Daini na Ja Chyum Mungga hpe hti sumru yu ai shaloi e, Yawhan Baptista shangai wa ai lam hpe na chye lu ga ai. Anhte kahtawlik nawku hpung poi kaw e, ahkyak ai shangai poi n`htoi (3) nga ai. Dai gaw Madu Yesu a shangai n`htoi, Nu Maria a shangai n`htoi hte Yawhan Baptista a shangai n`htoi ni rai nga ai. San Yawhan a kanu yan kawa gaw Zahkari hte Elizabet rai nna, asak kaba sai majaw, kasha n lu ai dinghku rai nga ai. LK 1: 5-25) hta lamu kasa gaw Zahkari hpe ga sa shana nna, na a madu jan kaw la kasha shangai ya na re. Dai ma a mying hpe Yawhan ngu shamying na lam, masha yawng mung kabu na lam, Karai Kasang a man hta myi man pa ai wa rai na ra ai.
Shi gaw kanu a hkri tung e Chyoi Pra Ai Wenyi hte hpring zup nna, Madu Yesu du sa na lam a matu, shawng tau nau hkyen lajang na rai nga ai. Raitim Zahkari a kam sham myit n`gun kya ai majaw, tau nau tsun da ai lam dik wa ai ten du hkra, Zahkari gaw ga n mai shaga mat ai. Shaloi ma shangai ai hpang ma a mying kaning ngu na kanu hpe san dat ai shaloi Yawhan ngu jaw dat ai. Bai kawa Zahkari hpe bai san yu ai shaloi mung, gam gu pa la nna, Yawhan ngu ka dat ai hte Zahkari a n-gup hpaw wa nna, Karai Kasang hpe shakawn kungdawn ai lam tsun da nga ai. Ya daini anhte mung San Yawhan Baptista a poi hpe galaw shagu, Yawhan zawn shi a hpang e du sa na Madu Yesu hpe galoi mung No. (1) tawn da ai prat, shagrit shamen ai myit masin, tengman ai lam ni hta, gwi gwi sakse hkam chye ai myit hte sak hkrung hkawm sa ga law.