Paska Ladaw Laban (7)
(Solemnity of the Ascension of the Lord)
YESU SUMSING LAMU DE LUNG WA AI POI, C SHANING
Paska Ladaw Laban (7)
(Solemnity of the Ascension of the Lord)
Hkristu dan pru ai gaw, Chyoi Pra ai ni a galoi mung myit mada shara rai nga ai, – Spurgeon Leonardo da Vinci gaw shi a studio kaw na sumla kaba langai mi hpe galaw hpang lai wa ai. shi gaw dai sumla hpe galaw na matu aten loi. mi jaw llaii wa ai – ga baw hpe lata ai, ningmu hpe masing jahkrat ai, outline hpe sketch galaw ai, nsam ni hpe jai lang ai, shi a n mai hkan sa ai hpaji byeng-ya hte. Dai hpang kalang ta shi gaw, sumla hpe n shangut shi ai sha, jahkring kau nhtawm, shi a jawngma langai mi hpe shaga la nna, dai bungli hpe ngut kre hkra galaw na matu tsun lai wa ai. Dai jawngma wa gaw, shi a madu galaw hpang wa ai sumla kaba hpe shi n ging dan ai hte n lu galaw ai ngu nna ninghkap lai wa ai. Raitim da Vinci gaw shi hpe atsin sha tawn da ai. “Ngai galaw ai lam gaw nang hpe kaja dik htum galaw na matu shadut ya na n rai ni?” tsun lai wa ai.
Anhte a Madu Yesu gaw lai wa sai shaning hkying lahkawng daram kaw nna hpang wa ai – Shi tsun ai lam, Shi galaw ai lam, grau nna Shi hkam sha ai lam ni hku nna hpang wa ai. Shi a shiga hpe ga shadawn hku nna tsun dan let, sumla hkrang hpe ngut hkra galaw na matu anhte hpe tawn da ya ai. Ndai gaw Sumsing lamu de lung wa ai shiga rai nga ai. Dai ni e anhte a Madu sumsing lamu de lung wa ai poi hpe galaw nga ga ai. Yesu gaw hkrung rawt ai nna nhtoi mali shi ya na ai hpang, Yerusalem makau na Tsanlun bum hte ni ai Behtani mare de sape ni hpe woi sa nna, shanhte hpe shaman ya let, sumsing lamu de lung wa ai. San Luka, kabu gara shiga hkaw tsun ai wa gaw, Yesu sumsing lamu de lung wa ai lam lahkawng hpe anhte hpe tsun dan da ai: langai mi gaw shi a kabu gara shiga ngut ai hpang (Lk 24:50-51), langai mi gaw Kasa ni a Kasa laika nnan hpang ai aten (1:9) rai nga ai. Shingrai, Yesu sumsing lamu de lung wa ai lam gaw, Yesu a dinghta ga prat htum mat ai hpe madi madun ai hte rau, shi a sumsing prat hpang wa ai hpe mung madi madun ya ai, lahkawng lang ngu na hta bai du sa na lam hpe ga sadi jaw lai wa ai rai nga ai.
1) Sumsing lamu de lung wa ai lam gaw Yesu a Mungkan ga ntsa na prat hpe jahtum tawn ai lam re
Yesu gaw sape ni hpe Tsanlun bum de woi sa nna, shanhte hpe shaman ya nga ai shaloi, shanhte hte hka mat wa ai. Dai gaw Yesu a sape ni hpe tsawra myit hte shakram ai lam rai nga ai. Shi gaw shanhte hte rau shaning masum ning tup nga lai wa sai rai nna, ya gaw, Shi sa du ai yaw shada lam hpe shadik shatup ngut sai re majaw, shanhte hte hka mat na rai nga ai. Sumsing lamu de lung wa ai gaw Yesu a mungkan ga prat hta shingra tara langai hpe ngut kre shangun ai lam rai nga ai. Hkum hkrang dagraw la ai lam hte Sumsing lamu de lung wa ai lam gaw shara langai mi hta hkrum zup ma ai. Sumsing lamu kaw nna shinggyim hkum hkrang hpe hkam la na matu du sa nna, sumsing lamu de bai shalun la hkrum ai shaloi sumsing lamu de bai nhtang wa ai. Shinggyim hkum hkrang dagraw ai lam gaw sumsing lamu kaw nna Karai Kasang yu hkrat wa ai lam rai nna, Ascension ngu ai gaw Karai Kasang sumsing lamu de lung wa ai lam rai nga ai. Hkum hkrang hkam la ai lam kaw nna hpang wa ai lam hpe, Sumsing lamu de lung wa ai lam gaw ngut kre shangun ai: Yesu a mungkan ga ntsa na asak hkrung lam rai nga ai.
Yesu a hkrung rawt ai lam hte sumsing lamu de lung wa ai lam hpe Yesu a prat hta garan ginhka nna bung ai mabyin lahkawng hku n rai, langai sha re ai hku mu mada ra ai. Hkrung rawt ai lam hpe npawt nhpang hku nna, Sumsing lamu de lung wa ai lam hpe jahtum hku nna mu mada ra ai. Hkrung rawt ai lam gaw npawt nhpang rai nna, Sumsing lamu de lung wa ai lam gaw Hkristu a Hkrung rawt ai lam hpe shingra tara masa hku ngut kre hkra galaw ai lam rai nga ai. William Barclay tsun ai gaw teng sha rai nga ai, “Yesu a hkrang bung sumla ni gaw hpang jahtum e htum mat wa ai aten du hkra, n law htum byin wa na hpe n mai myit mada ai. Dai gaw masha ni a makam masham hpe hkrak sha jahten kau na re. Ga ntsa na Yesu gaw hpang jahtum e sumsing lamu na Hkristu tai wa ai shaloi, garan ginhka ai shani du wa ra ai.
” Yesu a hkrung rawt ai lam kaw nna hpang wa ai lam gaw, Sumsing lamu de lung wa ai lam hta lai nna kaga jahtum n mai nga ai. Sumsing lamu de lung wa ai lam gaw Yesu a hkrung rawt ai lam a npawt nhpang rai nga ai. Yesu a mungkan ga ntsa na asak hkrung lam hpe hpung shingkang shadan dan ai lam a hkum tsup ai jahtum rai nga ai.
2) Sumsing Lamu de Lung Ai Lam Gaw Yesu A Sumsing Hkrung Ai Npawt Nhpang Lam Re
San Luka gaw, Yesu a sumsing lamu de lung wa ai lam hpe Kasa ni a Kasa Laika a npawt nhpang hta bang tawn da ai hku nna, sumsing lamu hta Yesu a prat hta asak hkrung lam nnan hte magam bungli nnan hpang wa ai hpe madi madun ai shiga hpe asan sha tsun shapraw da ai. Lamu de lung wa ai lam gaw yawng a npawt nhpang rai nga ai, dai hpe laika ka sara wa hpang de tsun na matu npawt rai nga ai. Nawku hpung a npawt nhpang rai nna, Yesu a hpang hkan ai ni a magam bungli yawng a npawt nhpang mung rai nga ai. Yesu sumsing lamu de lung wa ai majaw, sape ni a ntsa Chyoi pra ai Wenyi yu hkrat wa ai lam rai nga ai. Yesu shi nan tsun ai gaw, “Ngai wa ai gaw nanhte a akyu a matu rai nga ai. Ngai n wa yang gaw, hpaji byengnya jaw ai wa nanhte hpang de du na n rai; ngai wa yang chyawm gaw, ngai shi hpe nanhte hpang de shangun dat na we ai (Yhn 16:7)” nga nna tsun da nga ai.
Sumsing lamu de lung wa sai Yesu gaw sape ni kaw nna shi a shingnip shingna hpe n la kau ya ai. Shi gaw sumsing lamu de lung wa nna, “sape ni gaw shara shagu de hkawm sa nna, dai kabu gara shiga hpe hkaw dan nga ma ai: Madu mung shanhte hte rau bungli galaw nna, dai mungga hpe hkan nang ai lamik kumla ni hte shagrin da mu ai.” Shi a sape ni hku nna ya du hkra asak hkrung nna magam bungli galaw nga ai. Chyum Laika hpaji ninghkring Maclaren tsun ai gaw, “Masha ni a ntsa e Wenyi hpe shangun dat ai gaw, lung wa ai Hkristu rai nga ai; masha ni a myit masin hpe madat mara na matu hpaw ya ai gaw, lung wa ai Hkristu rai nga ai; maigan masha ni hpang de Shi a kasa ni hpe shangun dat ai gaw, lung wa ai Hkristu rai nga ai; daini na ten du hkra, Nawku hpung a san seng ai lam, n-gun atsam yawng a daju mung rai nga ai. Shi hkrung nga ai majaw, ga ntsa e nga ai Hkristan hpung nga nga ai, dai majaw, dai gaw galoi mung htenza n hkrum na re.”
Ya aten sumsing lamu hta Yesu galaw nga ai magam bungli hta kaga lam langai mi gaw, hpyi nem ai magam bungli rai nga ai. Shi gaw anhte a matu Karai Kasang a man e galoi mung lapran hku na nga nga ya ai. Shi gaw anhte a matu akyu hpyi ya na matu tut nawng e ahkrung nga ai hkinjawng agyi rai nga ai (Heb 7:24-25).
3) Sumsing lamu de lung wa ai lam gaw Yesu Lahkawng Lang Na Bai Du Sa Ai Ga Sadi Re
Sumsing lamu de shalun la ai Yesu gaw bai du sa na re. Shi Sumsing Lamu de lung wa ai hpang sape ni lamu de mada yu nga ai shaloi, hpraw ai palawng bu hpun ai lamu kasa lahkawng gaw shanhte hpe, “O Galile masha ni e! Nanhte hpa majaw lamu de mada yu nga myit ta? Nanhte mu yu ai zawn Sumsing lamu de woi shalun la sai Yesu gaw, ndai Yesu nan, dai hku bai du wa na ra ai,” ngu nna tsun lai wa ai. Sumsing lamu de lung wa sai Yesu gaw bai du sa na re ngu kam sham nga ga ai. Bai nna Shi bai du wa ai shaloi. Shi gaw tingnyang ntsa e Hkawhkam hku dung nga na ra ai hte, Shi hpe kam sham ai anhte ni mung, Shi hte rau htani htana up hkang nga na rai ga ai.
Tsawra ai hpunau nauna ni e, sumsing lamu de lung wa ai Madu gaw anhte hpe lit langai mi jaw da ai – Shi a sharin achyin ai lam ni hpe hkan nna anhte a prat hpe, Shi a mying ningsang hte Shi a shiga hpe mungkan masha yawng hpe shachyam shabra na lit hpe gun hpai na matu rai nga ai. Anhte hte rau nga nga ai Madu a Wenyi gaw, ndai bungli kaba hta anhte hpe karum ya nga u ga.
Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw Madu Yesu lamu de lung wa ai poi lanban rai nga ai
Hti Ang Ai Ja Chyum Mungga Ni Gaw-
Chyum Laika Daw ( I ) – Kasa Laika 1: 1-11
Chyum Laika Daw ( II ) Heb 9: 24-28, 10: 19-23
Kabu Gara Shiga : Lk 24: 46-53
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law.
