Anhte a salum chyinghka ni hpe kaja wa yaw shada ai myit hte hpaw nna Karai Wa a n-gun atsam hte tsaw ra ai hpe hkam la ga ngu nna saw shaga dat nngai.
Daini gaw, “anhte shani shagu dinghpring ai hte sak hkrung ai” ngu ai a lachyum hpe jawm sumru yu na ga ai. Dai majaw, anhte a myit masin chyinghka hpe dasang hpaw da ga.
Anhte a sak hkrung prat hta, sim sa ai hte kabu gara ai hpe lu la na matu dinghpring ai myit hte hkawm sa ai a malai kaga n nga ai. Masa hta n hkan ai Karai Kasang a tsaw ra ai hta myit magrau grang ai hpe nang lu la da ai rai yang, na a hkum hpe nang, masha ni yu htuk hkra nga shakut ra ai – myit ru myit tsang, pu ba ai lam ni kaw na lawt na ndai.
Masha ni yu htuk hkra nga shakut ai lam kaw na nang lawt lu ai rai yang, kaja wa ahkyak ai, htani htana hte seng ai tengman ai lam a matu nang hta aten ahkying hte n-gun atsam lu na ndai.
Kasa Yaku ka ai Laika 1:26 hta:
“Ngai gaw nawku htung shadik ai wa rai nga nngai, nga nna marai langai ngai myit nawn dam timung, tinang a shinglet hpe n chye hkang ai hte, tinang a myit hpe hkalem kau yang, dai wa a nawku htung, kaman lila sha rai nga lu ai.” nga nna tsun da ai.
Nang hta na a salum hpe pyi hkalem kau na atsam nga ai hpe nang chye nga nni? Dai lam hpe Kasa Yaku aja awa tsun da nga ai. Ngai, kalang lang kaji kajaw sha, masu tsun kau ai wa, nye a “Makam Masham” pyi akyu n rawng, n kaja ai tai wa sani? Nye a myit masin hta loili maw sha kau ai wa, nye a makam masham mung atsam n rawng, hpoi mat wa sani?
1 Samuela 16:7 hta, anhte a salum gaw Karai Ksang a matu kade ahkyak nga ai ngu ai hpe madun da nga ai: “Karai Kasang gaw masha mu de nna mu ai n rai; masha gaw ahpraw nsam sha yu chye ma ai, Karai Kasang chyawm gaw myit masin she yu ai”.
Na a makam masham gaw, nang hkan sa ai hta hkan nna manu rawng nga ai. Na a ga-si, nang galaw ai ni, na a nsam ni gaw, na a salum kata hta rawng ai hpe shadan shaleng ya lu ai daram manu dan nga ai.
Ndai lam ni hpe tsun ai shaloi, Kasa Yaku gaw, “tinang tsun ai ga hte galaw ai amu ni gaw, tinang kadai rai nga ai” ngu nna myit la ai ni hpe sha-ang nga ai. Shanhte galaw ai “mai kaja ai bungli” ni gaw shanhte hpe htuk shatsawm ya ai ngu nna hkam la ai ni hpe tsun mayu ai.
Rai tim, Karai Kasang mahtang, ndai mungkan a hkrang kasi hpe ga-baw kaw nan galai kau ya nga ai: Salum kata hta rawng ai hte maren galaw ai bungli hpe sha manu shadan ya ai; anhte a salum kata hta rawng ai tsawm htap ai lam hpe madun dan ai shinggan na nsam hpe she manu shadan ai; salum kata hta na grit nem ai myit hte tsun shapraw ai ga ni hpe she shi manu shadan ya ai. Shi a Wenyi e tsaw ra let, woi awn nna jahpring shatsup ya ai kaw na pru ai ngu ai, makam masham hpe she, shi manu shadan ya nga ai.
Ya, bai myit yu ga:
Tinang hkum hpe tinang masu hkalem taw nga ai kun?
Nang kadai rai nga ai hpe na a shinggan nsam hte sha dawdan ai kun?
Nang galaw ai lam ni hte na hkum hpe gara hku shabung ai kun? Nang Hkristu hte rau kanawn mazum ai kaw na pru ai mahtai ni rai nga ai kun?
Karai Kasang a tsaw ra matsan dum lama ai hte Chyoi Pra ai Wenyi a shadan shaleng ya ai gaw na a ahkying aten ni hpe jahpring ya u ga.
Akyu Hpyi Ga:
- Dinghpring ai hku asak hkrung ai lam hte seng nna Chyum Mungga tsun ai lam ni hpe sumru yu ga.
- Nang kadai re ngu ai hpe shinggan hku mu mada lu ai lam ni hpe tam nga nni? Nang galaw ai lam ni hpe nang kadai rai nga ai ngu ai hte shingdaw yu ga a ni? Hkristu hte nang kanawn mazum ai kaw na pru ai akyu ni rai kun?
- Karai Kasang nang hpe mu mada ai lam hpe chye la sani? Ya nang du nga ai masa hta, Karai Kasang nang hpe kade daram manu shadan nga ai ngu ai hpe madun ya rit ngu nna hpyi u. Shi a matsan dum tsaw ra ai hte chyeju nang hpe madun shangun u. Shi madun dan ai chyeju ni hta shamyet shanat hkring sa la u.
Hpungdim hku nna:
Dinghpring ai hku asak hkrung ai gaw Karai Kasang manu shadan ai “Manu dan ai lam” rai nga ai. Dai Karai Kasang manu shadan ai hpe “ding-yang” hkan galaw ai rai yang she, anhte kadai re ngu ai hte shabung nna nga sa lu na rai nga ai; anhte byin gying ai ngu nna shadu ai lam ni hpe n hkan hkrup kau na rai nga ai.
Karai Kasang anhte hpe yu ai, mu ai hte maren anhte nga sa ga yang she, Shi a kasha ni a mauhpa manu dan ai lam ni hpe anhte mu chye la na ga ai.
Na a dinghpring ai hpe na a shinggan de dan dawn ai lam ni hta grau manu shadan chye nna, na a prat mung prat dingnawng lai shai mat nu ga.
Sumsing Lamu na Na a Kawa Karai a lai shai mat ai lam n nga ai tsaw ra ai hta lawt lu ai lam hte ba shamai la ai lam hpe hkam la lu nu ga.
By: Cardinal Charles Bo
