Daini na Ja Chyum Mungga hpe hti sumru yu ai shaloi e, Madu Yesu a majaw Karai Kasang hpe hkap la kam sham ai ni yawng hte gaw myit mang langai sha jawm pawng nga na matu, daini na ja chyum mungga hta Madu Yesu hpe kawa Karai Kasang hkum nan shangun dat ai lam rai nga ai. Ndai mungkan ga kaw, hkap la kam sham wa u ga ngu, kasa ni a matu akyu hpyi ya sai rai nga ai.
Shingrai Kawa Karai Kasang shinggyim masha ni a ntsa tawn da ai, kaba la ai tsawra myit hpe, Madu Yesu a jaw e sakse hkam sai hte maren, kasa ni hte Karai a sasana magam gun ai ni yawng hte hpe mung, Karai Kasang a jet ai tsawra myit hpe anhte tinang a kaja ai arawn alai kasi ningli ni hte sakse hkam let, ndai mungkan ga hpe shatsawm shahtap ya ra nga ga ai re.
Shingrai anhte yawng mung n bung hkat ai myit sat lawat ni, myit sawn sumru dinglik ai machye machyang ningmu ni, htung hking maka kumla ni, sat lawat gin lam ni yawng nga nga taw ga ai raitim, atai masum rawng ai langai sha re ai Karai Kasang kaw prat masa bung ai shinggyim masha langai mi rai nga ga ai majaw, kaja ai hpe mu mada chye ai hte kahkyin gumdin ai hte nga pra sa lu hkra shakut shaja sa let, Karai Kasang gaw, anhte shinggyim masha ni a ntsa e tawn da ai tsawra shawang myit hpe anhte hku nna, htawn tsun sakse hkam sa wa ga law.