San Ga Mahtai Lu Na Sa Ga Ban Dung Du Htai Ya Ai Wa – Wa Jau Dr. Joseph Gawlu Yung Wa,
Ga san -Num langai hte dinghku de nna, kasha langai lu ai. Dai hpang, madu jan gaw kaga la hte rau nga nna kasha lahkawng bai lu mat ai. Shi gaw daini du hkra num kaga n la ai sha sadi dung let nga nga ai. Shi Chyoi pra hkum mai hkam na kun? Bai, shi kaga num hte dinghku bai mai de na kun?
Hkum shan a agung alau de du mat mat re majaw gara hku lawt lu na kun?
Htai -Yawsep Luksing Sau Yaw e, na adinghku mayak lam hpe na lu ai majaw myit n pyaw ai. Rai tim, nang Karai Kasang hpe hkrit hkungga let, akyu hpyi let shakut nga ai majaw shakawn ai. Myit n daw n hten ai sha shakut ga. Karai Kasang garum ya na re.
Nang num bai mai la ai kun ngu ai ga-san a mahtai hpe gaw, nan dinghku nnan de hpang wa yang na lam, nan a manghkan ni a shingdu labau hpe atsawm sha bai nhtang dinlik yu ra na re. Na a Ginwang Up Jau, shing n rai, Nawku Hpung a tara masa atsawm chye nna hpaji jaw lu ai marai langai ngai hte hkrum shaga yang kaja dik rai na re.
Ga shadawn, na madu jan hte rai n hkungran yang, num jan, shing n rai, nang hkumnan, myit n lawm ai, masu ga sadi jaw kau ai, ja gumhpraw, kumhpaw kumhpa the shalen hkwi la ai, jahkrit shagyeng ai lam ni nga ai rai yang, nan a hkungran sakramentu gaw n awng ai. Dai lam ni nga ai rai yang, tinang a Saradaw rung de sa nna garum hpyi mai ai. Saradaw rung kaw nna, nan a hkungran ai n awng ai ngu nna ndau ya nhtawm, nang dinghku nnan bai de lu na re.
San Ai Wa– Shawng de Sam Mung, Loi Seng Urawng Man Lun mare hta nga lai mat wa nna, ya, Lashu Saradaw Gingwang, NamTun Urawng Bungmun Mare hta Shanu nga ai Yawsep Luksing Sau Yaw/ La Ring
