YESU A CHYOI PRA AI HKUM HTE SAI POI, C SHANING
(Feast of the Body and Blood of Christ)
YESU A CHYOI PRA AI HKUM HTE SAI POI, C SHANING
(Feast of the Body and Blood of Christ)
Hkristu hta tsawra hkungga ai nu wa hpu nau ni ndai laban gaw Madu Yesu a Hkum hte Sai poi laban nhtoi rai nga ai.
Scott Hahn gaw, moi e Protestant hpung a sasana magam hpe gun hpai lai wa ai sara kaba langai rai nga ai, ya aten hta mungkan ting hte seng ai Kahtawlik sasana a Karai masa ninghkring hte nawku hpung hpe makawp maga ai wa hku na nga ai wa mung rai nga ai. Shi a prat labau rai nga ai ‘Rome Sweet Home’ ngu ai laika buk hta Roman Kahtawlik makam masham de du wa ai hkrun lam hpe tsun sanglang tawn da ai.
Protestant sasana magam gun langai hku nna, Kahtawlik Nawku hpung a sharin achyin ai lam ni hte makam masham hte seng nna sharin achyin ai lam ni hta grai shut nga ai ngu nna galoi mung myit shawn da lai wa ai. Kalang mi hta shi gaw San Yawhan a Kabu Gara Shiga daw kaba (6) hta madu Yesu a hkum hte sai a lam hpe hkaw tsun na matu hkyen nga ai ten shi a hpang hkan nang ai masha nkau mi a nhkap la ai hpe mau hpa hku nna hkrum lai wa ai. shi gaw Yesu a Hkum hte Sai a lam tsun ai shaloi, kumla hku nna sha tsun ai ngu galoi mung sharin ya ai. Presbyterian hpung masha ni gaw, Chyoi Pra ai Hkum hta Yesu a kaja wa teng teng shanu ai lam n nga ai ngu kam sham ma ai.
Yesu tsun ai, “Ngai gaw sumsing lamu de nna yu wa ai hkrung ai muk rai nga nngai, muk ndai sha ai wa kadai mung htani htana hkrung nga na ra ai, mungkan ga a asak hkrung lam a matu ngai jaw na muk gaw nye a shan rai nga ai (6:51),” nga nna tsun ai shaloi, sape nkau mi gaw, “Ndai wa gaw anhte hpe shi a shan kaning rai jaw lu na rai ta?” nga nna tsun ndang hkat nga ai ten Yesu gaw, “Ngai nanhte hpe teng teng tsun made ga, Masha Kasha a ashan hpe nanhte n sha, shi a asai hpe n lu myit yang gaw, nanhte hta asak n rawng lu myit dai (6:53)” ngu nna bai tsun wu ai .”Dai Hpang e Shi gaw Yesu a Hkum hte Sai hte seng nna sharin achyin ya ai majaw, Shi a sape ni law law wa shi hpang hkan nang ai lam kaw nna hkring mat ai.
Scott Hahn gaw ndai hku tsun shadut ai: Yesu ga ( Protestant Nawku hpung ni sharin ya ai hte maren), kumla hku nna sha tsun ai rai yang, dai chye na shut ai sape ni hpe kalang ta shaga la nna, shading sharai ya na re. Raitim Shi dai hku galoi mung n galaw lai wa ai. Kaja wa nga yang, Shi a hkum shan hpe sha nna, Shi a asai hpe lu ai hku nna sha htani htana asak lu la na re ngu ai hpe yawhan a laika daw kaba 6 hta sha, kru lang hta n yawm ai sha, madi shadaw tsun da nga ai. Yesu gaw Chyoi Pra ai Hkum hta teng teng sha, npawt nhpang hku nna shanu nga ai. Ndai lam gaw, Chyoi Pra ai hkum hta Yesu Teng sha nga nga ai lam hte seng nna, Kahtawlik Nawku hpung a sharin achyin ai lam ni hpe Scott Hahn hpe kam sham shangun lai wa ai. Shi hpe 1986 ning paska poi shani hta catholic nawku hpung hta hkap la lai wa ai
Daini e anhte Madu a Manu dan dik ai Hkum hte Sai poi hpe galaw nga ga ai. dai gaw Chyoi pra ai Hkum poi nhtoi rai nga ai. Chyoi Pra ai Hkum hta, Yesu gaw teng teng sha, npawt nhpang hku nna nga nga ai. Shi a Tengman ai Hkrung nga ai lam hpe tsun ai shaloi, Yesu gaw, “Ngai gaw sumsing lamu de nna yu wa ai hkrung ai muk rai nga nngai. Ndai muk hpe sha ai wa gaw htani htana hkrung nga na ra ai (Yhn 6:51)” nga nna tsun ai. Dai ni, e Yesu hpe asak muk hku nna sumru lu na matu, Madu lam madun ya u ga, akyu hpyi nga ga.
1) Yesu gaw Karai Kasang A Muk Rai nga ai
Yesu gaw, “Ngai nanhte hpe teng teng tsun made ga, nanhte hpe sumsing lamu na muk jaw ai gaw Mawshe n rai, sumsing lamu na teng man ai muk nanhte hpe jaw ai gaw, nye Wa nan rai nga ai. Kaning rai nme law, Karai Kasang a muk gaw, sumsing lamu de na yu wa nna, mungkan ga hpe asak jaw ai muk rai nga ai (Yhn 6:32-33).” Bai nna Yesu gaw Shi gaw sumsing lamu kaw nna yu hkrat wa ai Muk re ai hpe madi madun da nga ai. Shi gaw Karai Kasang a Muk, Karai Kasang a hpung shingkang hte hpring ai Muk rai nga ai. Kawa gaw Yesu hpe chyoi pra ai daw sha poi hta Muk hku jaw ai; Shi gaw anhte a wenyi a matu lusha rai nga ai; Shi gaw Karai Kasang a dinghku a Muk, Shi a kashu kasha ni sha na Muk rai nga ai. Karai Kasang a Muk Yesu gaw sumsing lamu kaw nna yu wa sai. Karai Kasang hku nna, Sumsing lamu hta Shi a hkum hkrang nga ai. Bai yu hkrat wa ai shaloi, Karai Kasang a atsam hte yu hkrat wa ai.
2) Yesu gaw Hkrung Ai Muk Re
Yesu gaw, “Ngai gaw sumsing lamu de nna yu wa ai hkrung ai muk rai nga nngai (V. 51).” Muk gaw shingra tara masa hku shi hkum nan n hkrung lu ai arung arai langai mi rai nga ai. shinggyim hkum hkrang daw shan ni hku nna malu masha hpe sha bang ai hku sha n gun jaw bau maka lu ai. Raitim Hkristu gaw hkrung ai Muk rai nna Shi a atsam hte sha bau maka nga ai.
Manna muk gaw asak nrawng ai; Israela masha ni hpe shani shagu ra ai daram sha shinggyin la na matu matsun da ai, hpa majaw nga yang, lana mi hta jan nna tawn da yang, yet mat nna, katung kasha ni hpe shaprat wa shangun chye ai. Hkristu chyawm gaw, n hten n mat ai, n dingsa mat ai htani htana hkrung ai muk rai nga ai. Shi gaw galoi mung nnan, galoi mung hkrung nga ai hte galoi mung dingsa mat ai lam n nga ai.
3) Yesu gaw Asak Jaw Ai Muk Re
Wa Sarabyin Yawhan Pawlu II gaw chyoi pra Hkum hpe grai tsawra ai wa rai nga ai. maigan de hkawm sa ai hkrun lam langai mi hta, shi gaw “masha shagu a kawsi hpang gara ai lam hpe tinang a kan bau bungli (sh) kaga masha ni a gam jaw gam ya ai lam hku nna shadik shatup lu ai rai yang pyi, shinggyim masha ni a sung htum ai kawsi hpang gara lam gaw naw nga nga ai. Dai majaw, Hkristu hpang de sit sa wa ga. Shi gaw asak Muk rai nga ai.” Yesu gaw asak muk rai nna, wenyi lam sha n-ga, htani htana asak hpe mung jaw ya nga ai. Kalang mi hta shi tsun ai gaw, “Ngai gaw sumsing lamu de na yu wa ai hkrung ai muk rai nga nngai, ndai muk hpe sha ai wa kadai mung htani htana hkrung nga na ra ai (Yhn 6:51).”
Manna muk gaw hkum hkrang kawsi hpang gara ai hpe myit shadik ya nna, asak hpe madi shadaw ya ai raitim, asak hpe n grin lu shangun nga ai. Rai ti mung anhte a Manna muk rai nga ai Hkristu gaw yubak hta si mat sai ni hpe jahkrung ya nga ai. Bai nna, Shi hpe kam sham nna, tinang a Hkyela Madu hku hkap la ai ni yawng hpe dai asak hpe jaw ya nga ai. Karai Kasang a hkrung nga ai, asak jaw ya ai Muk rai nga ai Yesu hpe hkam la lu na matu, ndai chyoi pra ai missa tawn hkungri de galoi mung. man man sa du shang lawm nga ga..
Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw Yesu a chyoi pra ai hkum hte sai poi lanban rai nga ai
Hti Ang Ai Ja Chyum Mungga Ni Gaw –
Chyum Mungga Daw ( I ) ; Npt.Nhp : 14: 18- 20
Chyum Mungga Daw ( II ) Shr 1Kor 11: 23-26
Kabu Gara Shiga : Lk 9: 11-17
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law