( 5th Sunday of Easter year C )

PASKA LADAW LABAN (5), C SHANING

( 5th Sunday of Easter year C )

 Ndai mungkan hta ngai  kalang sha lai wa na nngai. Ngai galaw lu ai kaja ai lam, shing nrai, shinggyim masha langai ngai hpe madun dan lu ai matsan dum lama ai lam, ya aten hta galaw shangun rit. Kaning rai nme law, ndai lam hku hpang kalang ngai bai n lai na nngai – Stephen Grellet

 Kalang mi hta, jawng langai hta jawng saranum langai gaw, shi a jawngma ni hpe hkungga jaw na matu, shanhte shi hpe gara hku galai shai shangun mayu ai lam langai hpra hpe tsun dan na matu dawdan wa ai. Shi gaw ma langai hpra hpe jawng shawng kaw shaga nna, shi hte shi a jawng hpe gara hku galai shai shangun mayu ai lam tsun dan ai. Dai hpang, ‘Ngai a nga pra lam gaw shai hkat ai lam byin shangun ai’ ngu ai ja nsam hte ka da ai shngri langai hpe noi da ya ai. Dai hpang,  dai jawngma ni hpe lit langai jaw ai.

 Ma langai hpra hpe shingkyit masum jaw dat nna, shanhte mung kaga marai langai ngai hpe hkungga jaw ra ai. Bat mi na ai hpang ndai masing gaw kaga masha ni hpe gara hku bai htang ai lam ni re hpe bai tsun dan ra ai. Ma langai gaw shi a bungli masing hkyen ai lam hta karum ya ai junior executive langai hpang de sa lai wa ai. Shi gaw ndai blue ribbon hpe noi ya nna kaga langai ngai hpe hkungga jaw na matu ribbon lahkawng hpe bai jaw lai wa ai. Ndai junior executive wa gaw, shi a hpa-awn wa hpang de sa wa ai, shi gaw, n hkru n kaja ai masha langai hku nna mying gumhkawng ai wa rai nga ai. Shi hpe dung shangun nna, shi  hpaji ninghkring langai mi re majaw shi kade daram hkungga ai lam tsun dan nga ai. Boss wa grai mau ai zawn rai nga ai. Dai hpang dai ma gaw, dai ribbon hpe shi a palawng ntsa e noi ya lu na kun ngu nna san lai wa ai. Shi a mau mat ai Boss wa gaw, “Well, sure” ngu tsun lai wa ai.

Dai ramma executive wa gaw shi a myit masin ntsa kaw nan shi a boss a jacket ntsa na ribbon hpe shinggrup da ai. Dai hpang, dai executive wa gaw shi a boss hpe dai extra ribbon hpe jaw nna, “Nang ngai hpe karum ya na kun? Ndai ribbon hpe la nna kaga langai ngai hpe hkungga jaw na kun? Ndai hpe jaw ai jawngma wa gaw project langai mi galaw nga ai rai nna, ndai masat masa galaw ai lamang hpe matut galaw nna, dai gaw masha ni hpe gara hku hkra machyi shangun ai hpe sawk sagawn mayu ai,” ngu tsun ai. Dai shana hta, Boss wa gaw nta de du ai shaloi shi a asak 14 ning re ai kasha hpe shi a makau kaw dung shangun let, Shi a kasha hpe tsun ai gaw, “sha e, dai ni rung kaw mau hpa lam byin lai wa ai. Junior executive langai mi gaw ngai hpang de sa nna, ngai hpe hpaji ninghkring langai mi ngu shakawn ai, ndai blue ribbon hpe jaw ai, dai hta ‘What I am makes a difference’ ngu ka da ai. Dai hpang shi ngai hpe kaga langai ngai hpe hkungga jaw na matu tsun lai wa ai. Ngai nta de mawdaw gau wa ai shaloi kadai hpe hkungga jaw yang kaja na ngu myit nga ai, hpang jahtum e nang hpe myit dum dat ai majaw  ma hpe hkungga jaw mayu ai ngu nna tsun lai wa ai.”

 Shi gaw matut nna shi a kasha hpe tsun ai hta, “Ngai a shani shagu gaw grai bungli law ai rai nna, nta de wa ai shaloi nang hpe aten n jaw byin ai. Kalang lang, jawng kaw na amat n law ai majaw, na a yup gawk n hkru hkan maza ni taw nga ai majaw, wa nang hpe jahtau tsun lai wa ai. Gara hku mi rai rai, daina, ngai ndai kaw nang hte rau dung nna, nang gaw na a nu ngut yang nye a matu grai ahkyak ai wa re ai hpe chye shangun mayu ai. Nang grai myit su ai ngai ma hpe tsawra nngai. ngu tsun dat ai shaloi” Mau mat ai ma gaw hkrap hpang wa ai. Shi a hkum ting gari mat ai. Ma gaw shi a kawa hpe mada yu nna, hkrap let “Wa ngai hpe n tsawra ai ngu myit ai majaw, hpawt ni ngai hkum ngai sat si na matu hkyen lajang da ai. Ya gaw n ra sai,” ngu nna tsun dat ai.

Tsawra myit gaw mungkan ting hte anhte hpe galai shai ya lu ai hpan da ai atsam kaba langai rai nga ai. Hkap la ai wa hpe myit pyaw shangun sha n-ga jaw ai wa hpe mung matsan shangun ai n rai nga ai. Dai majaw, Mother Theresa tsun ai gaw, “Nang du hkawm ai shara shagu hta, shawng nnan tinang a kun dinghku hta tsaw ra myit hpe shachyam shabra nga u, tinang a kashu kasha ni hpe mung, tinang a madu wa ni hpe mung, tinang a makau htingbu htingbyen ni hpe mung tsawra myit jaw ya nga u.tsun da nga ai.

 Yesu gaw tsawra myit hpe manu. shadan ai. Shi a nawku hpung hpe shadut ya ai n-gun atsam hku nna tsawra myit hpe galaw da ya ai. Dai ni na Kabu Gara Shiga hta, shi a sape ni hpe tsun ai gaw, “Ngai nanhte hpe hkang da ai ga ningnan jaw na ma de ai: Ngai nanhte hpe tsaw ra ai zawn, shada da tsaw ra nga mu… Nanhte shada da tsaw ra ai ndai tsawra myit a marang e, nanhte nye a sape ni rai nga ai hpe masha shagu chye lu na ma ra ai.” Yesu gaw Mawshe Ningnan rai nga ai. Mawshe zawn, pru wa ai lam nnan, ga shaka nnan hpe hpan shalat nna, hkang da ai tara nnan hpe shapraw ya ai.

1. Ga shaka dingsa prat hta Mawshe gaw Israela ni hpe Egutu mung na mayam prat kaw nna woi shapraw la nna ga sadi ai lamu ga de woi wa ai. Hpara-u a mayam tai ai kaw nna, Karai Kasang a mayam tai wa hkra shalawt ya lai wa ai.

Yesu gaw “Mawshe nnan” hku nna Pru mat wa ai lam nnan hpe hpan da ai. Shi woi awn ai pru wa ai lam gaw mungkan a mayam tai ai prat kaw na n re, Yubak a mayam tai ai hte Satan a uphkang ai kaw na lawt lu ai htani htana hkye hkrang la ai lam madaw rai nga ai. Yesu woi awn ai npu hta nga ai ndai masha shagu gaw Karai Kasang a masha ni rai nga ai. Karai Kasang gaw anhte a Madu, Anhte gaw shi a mayam ni rai nga ga ai.

2) Yesu gaw Ga Shaka Nnan Hpe Hpaw Ai

Sina bum ntsa e, Mawshe gaw Yaweh karai kasang hte Israela amyu ni a lapran ga shaka galaw ya lai wa ai. Pru Mat Wa Ai Laika (Ch 24) hta Mawshe gaw karai kasanng a hkang da ai ga yawng hpe amyu masha ni hpe hti dan ai shaloi, amyu masha ni yawng gaw, “Madu hkang da ai lam yawng hpe anhte galaw nna madat mara na ga ai,” nga nna nsen langai sha hte htan lai wa ai. Dai hpang shanhte gaw Karai Kasang hpe hkungga jaw ma ai shanhte gaw dumsu langai mi hpe nawng jau lai wa ai. Mawshe gaw sai daw mi hpe tawn hkungri ntsa e lapri nna ngam ai daw mi hpe Mawshe gaw. Amyu masha ni a ntsa lapri bun nna ndai sai gaw Karai Kasang hte tawn da ai ga shaka kumla rai nga ai ngu nna tsun lai wa ai. Amyu masha ni hpe ga shaka a asai hte dazik shakap ya nu ai.

Mawshe Nnan Yesu gaw dumsu hte bainam asai hte n rai, Kalvari bum ntsa e Shi a asai hte Karai Kasang hte anhte a lapran ga shaka ningnan hpe gaw da ya ai; anhte gaw Mawshe a tara ni hpe tup hkrak hkan sa ra na n rai. Yesu Hkristu gaw Udang ntsa hta sak jaw kau ai a marang e hkye hkrang la hkrum ga ai. Yesu gaw anhte hpe Sumsing lamu na Kawa hte htinglu htinglai ya ai gaw, Udang ntsa hta shi a sai a marang e rai nga ai.

3) Yesu Tara Ningnan Shapraw Ai Amyu ningnan hpe hpan da ai

Yesu gaw hkang da ai ga ningnan jaw ya ai. Shi tsun ai gaw, “Ngai nanhte hpe hkang da ai ga ningnan jaw made ai: Ngai nanhte hpe tsaw ra made ai zawn, nanhte shada da tsaw ra nga mu.” Shi gaw anhte a Uphkang Du rai nna, ga shaka ningnan a npu e amyu nnan hpe hpan da ya ai, dai majaw, Shi gaw anhte hpe hkang da ai ga ningnan jaw na ahkaw ahkang lu nga ai. Mawshe gaw moi na tara hpe jaw ai wa rai nna, Yesu gaw tara ningnan rai nga ai. Mawshe gaw Tara Kanu (10) hpe jaw da ai zawn, ya mung anhte a Ningbaw ningnan Yesu gaw tara nnan jaw ya ai. Mawshe jaw da ai tara dingsa ni gaw Hparishe ni hte laika ka ai sara ni a htung lailen ni a majaw hten za mat sai. Raitim, Yesu jaw ai hkang da ai tara nnan gaw, nnan sha n-ga, htani htana grin nga ai hte, galoi mung nnan rai nga na re.

“Shada da tsaw ra ai” ngu ai gaw hkang da ai tara nnan n re. Mawshe a Tara hte maren dingsa sai. Jaw Jau Laika hta “Na a htingbu wa hpe na a hkum hte maren tsaw ra nga u (19:18)” ngu ai hpe mu lu ai. Raitim, ndai hkang da ai ga a yaw shada lam gaw nnan re. Yesu gaw, “Ngai nang hpe tsawra ai zawn, na a htingbu wa hpe mung tsawra u” nga nna tsun. da ai. Sape ni gaw Shi a tsawra myit hpe hkam sha lai wa sai. Shanhte hte rau nga ai masum ning laman, shanhte hpe tsawra myit hte tsun shaga ya ai, Shi a mying ningsang hta lamik kumla galaw lu na atsam jaw ya ai, Hparishe ni hte laika ka ai sara ni shanhte hpe jahpoi asawng ai shaloi, shawa man hta madi shadaw ya ai. Shanhte shut ai shaloi, sumnung shingdi ai hku sharin achyin ya nna, shanhte a shut shai ai lam ni hpe hkam sharang ya ai, mara raw ya ai mung rai nga ai. Shing rai Hkristu gaw shi a sape ni hpe tsaw ra ai. Shi a tsawra myit hpe hpang jahtum madun dan ai lam gaw Udang ntsa e si hkam ai rai nga ai. Sape ni gaw shanhte a tsawra myit hpe Shi a tsawra myit hta kasi la na matu saw shaga la hkrum ai rai nga ai.

Yesu a tsawra myit gaw shadawn sharam n nga ai. Yubak kap ai ni naw rai nga ai ten hta pyi Shi anhte hpe tsawra nga ai. San Pawlu tsun ai gaw, “Anhte yubak kap ai ni naw rai nga yang, Hkristu gaw anhte a matu si hkam ya sai (Rom 5:8).” Anhte chyoi pra ai ni rai ga ai majaw shi anhte hpe tsaw ra ai n rai; Shi a tsawra myit hpe anhte a mai kaja ai lam hte n shadawn ai. Shi a tsawra myit gaw manu jahpu n jaw ra ai sha, manu jahpu n jaw ra ai hku tsawra na matu anhte hpe bai saw shaga nga ai. Hkristan ni gaw n dawng n yawt ai hku n re ai sha, tsawra myit hte masha ni e chye chyang ra ai. Tsawra myit hpe madun ra ai ten dai tsawra myit anhte hta nga ra ai. Tsawra myit gaw anhte galaw ai lam yawng a rudi hte akyang rai ra ai. Hkristu a sape ni a laklai ai masat dingsat gaw, shada da tsawra ai lam rai nga ai. Yesu tsun ai gaw, “Nanhte shada da tsaw ra ai a marang e, nanhte nye a sape ni rai nga myit dai hpe masha shagu chye lu na ma ra ai.” ngu nna tsun da nga ai..

Tsawra ai Nu Wa hpu nau ni e, nanhte a asak hkrung lam hte arawn alai yawng hpe tsawra myit hte masat da nga mu. Yesu anhte hpe tsawra ai zawn, anhte mung, Shi a chyeju hte langai hte langai tsawra nga ga.

Akyu hpyi saga oh hpan madu  karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.

Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw paska ladaw hta. manga ngu na lanban rai nga ai

Hti Ang Ai Ja Chum Mungga Ni Gaw –

Chyum Mungga Daw ( I ) – Kasa Laika : 14: 21-27

Chyum Mungga Daw ( II ) – Shr 21: 1-5

Kabu Gara Shiga – Yawhan : 13: 31-33,34-35

ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law.