Daini na Ja Chyum Mungga hpe hti sum ru yu ai shaloi e, Hpyen wa hpe tsawra u ngu ai hpe na chye la lu ga ai. Anhte shinggyim masha ni law malaw gaw, tinang hte hku hkau ai ni hte tsun shaga ai shaloi e gaw, tsun jahta n ma hkra chye tsun nga ga ai n rai a ni? Raitim tinang hte n hkrum n ra ai ni hte, tinang a lam hpe n kaja ai, n jaw ai hku tsun jahpyak ya ai ni, tinang a sari hten mat hkra tsun ai ni, ta du hkra zai ai ladat matai htang galaw chye ai ni hpe gaw, tsan dik ai kaw na koi chye nga ga ai. Daini chyum laika hta, Madu Yesu gaw shi a kasa ni hpe gara hku tsun a ta nga yang, nanhte hpe tsawra ai ni, chyeju nga ai ni hpe bai tsawra chyeju htang ai rai yang, nanhte mung kaga maigan masha ni hte maren sha naw rai nga mi dai. Tara kanu n’nan rai nga ai tinang a hpyen wa hpe tsawra na tara n`nan hpe hkan sa na matu hpyi shawn nga ai. Tinang hte ni htep ai ni hpe tinang a hkum hte maren tsawra na matu rai nga ai. Dai tara gaw tsun na loi tim, hkan sa shatup na matu yak la nga ai. Dai majaw ndai tara hpe shi hkum nan hkaw tsun nna, hkum nan hkan sa ai Madu Yesu gaw, Udang ntsa hta shi hpe zingri sat ai ni a matu, kawa Karai Kasang kaw, Wa e shanhte n chye na shut ai mara a matu mara dat ya rit ngu hpyi shawn dat nga ai. Shingrai anhte mung Madu a kaja dik ai kasi hpe yu let, Madu Yesu zawn, mara dat ya let mungkan ga hpe shatsawm jahtap sa nga ga law.
