Daini na Ja Chyum Mungga hpe hti sum ru yu ai shaloi e, Karai Kasang gaw nang hpe ningbaw shara kaw tawn da nna, awng dang shangun na nga, chyum laika hta, tsun da nga ai. Shingrai nang gaw dai Karai Kasang a ga sadi hpe gara hku hkap la na kun. Kam na kun? N kam nna nga nga na kun? Chyeju wunli ngu ai gaw, kam sham ai ni a matu sha re nga tsun chye ma ai. Dai zawn sha Karai Kasang a ga sadi hpe Abraham gaw kam sham nga ai. Shi gaw asak kaba jang she dinghku de ai majaw, kashu kasha n lu mai nga ai. Raitim ngai hpe Karai Kasang kasha jaw na re ngu ai hpe shi kam ai. Shi kam sham ai hte maren byin wa ai. Asak kaba tim kasha Issac hpe jaw ya sai.
Dai hte maren sha anhte gaw Karai Kasang a ga sadi hpe kam sham na sha ra nga ai. Daini na chyum laika daw (1) gaw dai lam yan ni hpe sharin ya ai rai nga ai. Bai kabu gara shiga hta e gaw, mayak mahkak lam a kata kaw, mungkan a lam hta n hkan ai sha, kade mi yak hkak jam jau wa tim, Karai Kasang a jet ai kasha ni byin tai hkra sak hkrung nga pra sa lu na matu n`gun jaw da nga ai. Dai majaw, daini na kabu gara shiga hte maren yak hkak ai ten ni hta mung madu kaw kam sham ai myit ding yang nga sa lu hkra shakut hkawm sa ga law. Madu Yesu tsun ai gaw, Nang kam sham ai hte maren, nang hpe hkye mawai la na teng sha re nga Yesu tsun ndat da sai re.
