Daini na Ja Chyum Mungga hpe hti sumru yu ai shaloi e, Nang gaw amu langai mi, shara langai kaw hkrat sum ai gaw, kaga shara langai mi kaw nang awng dang na matu re. Kasa Paulu gaw, Yuda masha ni kaw tara sa hkaw ai. Shi awng dang ai lam n lu la ai. Bai shi Yuda masha n re ai kaga myusha ni kaw sa nna tara wa hkaw tsun ai shaloi e grai awng dang ai. Shing rai kasa Paulu a majaw, Karai Kasang a tara mungga gaw kaga amyu masha ni kaw chyam bra mat wa sai rai nga ai. Dai majaw na a prat chyinghka maga mi pat mat wa ai ten hta, kam sham dat u. Karai Kasang gaw hpang kalang hta nang hpe grau akyu chyeju jaw ya na chyinghka maga mi hpe bai hpaw da ya na ten sha re.
Dai majaw, hkrat sum ai gaw sum ai lam n re, nang awng dang na matu lam hpaw galai ya ai lam re hpe dum u. Shingrai na a dum nta masha, na a magam bungli, na a kun dinghku lam, na a kanawn mazum lam ni hkrat sum mat ai n re. Nang dai lam ni hta grau awng dang na matu, Karai Kasang gaw kaga lam mahkrun ni hpaw ya taw nga ai re ngu ai hpe kam sham nga u. “Hkawhkam David tsun ndau zawn, Ngai na a mayam wa hte hkum tsan nga et” Ahkyak ai gaw, Madu Karai Kasang na a makau e nga nga ai hpe nang kam sham ai hte pi, nang awng dang sai rai nga ai. Dai majaw shani shagu Karai Kasang tut e nye a makau e nga ai, ngai hpe bau sin ya nga ai ngu ai hpe kam let, kangka jaw kaja ai prat hte hkawm sa nga ga law.
