Daini na madu a kabu gara shiga hta, nanhte galaw sa ai lam shagu gaw, Karai Kasang a hpung shingkang a matu rai u ga nga nna, Kasa Paulu n`gun jaw da nga ai. Daini kasa Yawhan a chyum laika hta Madu Yesu gaw, madu a hpung shingkang dan hkung u ga matu yu sa wa ai hte, Madu Yesu gaw Karai Kasang a kasha majing re ai hpe hkap la kam sham ai ni yawng hpe n htum n wai ai asak lu na re ai lam hpe ga sadi jaw da sai.
Kawa Karai Kasang gaw kasha Karai Kasang hpe ndai mungkan ga de yu sa shangun dat ai lam madung gaw, kawa Karai Kasang gaw shinggyim masha ni a ntsa tawn da ai jet ai tsawra myit hpe, shi a kasha a marang e masha yawng mayawng chye chyang hkap la wa lu nna, Madu Yesu hpe tut nawng dinggrin shagrau sha a shakawng kungdawn lu na matu re.
Ya daini Madu Yesu gaw, shi a kasa ni a matu, tinang a kaja dik ai arawn alai ni hpe kaja wa nan hkan sa na matu, shada da kahkyin gumdin nga sa na matu, yawng mung shim lum ai hku nga sa lu na matu, Karai Kasang kaw kyu hpyi ya ai. Anhte yawng mung Madu Yesu zawn lam sahgu hta, Karai Kasang kaw kam sham kam hpa let, shi Madu Karai a mungdan a matu tut e shakut sa nga ga law.
