Roma kaw nga ai San Yawhan Lateran Nawku Htingnu kaba hta, Wa Sarabyin Leo XIV gaw, Hkristu a Chyoi Pra Htum Ai Hkum hte Sai hpe shagrau ai Missa hkungga hpe woi awn nna, dai hpang, San Pra ai Nu Maria Major Nawku Htingnu de Chyoi pra ai Hkum hte Sai hpe hkungga jaw ai, Chyoipra hkum hpe hpai shinggrup hkawm ai lam galaw ai.

Wa Sarabyin gaw, Corpus Christi Laban shani na shi a mungga hta, Yesu a grup yin hta zuphpawng nga ai masha wunawng wuwa hpe sharin achyin ya ai hte machyi masha ni hpe shamai shatsai ya ai lam, Madu a matsan dum lama ai lam hpe madun dan ai hte, “anhte hpe hkye la na matu, mungkan ga de du sa ai, Karai Kasang a tsawra myit hte ni htep ai lam” hpe madun dan ai lam hpe bai myit dum shangun ai. Bai nna “Karai Kasang up hkang ai npu hta, anhte gaw n hkru n kaja ai lam yawng kaw na lawt lu sai,” nga nna sang lang dan ai. Bai nna, anhte ra kadawn nga ai aten ni hta, kawsi hpang gara ai aten hta rai tim, machyi makaw hkrum ai aten hta rai tim, anhte Mungkan prat htum mat ai aten hta rai tim, “Yesu gaw anhte a lapran e naw nga nga ai” ngu ai hpe dum na ahkyak nga ai. “Kaning rai nme law, Madu nga ai shara hta, anhte a prat hpe n-gun atsam hte prat a lachyum jaw na matu, ra kadawn ai lam yawng hpe lu la ga ai.

Garan gachyan ai kumla

Yesu gaw, lu ai hpe garan jaw nna, muk hte nga ni hpe law htam jat wa shangun ai lam hpe bai myit dum let, masha shagu gaw hkam ngut jang, ngam ai ka tawng shi lahkawng hpring ai hte, shanhte a kawsi hpang gara ai lam hkru kat lu na matu jaw ai lam hpe bai myit dum shangun ai. “Yesu gaw shawa masha ni a kawsi hpang gara ai hpe shadik ya ai: Karai Kasang galaw ai zawn, anhte hpe mung galaw na matu sharin ya nga ai.”

Daini na mungkan hta, “anhte a kawsi hpang gara ai lam sha n-ga, kaga masha ni a myit marin ai myit a majaw tsin-yam tsindam hkrum nga ai ni yawng hpe dum na matu ahkyak nga ai,” nga nna Wa Sarabyin tsun ai, masha nkau mi a sutgan kaw na byin pru wa chye ai matsan mayan lam hpe garan gachyan ai myit masin hte grai shai hkat ai hpe mu lu ai, dai gaw “hpa n sawn ai lam hpe shabyin ya ai gaw gumrawng gumtawng ai myit hte n tara ai lam rai nga ai “

“Grau nna ndai Jubilee Shaning hta, Madu a kasi gaw anhte a galaw sa wa ai lam ni hte magam bungli ni hpe lam madun ya ra ai, shadawn shadang langai mi rai nga ai: anhte lu ai muk hpe garan gachyan na matu, myit mada shara law htam wa hkra hte Karai Kasang a Mungdan du wa na hpe hkaw tsun na matu shaga la hkrum ga ai.”

Dai hpang Wa Sarabyin gaw, Yesu gaw masha shagu hpe si hkrung si htan kaw na hkye la ai asak muk, Eucharist sakramentu gaw anhte a makam masham kaba rai nga ai hpe myit dum ra ai. “Kaning rai nme law, kawsi hpang gara ai gaw ndai prat hta anhte a ra kadawn ai lam ni a kumla rai nga ai zawn, muk hpe ahkyep daw kau ai gaw Karai Kasang a hkye hkrang la ai kumhpa a kumla rai nga ai.”

“Tsawra ai hpu nau ni e, Hkristu gaw anhte shinggyim masha ni a kawsi hpang gara ai lam hpe Karai Kasang madun dan mahtai rai nga ai, hpa majaw nga yang shi a Hkum hkrang gaw htani htana asak a muk rai nga ai: Nanhte yawng ndai hpe la nna sha mu! Hkrung nga ai hte teng man ai Muk re ai Yesu hpe anhte hkam la ai shaloi, shi a matu anhte hkrung nga ga ai.”

Hkristu hte rau pawng hpawm ai

“Karai Kasang jaw ya ai malu masha hte n-gun atsam lu la let, Yesu hpe yawng a myit masin de woi sa wa ga, hpa majaw nga yang, Yesu gaw anhte langai hte langai hpe shi a sha ku hta dung na matu shaga la nna, shi a hkye hkrang la ai magam bungli hta masha shagu hpe shanglawm shangun nga ai. Shaga la hkrum ai ni gaw a lu ma ai, kaning rai nme law, shanhte gaw ndai tsawra myit a sakse ni tai wa ma ai!”