Daini na Ja Chyum Mungga hpe anhte hti sum ru yu ai shaloi e, Madu Yesu sharin ya ai akyu hpyi ga a lam na chye la lu ga ai. Madu Yesu kasa ni hpe akyu hpyi ai lam sharin ya ai zawn, anhte yawng hpe mung sharin ya ai rai nga ai. Akyu hpyi ai sahloi e, anhte hpyi la mayu ai lam hpe Karai Kasang gaw tau nau na chye da ai majaw, lachyum n nga ai, n ra ai ga shajan ni law law tsun nna hpyi ai zawn n galaw na matu ja ja tsun shadum da nga ai. Bai Madu Yesu hkum nan shi a kasa ni hpe madu a kyu hpyi ga hpe sharin ya sai re. Ndai kyu hpyi ga gaw, kasa ni kaw nna, anhte yawng a matu Madu Yesu tawn da ya ai langai sha re ai akyu hpyi ga nan rai nga ai majaw, yu maya kyu hpyi ga mung n re.
Sumsing lamu hta nga ai anhte a wa ngu shaga dat ai shaloi e, anhte yawng mung kawa Karai Kasang a kasha a kahpu kanau ni byin mat wa ai re. Kawa Karai Kasang kaw anhte shani shagu ra nga ai lu sha ni hpyi nna, anhte shut hpyit ai ni hpe anhte hkum kaw nna, mara raw dat ya yang she, mara hkyam sa ai lu na re lam hpe Madu Yesu gaw, madu a akyu hpyi ga hta nan sadi jaw da sai re. Shing rai Madu Yesu a hpang hkan ai anhte ni yawng mung Yesu hkum nan sharin ya sai madu a kyu hpyi ga hpe lachyum nga nga manu shadan hkungga la ra hpyi let, tinang hpe shut ai wa hpe jet ai myit hte mara raw ya let simsa lam hpe shabyin ya lu ai ni tai hkra sahkut sa nga ga law.