(SOLEMNITY OF THE MOST HOLY TRINITY),2025

CHYOI PRA AI TRINITY POI, C SHANING

(SOLEMNITY OF THE MOST HOLY TRINITY)

Leo Tolstoy gaw, Rasha mare masha ni a byin nga ai masa hpe ‘The Three Hermits’ ngu ai maumwi laiak buk  hpe ka lai wa ai. dai laika buk hta Saradaw langai mi gaw, masha marai masum shanhte a wenyi hkye hkrang la ai lam a matu,  tara shadik let nga ai, katsi katsang re ai zunlawng kaji  langai mi de sa du gawan lai wa ai. Dai hermit masum gaw asak latsa jan nna grai dingla sai ni rai nga ai. Law malawng gaw, shanhte atsin sha nga nna, langai hte langai pyi ga loi li sha tsun shaga hkat ma ai.

“nanhte a wenyi hpe hkye la na matu hpa galaw nga ai ..Ngai hpe tsun dan rit,” nga nna saradaw gaw,tsun lai wa ai “, ndai zunlawng hta Karai Kasang hpe gara hku nawku daw jau nga ai kun,” nga nna mung san lai wa ai. shanhte hta na Asak kaba dik ai wa gaw, “Anhte shada da karum shingtau hkat rai dai hku nna akyu hpyi ga ai: Masum gaw Nang, Masum gaw anhte, anhte hpe matsan dum la mi,” ngu nna hpyi ga ai. Dai shaloi Saradaw gaw mani sum rai nanhte gaw chyoi pra ai trinity a lam hpe  na yu sai. raitim nanhte a akyu hpyi ai ladat gaw njaw nga ai. ngai nanhte hpe sharin ya na ngu nna tsun lai wa ai.

Saradaw kawn, Karai Kasang gaw masha ni hpe gara hku hpaw shadan dan ai lam hte, Kawa Karai Kasang, Kasha Karai Kasang, Chyoi Pra ai Wenyi Karai Kasang a lam ni hpe atsawm bai tsun dan lai wa ai. Shi tsun ai gaw, “Karai Kasang a Kasha gaw shinggyim masha ni hpe hkye la na matu mungkan ga de yu sa wa nna, ndai hku nna anhte yawng hpe akyu hpyi na matu sharin ya lai wa ai. Ngai a hpang e madat nna bai hkan tsun u: ‘Anhte a Wa e,’ ngu ai hpe langai hte langai bai hkan tsun nna, Saradaw gaw ‘Sumsing lamu hta nga ai annhte Wa’ ngu nna matut tsun ai hte, chyoi pra ai masha ni gaw dai hpe bai tsun ai. Raitim, akyu hpyi ga gaw galu taw ai majaw hpring zup hkra n lu hkan tsun ai. bai nkau gasi hpe njaw hku hkan tsun ai majaw saradaw gaw sharai ya lai wa ai. shana de du wa ai shaloi, grai yak hkak ai hku nna, dai kyu hpyi ga hpe sharin la lu ma ai.

Nsin sin wa sai majaw, saradaw gaw hkring sa la na matu shanhte kaw na le pru wa ai. Shi gaw dai hermit marai masum hpe tawn kau da ai shaloi, shanhte gaw Madu a akyu hpyi ga hpe rau hti nga ai hpe Saradaw gaw tsan ai kawn naw na lu nga ai. Dai hpang, sanghpaw li hta jawn nhtawm pru mat wa ai. Raitim, Saradaw gaw, nsin kata e gau ngwi ngwi rai tsan mat wa ai zunlawng kaji hpe naw yu nga ai. Kade nna yang, akajawng sha, saradaw gaw, hka ntsa e hpraw tu ai hte gat hkawm ai,  hermit masum gaw wanhkut nsam hte nhkamun galu re ai ni gat hkawm ai hpe mu dat ai. sanghpaw li n shamu shamawt ai zawn, sanghpaw li de lawan ai hku ni  sit sa wa ai,.minit mi daram hta grai tsan ai nga tim ya gaw grai ni wa ai. Shanhte dum chye wa ai aten hta, chyoi pra ai masha masum gaw sanghpaw li ntsa kaw du nga sai re..

Chyoi pra ai masha masum yawng gaw nsen langai sha hte tsun hpang wa ma ai gaw “Karai Kasang a mayam wa e, na a sharin achyin ai lam hpe anhte malap kau saga ai. Anhte gaw dai bai kahtap tsun ai aten du hkra dum nga ga ai, rai tim aten kadun laman tsun ai hpe jahkring kau ai shaloi, bai ga si langai mi hpe malap kau ai majaw  ya gaw yawng hkra n matsing mat sai. Anhte hpe bai sharin ya rit.” tsun lai wa ai. bai nna saradaw gaw dai salang ni a man e hkungga jaw gum dagup nna shanhte mung kayin rai nammukdara wora hkran de bai nhtang wa mat ai. shanhte hpe n mu mat tim dai shara hta  jahpawt nhtoi ten du hkra  nhtoi langai gaw naw htoi tu let  nga nga ai.

Dai ni anhte gaw Chyoi pra ai Trinita poi hpe galaw nga ga ai. Karai Kasang gaw langai sha rai nga ai, rai tim, Masha marai Masum  – Kawa, Kasha hte Chyoi Pra ai Wenyi gaw atai langai sha rai nga ai. dai lam gaw sawk sagawn nna chye na na matu makoi magap da ai lam n re kam sham ra ai mungsung lam mahtang rai nga ai. Karai Kasang a shingra tara gaw sung nna chye na hkawn hkrang na matu yak ai..san augustine gaw Shi a kungkyang ai lam hte sumshi ning tup myit sumru let, Chyoi Pra ai Trinita a mungsung lam hpe laika buk shi manga ka lai wa ai raitim marai masum atai langai karai kasang a lam hpe shi asan sha n lu tsun dan lai wa ai.

Shi akyu hpyi ai gaw, “Madu karai kasang e Anhte galoi mung myit yu ra ai, rai ti mung, anhte atsawm nlu myit mang lu ga ai.. kaning re ai ga si ni hte mung n lu tsun shapraw dan n lu ai, ngai a myit da lam hpe chye na na matu hte , ngai hpe karum shingtau lam  jaw ya rit, ngai a shut hpyit mara hpe mung raw ya rit.” ngu nna akyu hpyi lai wa ai..

Chyoi Pra ai Trinita a sharin achyin ya ai lam gaw Hkristan makam masham a sharin achyin ai lam yawng hta grau kaba ai sharin achyin ai lam rai nga ai. Hkristan makam masham a npawt nhpang mung rai nga ai. Ga Shaka Ningnan kaw na Kawa, Kasha hte Chyoi Pra ai Wenyi ngu ai marai masum atai langai karai kasang hpe  shaw kau yang, dai kaw Karai Kasang ngu ai  n ngam nga sai. Karai Kasang a Triune nature gaw, Hkristan makam masham a npawt nhpang yawng hpe madi shadaw ya sharin achyin ya ai lam rai nga. ai. shiggyim hkum hkrang hpe dagraw la ai  n-htum n-wai matsan dum lama ai chyeju gaw ndai sharin achyin ya ai hta madung lam langai rai nga ai.

Chyoi Pra ai Trinita hpe kam sham ai lam hpe asan sha madun dan ai lam langai gaw, Udang kumla rai nga ai.  kahhtawlik  Hkristan hte wenyi lam yan magam bungli shagu gaw Udang masat hte hpang nna ngut kre yang mung galaw ai rai nga ai. Dai ni ndai Hkristan Lamik kumla kaba a lachyum hpe chye na hkra shakut hkra ja ra ai..

 Udang a kumla

 Udang masat gaw galaw ai hkrang sha n rai, makam masham hpe tsun shapraw ai lam mung rai nga ai. Ndai zawn masat galaw ai hta anhte hpe hkye hkrang la ai kumla – Udang hpe galaw ai sha n-ga, Chyoi Pra ai Trinita hpe sung sung kam sham ai lam hpe mung madun dan ai lam rai nga ai. Ndai Kumla hte nan, moi na Hkristan ni gaw yak hkak ai aten hta raitim, n-gun atsam lu la ma ai.

Tsaban lahkawng hta ka da lai wa ai Tertullian gaw, Hkristan ni gaw yup rawt wa ai shaloi, bu hpun sumli nga ai shaloi, bungli galaw maw ai shaloi  nta de shang wa ai shaloi, hka shin na matu sa wa ai shaloi, sha ku kaw dung ai shaloi, shanhte a pyengdin ni hpe shachyi ai shaloi, ba da zawn galaw ai lam shagu a shawng nnan hta, Udang masat hpe galaw ai lam sakse hkam da lai wa ai.”

 1) Udang  Kumla masat ai lam lahkawng nga ai.

(a) Mini-Sign hku masat ai udang kumla: Npawt nhpang hte moi prat na . Udang a kumla gaw Mini-Cross rai nna, dai hpe bawnu, n-gup nten hte sinda ntsa hta udang masat hpe lata layung hte masat galaw ai.

(b) Large- hku masat ai Udang Kumla: Anhte gaw, bawnu kaw nna, sinda de bai. masat yu wa nna, lahpa pai hkra de bai masat galaw  nna, shaman hkam la ai llam rai nga a., Udang masat kumla kaba hpe hpang wa ai. Ndai htung lailen gaw galoi aten kaw nna hpang wa ai hpe anhte hkrak n chye lu ai .ndai Udang masat kuma kaba hpe shawng nnan e, tsaban mali na Arian ni a ndang kalang byin hkkat ai aten kaw nna, Jau ni hku nna, tara shang shaman  jai lang hpang wa nna, hpang e, yu maya hpung masha ni mung hkap la jai lang wa ai re hpe sawn lu ga ai.

2) Wudang kumla a lachyum

Udang masat kumla kaba gaw kumla ni hte hpring tsup nga ai. Hkristu gaw mungkan masha ni hpe hkye hkrang la na matu du sa ai shaloi, Kawa kaw na yu hkrat wa nna, Nu Maria a hkritung kaw nna shangai wa ai, udang hta si hkam ai, lup makoi hkrum ai hte si ai ni kaw na bai hkrung rawt wa nna sumsing lamu de lung wa nna Kawa a hkra maga e hkaw dung nga ai. Shing rai Udang masat Kumla hpe galaw ai shaloi, hkra lata hte galaw ai gaw Kawa a hkra maga de dung nga ai Hkristu hpe kumla shatai ya ai. Dai hpang lawu na sinda de masat yu hkrat wa ai gaw Hkristu a Hkum hkrang dagraw la ai lam hpe kumla shatai ya ai, hpa majaw nga yang Hkristu gaw Kawa hte sumsing lamu kaw nna yu hkrat wa nna, Chyoi Pra ai Wenyi a atsam hte Nu Maria a hkritung hta shinggyim hkum hkrang hpe dagraw la ai.

Roman kahtawlik  hte sinna Nawku hpung ni hta, langai mi gaw laha  pai maga de sa nna lahpa hkra maga de, Udang masat kumla hpe  galaw shangut ai. Ndai mabyin hta pai maga gaw si hkrung si htan hte shanhte gaw nsin hte matut mahkai nga ai rai nna, hkra maga gaw tengman ai lam hte nhtoi hpe kumla shatai ya ai. Shing rai ndai zawn galaw ai lam gaw, tsin-yam tsindam kaw nna hpung shingkang de, si ai kaw nna asak de, ngarai kaw nna sumsing lamu de galai shai wa ai hpe madi madun nga ai.

Hkristu gaw si ai kaw nna asak de lai mat nna Kawa a hkra maga de (dingdung kaw nna pai de) dung nga ai zawn, anhte mung Chyoi Pra ai Wenyi a jasan jaseng ya ai a marang e Hkristu hta  asak hktung lu na re..

Anhte gaw galoi mung Kawa Kasha Chyoi pra ai wenyi a mying sang hte Udang masat kumla hpe hkungga lara ai hte galaw nna shaman chyeju ni hpe hkam la lu myit ga. Kawa, Kasha, Chyoi Pra ai Wenyi a mying ningsang hta. Amen

Akyu hpyi saga oh hpan madu  karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.

Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw chyoi pra ai Trinity poi lanban rai nga ai hti ang ai ja chyum mungga ni gaw chyum mungga daw langai .Gsha  laika 8: 22-31 chyum mungga daw lahkawng Rm 5: 1-5 kabu gara shiga yawhan 16: 12-15

Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law