Kahtawlik Nawku Hpung Myitkyina Saradaw Sasana sagurem wa, Wa Saradaw John Mung Ngawn La Sam gaw May shata 8 ya, Chyoi pra ai wenyi yu hkrat wa ai laban shani Tanghpre jau ginwang de sa du kawan nna Aung Min ta mare na Sumsing lamu a hkawhkam jan nawku jawng hta hpung masha ni hta laban missa hkungga nawng ya lai wa sai.
Tanghpre jau ginwang de shawng ningnan lang du sa wa ai Wa Saradaw hpe ginwang up Wa Jau Lucas Layen Dau Hkawng hte nawku hpung masha ni mung nawku hpung dawnghkawn ni lang nna wunpawng madum sumpyi ni hte kabu gara hkap tau hkalum la lai wa ma ai.
Wa Saradaw mung shi hpe kumhpa sak jaw ai, mani sum sai rai hkalum la ai, wunhpung htunghking shat lit shat ka, nhtu nhpye n-gang ni hte rai kabu gara hkap tau hkalum la ai majaw kabu chyeju dum ai lam tsun ai.
Ya na zawn n ging n dan ai raitim shi hpe hkap tau hkalum la ai gaw Karai Kasang a chyeju nanhte a ntsa e yu hkrat wa na matu Karai Kasang gaw ngai hpe nanhte hpang de shangun dat ai re. Tanghpre jau ginwang na hpung masha ni n’gun mi alu rai nna sa du lawm ai majaw n dang tsun hkra chyeju dum ai. Ndai zawn rai yak hkak ai ten hta e anhte shada da myit hkrum mang rum let grau akyu hpyi nna grau shakut sa ai rai yang anhte a yak hkak ai lam ni gaw Karai Kasang a shaman chyeju byin tai wa na re.
Daini ngai hpe hkap tau hkalum la ai a marang e nanhte myit ai, mang ai, galaw sa wa ai lam shagu awng dang wa na re. Karai Kasang ndang di lu ai lam hpa n nga ai, grau yak ai aten hta grau tinang ra ai hpe hpyi la ga. Karai Kasang gaw anhte hte rau nga ai, myit n htum ga.
Tanghpre jau ginwang hta 2024 ning jahpan the maren nawku hpung masha ( 469 ) hte Sara gaiwang kahtawng ( 15 ) daram nga ai lam ginwang up wa jau tsun ai kaw na chye lu ai.
