Daini gaw, anhte a salum tingnyeng hta kadai dung nga ai kun ngu ai hpe jawm sumru dinglik yu ga.
1Korihtu 10:31 hta na chyum ga daw hpe madat la yu ga:
“Dai re ai majaw, nanhte sha timung, lu timung, hpa galaw timung, nga manga hta Karai Kasang a hpung shingkang tam let, galaw nga mu.”
Karai Kasang a hpung shingkang Arawng Sadang hpe ndau shabra ai ngu ai gaw, arai yawng mayawng hpe shi a shara hta shi hkrak tawn da ai lam rai nga ai.
Dumbru dumbra, n ru n ra rai nna, shada shingjawng shaja hkat ai lam ni gaw, shinggyim masha ni, arawng aya hpe tinang a matu shakut ai a mahtai rai nga ai. Hpung shingkan arawng sadang ngu ai hpe Karai Kasang chyu sha gying dan nga ai; shi chyu sha yawng mayawng a ntsa e nga nga ai. Shi chyu sha dai arawng sadang a lit numnak ni hpe lu hpai nga ai.
1 Korihtu 10:31 hta tsun da ai,
Anhte gaw, Karai Kasang a hpung shingkang hpe ndau shabra ya na matu hpan da hkrum saga ai. Shi a hkyikhkam ai, htoi tu ai hte shi gyingdan nga ai lam hpe, anhte a aga hte, amu bungli hte sakse hkam ya ra ga ai.
Dai zawn Karai Kasang a hpung shingkang hpe mungkan de ndau shabra lu na matu, anhte a myit masin salum ni hpe san jep dinglik yu ra ga ai.
Dai myit masin tingnyang hta anhte nan, naw dung nga ai rai yang gaw, Karai Kasang gaw amying shingteng mahkra hta grau ai ngu nna anhte n lu ndau shabra ga ai.
Mungkan lam ni hta awng dang na, masha ni e madi shadaw, aw law ai hpe anhte naw tam nga ga yang gaw, Karai Kasang a ningtawn ai lam ni hpe n lu ndau na re. Anhte a matu, yawng mayawng hpe ap nawng kau sai Madu Yesu a matu, tinang a akyu ni hpe ap nawng kau ai hte she lu hpang na rai nga ai.
Anhte a salum ni kaw na, tinang hkum hpe lu sit kau ai rai yang she, Madu Yesu hpe anhte n dut n dang lu shagrau na re. Hkye La Madu Hkawhkam Wa hpe yu azi nga ga yang she, tinang a tinggyeng akyu tam ai, dip da hkrum ai lam hte lit magun kaw na lawt lu na ga ai. Dai shaloi she, anhte a sak hkrung prat a yaw shada lam rai nga ai matut manoi, mau na zawn re ai nawku dawjau ai sak hkrung prat hpe anhte lu la na ga ai.
San Yawhan a Shingran Laika 19:6-8 hta, Karai a Sagu Kasha a sumsing mungdan na tsawm htap ai hkunggran poi hpe shingran madun ya ai.
“Alleluia: Chyahtum chyalai n-gun rawng ai Madu anhte a Karai Kasang gaw a up nga ai. Anhte kabu gara ai hte sharawng awng nga ga, shi a hpung shingkang hpe shagrau nga ga.
Kaning rai nme law, dai Sagu Kasha a hkungran ai poi du ra ai hte, shi a num ningnan jan gaw shi hkum hpe mawn sumli ngut sai rai nna, hpraw tu ai hte san seng ai lachyit nba hte tinang a hkum hpe mawn sumli na ahkang shi lu la nu ai”.
Lani mi na nhtoi hta, hpan da hkrum ai arai mahkra gaw, Yesu hpe myiman chyaw mu mada lu nna, shi hte gingdan ai arawng aya hpung shingkang hpe jaw na mara ai. Yawng mayawng gaw, shi a shara hta shi rai wa na ra ai. Dai shaloi, Karai Kasang a Hpung shingkang a matu sha, asak hkrung ai lam a akyu rai nga ai htani htana asak hpe anhte mu lu na ga ai. Dai ahkaw ahkang hpe ndai dinghta ga ntsa e pyi anhte hkam la lu na matu Karai Wa lajang da ya sai.
Akyu Hpyi Ga:
- Karai Kasang a Hpung shingkan hpe sumru yu ga. Na a salum tingnyang hta Karai Kasang hpe shagrau mayu ai myit rawng wa hkra chyum mungga daw hpe bai hti yu ga:
Hpilipi 2:9-11 “Dai re ai majaw, sumsing lamu lahta tang na dinghta tsang na hte Katsan ga na lahput yawng mayawng hte gaw, Yesu a mying nsang hte hput di nna, Yesu Hkristu gaw Madu rai nga ai, nga nna shinglet yawng mayawng hte gaw, Kawa Karai Kasang a hpung shingkang a matu mara kajai gumhkawng nga mu ga”.
- Madu Yesu gaw, na a salum jut shagu hta up hkang nga a ni? Shara ra hta na a tinggyeng arawng aya a matu, tinang a mungdan ngu ai naw ngam da ai kun? Dai lam ni a matu myit malai nna Karai Kasang a chyeju hpe hkam la lu na matu akyu hpyi u.
- Mungkan ntsa hta shi a hpung shingkang hpe gara hku ndau ya lu na ngu ai hpe Karai Kasang kaw hpyi u. Madu Yesu hpe shagrau sharawt da lu, shi kadai wa re ai ngu ai hpe masha ni chye lu hkra, nang gara hku sak hkrung na rai? Karai Kasang hpe jaw ai hku nawku daw jau chye hkra, kaga masha ni hpe gara hku woi awn lu na rai?
Hpang Jahtum:
Karai Kasang gaw, anhte a tinggyeng akyu ni hpe myit shadik ya ai “arawng sadang” hpe n sharawng ai. Arawng sadang “tingnyang” ngu ai hpe shi hkang shading chye ai. Nawku dawjau shagrau sha-a ai lam hpe shi chyu sha shading sharai chye nga ai. Shi a Hpung shingkang arawng shadang hpe shadan shadawng ya ai gaw hpan da ai lam yawng a matu kaja dik rai nga ai.
Dai majaw Hkawhkam Shawlumon gaw, Shakawn Kungdawn Laika 72:19 hta ning nga ka da ai:
“Shi a dan hkung nga ai amying ningsang prat dingsa e, a nga u ga; Mungdan ting gaw shi a hpung shingkang pri rai nga u ga law! Amen, Amen!”
Daini, anhte Karai Kasang hpe shagrau sha-a ai shaloi, Shawlumon a akyu hpyi ga ni mung anhte a akyu hpyi ga ni rai u ga.
Yawng hpe Karai Wa shaman ya u ga.
By His Eminence Charles Cardinal Bo
