Daini na myit sumru lamang a Ga-baw hpe “Karai Kasang hpe Chye Madat Ai Lam” ngu nna matsing da ga. Daini, Karai Kasang anhte hpe jaw da sai –hpring tsup ai chyeju ni hta na, “Karai Kasang hpe chye madat ai” ngu ai hpe chyum laika hta kaning nga tsun da ai kun jawm sagawn yu ga.

Dai kaw nna, “chye madat ai” ngu ai hte Karai Kasang hte “hkrum katut ai” lam matut mahkai nga ai hpe matut hka ja yu ga.  Karai Kasang a tsawm htap ai lam langai mi gaw  nang shi hte rau hkawm sa ai lam hta gara madang kaw du nga sai rai tim, shi gaw dai hta grau naw jan nga ai.

Shakawn Kungdawn Laika 145:18 hta, “Madu Karai Kasang gaw shi hpe shaga ai ni nlang hte hte, sadi sahka hte shi hpe shaga ai ni nlang hte hte , ni nga ai” nga nna ka da nga ai.

Anhte kam sham ai ni malawng gaw, “chye madat ai” hte “hkrum kadup ai” lam gaw shada n matut hkat ai ngu nna sawn la nga ma ai. “Karai hpaji hka ja ai” hte “wenyi sak hkrung lam mahkrun” gaw kaga ga rai nna, langai hte langai garum hkat ai rai yang pyi, Karai Kasang hpe hkan tam ai amu hta gaw rau myit hkrum galaw ai lam gaw n nga ai, ngu nna chye madat da nga ma ai.

Ta-tut hta, ndai lahkawng gaw, marun hku nna shada hkri noi nga ma ai re.  Langai mi n nga yang, kaga langai mi mung n nga lu ai.  Karai Kasang hte hkrum kadup ai ngu ai gaw, shi a lam chye madat na matu rai nna; Shi hpe chye madat na matu mung shi hte hkrum katut ra nga ai. De a majaw, Madu Yesu, Yawhan 4:23-24 hta tsun ai,

“Tengman ai hku nawku ai ni gaw, wenyi hta mung, tengman ai hta mung, Wa hpe nawku na aten gaw du wa ra ai rai nna, ya e pyi rai nga ai: Wa gaw shing rai nawku ai ni hpe tam nga ai. 

Karai Kasang gaw, Wenyi rai nga ai: shi hpe nawku ai ni gaw, wenyi hta mung, tengman ai hta mung, nawku lu na rai nga ai”.

Karai Kasang gaw, anhte shi hpe wenyi hte tengman ai hta, “mahkrum madup” hte mung “chye madat ai” hku nna mung chye la na hpe sharawng nga ai. Masha langai mi hpe, shi a lam ka tawn ai laika buk hpe sha hti nna hkrak n chye lu nga ai; hpa majaw nga yang, shi hte n hkrum yu ai, rau n nga yu ai. 

Chyum laika ni gaw, anhte Karai Kasang hte kaja wa rau hkrum katut lu hkra, shi a lam “chye madat na matu lam madun ya ai” rai nga ai.  De a ga si ni gaw, dai ga si ni hpe ka da ai Karai Kasang hpang de woi sa ai lam maw kaba rai nga ai.  Shi a lam, shi hpe grau grau chye wa lu hkra anhte shakut shaja ga ai rai yang, dai chyum laika ga-si ni gaw anhte a matu manu dawdan n lu ai ru pawt ni tai wa ai.

Karai Kasang a lam hpe anhte “chye la ai hpang”, grau sung ai daw rai nga ai “hkumnan hkrum zup ai” de sa wa ga ai.Shkawn Kungdawn 145:48 hta, “Madu Karai Kasang gaw shi hpe shaga ai ni nlang hte hte, sadi sahka hte shi hpe shaga ai ni nlang hte hte, ni nga ai” nga nna rawng nga ai.

Esaiah 26:3 hta mung tsun ai, “Myit maju jung ai wa gaw, nang hta shamyet shanat nga ai majaw, nang ban sa nga shangun wu ai”.

Madu Yesu mung, Mahte 22:37 hta, “Dai Madu, na a Karai Kasang hpe, na a myit kraw lawang mahkra hte, na a myit masin mahkra hte, na myit mang mahkra hte nang tsaw ra lu na ndai” nga nna sharin ai. Dai majaw, Na a myit gaw, na a salum de sa ai chyinghka lam rai nga ai.  Nang, Karai Kasang a lam masu tsun ai rai yang, nang shi a lam hpe myit masin ma hkra hte, atsawm sha, shadang tup hkan tam sana n rai nga ai.

Chyum Laika hku nna ga sadi jaw da ai, Shi a mai kaja ai, sadi dung ai, ni htep ai lam ni hpe nang n chye ai rai yang, dai ni hpe jaw ya ai Karai kasang hpe kaja wa chye hkra mung nang shakut tam sana n rai nga ai. Karai Kasang gaw na a myit masin hpe shani shagu chyum laika hte bai gram na ra sharawng nga ai.  Chyoi Pra ai Wenyi mung, nang kam sham dawjau nga ai Karai Kasang hpe tup hkrak chye lu hkra chyum laika a lachyum ni hpe sang lang dan mayu nga ai.

Na a myit hpe nnan bai gram lajang na matu, nang myit hkut dawdan sai rai yang, “chye madat ai’ ngu ai kaw nna “mahkrum madup” ngu ai tsang de woi sa du ai lam maw hpe hpaw ya na ra ai. Shaloi, Shi a tsawra ai gaw, na a myit masin kaw nna, kadai n hkra lu ai, na a prat a hkraw hkun nga ai, hkyi ba hkrum nga ai shara ni de du mat wa na ra ai. Dai gaw, Madu Karai Kasang hte nang, tatut hkrum zup hkat ai rai sai.

Akyu hpyi sumru yu gaw:

1.  Karai Kasang hpe wenyi hte tengman ai hta nawku ai gaw ahkyak nga ai ngu ai hpe sumru yu ga.

Yawhan 4:23-24 hpe bai sumru yu ga,  “Tengman ai hku nawku ai ni gaw, wenyi hta mung, tengman ai hta mung, Wa hpe nawku na aten gaw du wa ra ai rai nna, ya e pyi rai nga ai: Wa gaw shing rai nawku ai ni hpe tam nga ai.  Karai Kasang gaw, Wenyi rai nga ai: shi hpe nawku ai ni gaw, wenyi hta mung, tengman ai hta mung, nawku lu na rai nga ai”

• “Karai Kasang a lam chye madat ai” ngu ai hte “Karai Kasang hte hkrum zup ai” ngu ai hpe, shan shada da n bung hkat ai zawn, kade lang sawn kau sata?

Ndai lahkawng yan hta na langai ngai hpe sha hkan nna rai dum kau sai kun?

• Karai Kasang hpe wenyi hte tengman ai hta hkan tam ai ngu ai gaw hpa rai kun ngu nna Chyoi Pra ai Wenyi hpe san u. 

“Chye madat ai” hte “mahkrum madup ” yan hpe rau kapyawn nna hkan shadik ai gaw kaning re ai hpe ngu ai rai kun ngu nna Karai Kasang hpe san yu u.Karai Kasang hta ban sa la nna, na a prat hkrun lam ting hta shi hpe atsawm chye na hkra shakut na ngu nna myit dawdan da u.

“Dai tengman ai Wenyi du sa jang, shi gaw tengman ai lam yawng mayawng nanhte hpe madun na ra ai: dai wa gaw shi a myit hte tsun na ra ai n rai; na la lu ai hte made, tsun dan na ra ai: htawm hpang de byin na ra ai lam mung, shi nanhte hpe tsun dan na ra ai” (Yawhan 16:13).

Hpang jahtum hku nna:

Wa Karai gaw, anhte a prat a jut shara shagu hpe hkye mawai na, gram lajang ya na matu shakut nga ai.  Anhe a wenyi, myinla (myit masin) hte hkumhkrang gaw shada n daw n hka rai nga ai; langai mi n rawt kaba yang, kaga yan mung n lu rawt galu kaba wa ai.

Anhte a chye na, chye madat ai lam gaw anhte a myit masin hte hkumhkram hpe hkra ai.  Anhte myit mang ai gaw, anhte a kraw lawang hta hkam sha ai hpe byin shangun nga ai.  Anhte a hkumhkrang gaw  anhte yawn ai hte kabu gara ai lam hpe hkam la ai a shara rai nga ai.  Anhte hta galai shai ai lam kaja wa byin pru na matu, anhte a prat man shagu hta shi a atsam kaba rawng ai tsawra ai hte bungli shabyin ya na matu hpyi ra ga ai. 

Anhte a prat hpe galai shai ya na matu Karai Kasang kaw hpyi ai hte maren, hpring tsup ai kabu gara chyeju hte, hkye hkrang la ai chyeju hpe hkam la lu myit ga law.

Yawng hpe Wa karai kasang shaman ya u ga. 

https://youtu.be/8zdpD4VpR1I

By – Cardinal Charles Bo