi a amyu masha ni hpe sagu hpung zawn Mawshe yan Arun a lata hte woi awn nga ai (Shk 77:20)” nga nna tsun da nga ai. Myihtoi Esaia gaw Karai Kasang gaw sagu rem wa zawn shi a sagu hpung hpe rem na ra ai (40:11).” Yaweh karai kasang gaw Ga Shaka Dingsa prat hta shi a amyu masha ni a sagu rem wa rai nga ai. Ya e, Yesu gaw dai hpung shingkang rawng ai arawng aya hte lit hpe Shi hkum nan hkam la sai. Anhte a Madu Yesu gaw, Shi a sagu ni rai nga ai anhte ni hpe lanu lahku, bau maka, matsun madun ai Sagu rem wa kaja rai nga ai.
(i) Sagu rem wa kaja gaw shi a sagu ni hpe chye chyang ai: Sagu rem wa kaja kadai mung shi a sagu ni a mying hte shanhte a arawn alai ni hpe chye ra ai. Sagu law malawng zawn lam shut ai hku hkawm sa mat wa yang, shi gaw hpang kaw hkan nang nna bai woi la ra ai. Dai hte maren Yesu mung Shi hkum nan shi a sagu ni hpe chye ai. Sumsing lamu na shagan ni hpe hti nna, shanhte a amying hte shaga ai wa gaw, anhte langai hte langai hpe anhte a amying hte chye chyang nga ai rai nna, anhte a bawnu na kara ni hpe pyi hti dan ai wa gaw, Shi a kashu kasha ni hpe laksan myit dum nga ai.
Yesu gaw anhte hpe tsawra ai hte matsan dum ai majaw anhte hpe chye nga ai. Tsawra myit n rawng ai myit masin gaw machye machyang hte hku hkau lam n nga ai raitim, Hkristu a myit masin gaw anhte hpe tsawra myit hte hpring rai nga ai. Shi gaw anhte hpe langai dinghkrai chye ai sha n-ga, anhte a ra kadawn ai lam law law hpe mung chye ya ai. Shi gaw anhte hpe, tsit lali ai u dat shara de woi sa nna sagu ni zawn, hkru hkra anhte hpe lajang ya na re.
(ii) Tengman ai Sagu rem wa gaw shi a sagu ni hpe makawp maga na re: David Israela hkawhkam ni a hkawhkam n tai shi yang sagu rem ai wa rai nga ai, sagu ni hpe hkanghkyi chyahkyawn ni a n gup na shanhte hpe law law lang makawp maga ai hte gasat ya lai wa ai rai nga ai (I Sam 17:34-36). Sagu rem wa kaja gaw, sagu ni a matu tinang a asak nawng kau ya na rai nga ai. Sagu rem wa si ai gaw sagu ni a shimlum lam shabyin ya nga ai. Sagu rem wa kaja Yesu gaw shi a sagu ni a asak a matu shi a asak hpe ap kau ai. Shi jaw ya ai asak gaw htani htana rai nga ai.
“Sagu rem wa hpe kayat yang sagu ni bra ayai mat na re” nga nna tsun ai raitim, Sagu rem wa kaja – anhte a Madu Yesu Hkristu a mau hpa hku si hkam ai gaw Shi a sagu ni hpe shinggyin la lu ai. Shi si hkam ai gaw anhte a shim lum lam rai nga ai; Shi si hkam ai gaw anhte a hkye hkrang la ai lam rai nga ai. Sagu rem wa kaja Yesu gaw, shi a si hkam ai hkku nna htani htana si hkrung si htan a n-gup kaw na anhte hpe hkye hkrang la sai rai nga ai.
2) Sagu ni a masat kumla ni
Hparishe ni hte laika ka ai sara ni gaw Yesu. hpe n madat mara ai nkam n sham ma ai. hpa majaw shanhte gaw yesu hte n seng ai majaw rai nga ai. Yesu shi nan tsun ai gaw shi a sagu ni gaw shi a nsen madat na re nga nna tsun da nga ai. Shi a ga madat nna kam sham ai ni hpe mung htani htana asak jaw ya nga ai.
(i) Sagu ni Shi a Nsen hpe madat mara ai:
Madu gaw Shi a sagu ni a nsen hpe na lu hkra galaw na lam sadi jaw da ai. Shawng de anhte a ji wa ni hpe myihtoi ni hku nna ga shaga lai wa sai rai tim, ya gaw shi a Kasha shingtai hku nna anhte hpe ga shaga nga ai. Shi a nsen hpe chye ginhka nna kabu gara hkap la ra ai. Shi a sagu re ai anhte ni gaw shi a nsen hpe madat nna shi a mungga hku nna anhte a prat hpe lam madun, matsun na matu tara shatai hkap la ra ai. Shi a nsen gaw na hta dwi nna myit masin hpe simsa shangun ya nga ai. Shi a ga hpe n madat ai ni gaw Shi hte n seng ai. Shi hte Shi a ga hpe myit masin masin hpaw nna hkap la ai ni sha, Shi a sagu ni rai nga ai.
(ii) Sagu ni Shi a hpang hkan nang ai:
Sagu rem wa hte seng ai sagu ni gaw chye na hkawn hkrang ai na hte madat mara ai myit masin nga ai. shanhte gaw Shi a sharin achyin ai lam yawng hpe madat mara ai myit nga ai. Shi a lam matsun hpe hkan nang nna, kabu gara let shanhte a prat hpe Shi a Wenyi hte kasi ningli hte maren hkan sa nga ma ai. Shi a sagu ni rai nga ai anhte ni gaw, hpyen du wa a hpang e sadi dung ai hte hkan nang ai hpyen la ni zawn Madu yesu hta sadi dung ai hte hkan nang ra ai. Anhte a myit masin hta dazik hku nna sha n-ga, anhte a lam ni a matu nhtoi hku nna Hkristu hpe tawn da ra ai. Shi a lagaw hkang ni hpe masat da ai, dai lam ntsa hku nna hkawm sa ra ai. Anhte a prat hpe ‘Shi a matsun maroi ga, Shi a lajang da ai a sung htum lam ni, Shi a Wenyi a lam matsun madun ai ni hpe’ hkan sa ra ai.
Anhte a Sagu rem wa kaja rai nga ai Madu Yesu Hkristu gaw anhte hpe tut nawng e lam madun, bau sin, makawp maka ya nga u ga law.
Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw paska ladaw hta. mali ngu na lanban rai nga ai hti ang ai ja chyum mungga ni gaw chyum mungga daw langai ..kasa laika 13: 14, 43-52 chyum mungga daw lahkawng shr 7: 9, 14-17 kabu gara shiga yawhan 10: 27-30
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law
