(FEAST OF THE PENTECOST), 2025
CHYOI PRA WENYI YU HKRAT WA AI POI, C SHANING
(FEAST OF THE PENTECOST), 2025
Zahte langai gaw, sut gan law law sum mat ai hta; jinghku sum ai yang gaw, grau nna sum mat nga ai; rai ti mung, shi a wenyi sum mat yang gaw, yawng hpe sum mat ai wa rai nga ai– Spanish maxim
Myihtoi Ezekela gaw hkraw tsam mat ai Nrut nra (Dry Bones) ni hte hpring ai krung hkaraw hpe shingran mu ai. Karai Kasang gaw shi hpe hkraw tsam mat sai nrut nra ni hte hpring ai hkaraw de woi sa nna, “Si chye ai wa e, ndai nrut nra ni hkrung nga lu na kun?” Shi gaw, “Madu Karai Kasang e, nang chye nga ndai,” ngu nna htan lai wa ai. Dai hpang Karai Kasang gaw myihtoi wa hpe dai nrut nra ni hpe Karai Kasang a mungga tsun dan na matu tsun lai wa ai, dai nrut nra ni gaw shan hte hkayawp pawng nna masha wunawng wuwa kaba langai mi byin wa ai. Raitim, shanhte hta wenyi (sh) nsa n nga ai majaw, n-gun n rawng ai zawn rai nga ai. Dai hpang Karai Kasang a Wenyi gaw shanhte hpe nsoi nsa gawut jaw bang ya ai majaw shanhte gaw n-gun ja ai hpyen hpung tai wa ma ai.
Karai Kasang gaw myihtoi wa hpe tsun ai gaw, dai hkraw tsam mat sai nrut nra ni gaw Israela amyu ting a hkrang rai nga ai hte shanhte gaw dai nrut nra ni zawn si mat nna akyu nrawng sai ngu shadu tim Karai Kasang gaw myihtoi wa hku nna shanhte hpe Karai Kasang a Wenyi hku nna bai hkrung sharawt rawt la nna n-gun atsam jaw na lam ga sadi jaw da lai wa ai..
Daini e anhte gaw PENTECOST poi hpe galaw nga ga ai. Ga Shaka dingsa prat hta Pentecost poi gaw Israela ni Egutu kaw na pru wa ai (Passover) hpang manga shi ya shani hta Mawshe hpe jep ai tara jaw ai poi rai nga ai (Pru 19-20). Ndai ga shaka prat ningnan hta, Pentecost poi gaw, Yesu si ai kaw na bai hkrung rawt ai manga shi ya hpring ai nhtoi shani hta, sape ni a ntsa e Chyoi Pra ai Wenyi yu hkrat wa ai poi hpe galaw ai rai nga ai. Yesu Sumsing lamu de lung mat wa nna shi ya na ai hpang, sape marai latsa hkun gaw, nta ntsa gawk hta zuphpawng nga ai shaloi, Chyoi Pra ai Wenyi shanhte a ntsa de du sa wa ai. Israela tara hku nga yang, tara nawku daw jau ai zuphpawng langai a matu, latsa hkun ngu ai jahpan rai nga ai. Shingrai, Ntsa gawk hta zuphpawng nga ai sape marai latsa hkun gaw, kaja dik htum nawku dawjau ai ni rai nga ai.
Yuda masha ni hta PENTECOST poi hpe ‘Shawng nnan na asi si ai nhtoi’ ngu nna mung tsun ma ai (Bu Hkawm 28:26). Mying hta lawm ai hte maren ‘Shawng nnan na asi’ poi hpe galaw ai rai nga ai. Shawng nnan na Hkai nmai ni pru wa ai ten June shata praw langai ya grup yin hta, galaw chye ma ai. Teng sha dan la ai aten hpe hpaw ya ai. Karai Kasang a lajang ya ai hte, Pentekoti nhtoi hta, Nawku hpung – shawng nnan na asi, shangai ya sai. Shing rai Pentecost poi gaw Karai Kasang a nawku hpung nnan shangai shaprat hpang wa ai aten rai nga ai.
Chyoipra ai Wenyi gaw Yesu a hpyi garum ya ai a marang e sape ni a ntsa yu hkrat wa ai rai nna, Shi hpe aten kadun laman a matu sha shangun dat ai n rai nga ai.. anhte hte rau htani htana nga nga na matu shangun dat ai wa rai nga ai. Chyoi Pra ai Wenyi a atsam gaw daini du hkra anhte hte rau nga nga ai. Shi gaw hkrit kajawng nga ai Yesu a sape ni hta nden marai hte kam sham myit hpe shangang ya nna, hkrit tsang nga ai masha uhpung kaw nna, hkrit tsang ai lam n nga ai kabu gara shiga hkaw tsun ai ni de galai shai wa shangun ai.. Wenyi mung, dai ni du hkra, anhte hpe bai hkrung sharawt ya na matu, n-gun jaw na matu, anhte a lapran hta nga nga ai.Pentekoti shani hta Chyoi Pra ai Wenyi gaw sape ni a ntsa e kumla lahkawng hku nna du sa ai – nbung laru kaba a nsen hte wan shinglet ni hku nna du sa wa ai. Ndai kumla lahkawng hpe myit jung ai lam gaw, Chyoi Pra ai Wenyi hpe kam hpa ai lam grau grau jat wa u ga.
1) Nbung .
Yesu a sape marai 120 gaw, PENTECOST poi shani hta, Ntsa gawk hta zuphpawng nga ma ai shaloi, sumsing lamu kaw nna nbung laru kaba a nsen pru wa nna, shanhte dung nga ai nta ting hpe hpring chyat shangun nna, Chyoi Pra ai Wenyi gaw, wan shinglet hku nna, shanhte a ntsa de yu hkrat wa ai.
Hebre ga hku nbung hte wenyi ngu ai ga si gaw maren sha rai nga ai. Nbung gaw Karai Kasang zawn n mu lu ai, ethereal hte mau hpa re majaw Karai Kasang hpe kumla shatai ya ai. Nbung gaw Chyoi pra ai Wenyi a kumla rai nga ai. Ga Shaka Dingsa hta law law lang Karai Kasang gaw nbung (sh) nsa hku nna shi hkum shi hpaw shadan dan lai wa ai. Myihtoi Ezekela a hkyet mat sai nrut nra ni a shingran kaba hta Karai Kasang gaw shi a nsa hku nna nrut nra ni hpe asak jaw ya ai. Karai Kasang mungkan hpe tara rap ra ai hku uphkang ai lam hpe Yoba san ai shaloi, nbung laru hku nna htai ya lai wa ai. PENTECOST poi shani hta, lamu de na nbung laru kaba a nsen pru nna, sape ni dung nga ai nta ting hpe hpring chyat mat ai. Karai Kasang gaw nbung nsen hpe lang nna shanhte hpe hkrit kajawng shangun nna, du wa na mabyin masa a matu hkyen lajang ya ai. Dai gaw sumsing lamu de na nbung, Karai Kasang a nbung rai nga ai; dingdung maga de na, dingda maga de na nbung n rai. Ndai nbung gaw shanhte hpe jahten sharun na matu n re ai sha, shanhte hpe n-gun jaw na matu shangun dat ai mahtang rai nga ai. Charles Spurgeon tsun ai gaw, “Ndai kumla a lachyum gaw, nsa, nbung,, gaw shinggyim masha a asak rai nga ai zawn, Karai Kasang a Wenyi mung wenyi lam yan masha a asak rai nga ai. Shi a marang e anhte gaw shawng nnan hta hkrung rawt hkrum ai; Shi a marang e anhte hpe hpang de hkrung nga shangun hkrum ai; Shi a marang e kata na asak gaw shinggyim masha a hkum hkrang hpe hkum tsup hkra galaw ya ai.
2) Wan Hkru
Chyoi Pra ai Wenyi gaw sape ni a ntsa de wan shinglet hku nna yu hkrat wa ai. Wan mung, Chyoi Pra ai Wenyi a kumla rai nga ai. Mawshe gaw Karai Kasang hpe wan hkru ai hpun hta mu ai. Karai Kasang gaw shani aten hta sumwi shadaw hte, shana aten hta wan shadaw hte Sum ntsa e Shi a nga nga ai lam hpe madun dan ai. Elia gaw tawn hkungri langai mi hpe gawgap nna, dai hta hkungga nawng jau na matu hkyen lajang ai shaloi, Karai Kasang gaw sumsing lamu kaw nna wan hte hkungga hpe nat kau ai hku nna Shi a nga nga ai lam hpe madun dan lai wa ai.. Shawlumon gaw Nawku Htingnu hpe gawgap ai shaloi, Karai Kasang gaw hkungga hpe wan hte nat kau ai hku nna, dai hpe chyoi pra shangun ya ai. Karai Kasang gaw hkru ai wan rai nga ai.
Wan gaw Chyoi Pra ai Wenyi a hkrang bung sumla rai nga ai. Chyoi Pra ai Wenyi gaw sape ni a ntsa e wan shinglet hku nna yu hkrat wa ai shaloi, wan gaw shanhte hpe n hkru kau ai sha, shanhte hpe n-gun ja shangun wa ai; dai gaw shanhte hpe n jahten kau ai sha, Kabu Gara Shiga hkaw tsun ai kasa kaba ni tai wa hkra gawgap ya nga ai.Wan gaw asak jaw ya ai zawn, Chyoi Pra ai Wenyi mung sape ni hpe asak nnan jaw ya ai. Hkrit tsang ai majaw si mat sai shanhte gaw, Chyoi Pra ai Wenyi a shanu nga ai majaw, ya hkrung wa sai. Wan nhtoi jaw ai zawn, Chyoi pra ai Wenyi gaw sape ni hpe jahtoi ya ai. Shi gaw shanhte a Sara tai wa nna, tengman ai lam yawng hpe woi madun ai. Sape ni gaw shanhte a aten hta Israela hte mungkan ting a sara ni hte hkaw tsun sara ni tai wa ma ai. Wan gaw asak hte nhtoi hpe jaw ya ai sha n-ga, myit rawt ai lam hpe mung jaw ya nga ai. Hkap la ai wa hpe n-gun ja shangun ai. Dai hte maren, Chyoi Pra ai Wenyi gaw sape ni a myit masin hpe wan shatu ya ai. Pentikoti poi ngut ai hpang, shanhte a myit masin gaw Yesu hte Shi a tsawra myit a matu wan hkru nga ai. Shanhte gaw tsawra myit hte Hkristu a shiga hpe shara shagu de myit rawt let hkaw tsun lai wa ai.
Hkristu Yesu hta tsawra ai hpunau nauna ni e, PENTECOST poi hpe galaw nga ai ten, anhte a myit masin ni, hkyet mat sai nrut nra ni zawn, Hkristu a tsawra myit hte wan hkru wa nna, Hkristu a Kabu Gara Shiga hpe amyu bawsang shagu hta hkaw tsun lu na matu, Madu anhte hpe Chyoi Pra ai Wenyi hte kalang bai jahpring ya na matu akyu hpyi nga ga.
Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw chyoi pra wenyi yu hkrat wa ai poi pentecost lanban rai nga ai
Hti Ang Ai Chyum Laika Ni Gaw –
Chyum Mungga Daw ( I ) Kasa Laika – 2: 1-11
Chyum Mungga Daw ( II ) Shr 1Kor 12: 3-7 12-13
Kabu Gara Shiga – Yawhan- 20: 19-23
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law