Hkristu hte bung ai anhte a Mawn Nsam a majaw, anhte n ra ai sha, gun hpai taw nga ai, li la ai lit ni hpe raw kau lu myit ga law.
Karai Kasang anhte hpe jai lang lu na kaja dik ai mahkrun gaw sawt ai myit n rawng ai lam rai nga ai. Hkristu anhte hpe jaw ya ai Karai Kasang a kasha ni ngu ai mawn nsamhpe, anhte a makau grup-yin de htoi tu na matu, sakse hkam ya na matu, yaw shada ai.
Mahte 5:16 hta Madu Yesu ning nga tsun da ai:
“Dai rai nna, masha ni gaw nanhte a kaja ai bungli mu lu nna, sumsing lamu e nga ai nanhte a Kawa hpe shagrau sha-a lu mu ga, shanhte a man e nanhte a nhtoi hpe htoi tu shangun da mu law”.
Madu Yesu Bum ntsa e hkaw tsun ai Mungga ni hta na “Ajum” hte “Nhtoi” ga shagdawn gaw Karai Kasang a Salum hpe anhte a makau grup-yin na mungkan masha ni hpang de ndau shabra na kaja dik ai lam rai nga ai.
Mahte 5:13-16 hta Yesu tsun ai:
Nanhte gaw mungkan a nhtoi rai nga myit dai. Bum ntsa e de ai mare hpe shinggang lu na n rai; pyending hpe shatu nhtawm, mung npu e tawn da ai gaw, kadai n galaw yu ai; pyending shadun hta tawn da nna, dai gaw, nta e nga ai ni nlang hte hpe jahtoi ya nga ai.
Ndai ajum hte nhtoi ga shadawn hpe, Madu Yesu grai atsam kaba rawng ai hku nna sanglang dan ai. Karai Kasang gaw, anhte hpe jum sa mari la nna masha ni hpe garan jaw shangun ai n rai; anhte-nan JUM rai nga ai da.
Anhte hpe gat de “hpayawng deng sa mari la nna shatu shangun ai n rai; anhte nan Nhtoi re ai da.
Karai Kasang a Salum hpe kaga masha ni hpe htawn shalai ai ngu ai gaw, anhte kadai re ai, kaning san ai ngu ai anhte a “mawn nsam” a daw chyen rai nga ai. Anhte “kam sham ai” ni gaw hkye hkrang la nna kashin shatsawm da hkrum saga ai. Dai majaw, hkye hkrang la hkrum sai anhte a sak hkrum prat hku nna Anhte a Hkye La Madu a mai kaja dik ai lam hpe sakse hkam ya ra ga ai.
Anhte a langai sha re ai “Myit Mada Shara” gaw “Madu Yesu” sha rai nga ai. Anhte hpe lam woi ningshawng tai ya ai, langai sha re ai wa gaw “Chyoi Pra ai Wenyi rai nga ai.
Anhte gaw, nsin a nga sat nga sa lam ni hpe kabai kau nna, Karai Kasang shaga ai nsen hpe na nna htan ai ni hpe, Shi a tsawra ai hpe n’gun atsam hte hkaw dan na matu shaga la hkrum saga ai.
Anhte a “myit Mada ai” lam hpe makawp maga na matu, sara ninghkring n rai ra ga ai. Kaga masha ni gara hku shadu na, tsun na ngu ai hpe mung n tsang ra ga ai. N hkrit n tsang ai sha tsawra lu ga ai. Bai nhtang jaw ya na hpe n myit mada ai sha, chyeju ni hpe garan jaw ya lu ga ai.
“Na a nhtoi hpe kaga masha ni a man de htoi tu shangun u!” Karai a Kasha ngu ai na a mawn nsam hpe hkum magap kau. Nang galaw sa wa ai lam shagu hta Karai Kasang Salum hpe dan dawng shangun u. Nang hku nna kaga masha ni, Karai Kasang a (masat jarit n nga ai) tsawra matsan dum lama ai Salum de, gang dun la nga ai hpe nang mu mada lu na ndai.
Sumru Akyu Hpyi Ga:
- Madu Yesu a “Bum Ntsa na Mungga” hpe bai sumru yu ga. Madu Yesu hta, shi a marang e, nang kadai rai nga ai ngu ai hpe sumru yu u.
“Nanhte gaw dinghta ga a ajum rai nga myit dai; dai ajum mahtang hkawng mat yang gaw, hpe hta jashum la lu na rai ta? Shinggan de kabai kau nna, masha ni e kabye kau na hta kaga, hpa asung mi n shang lu ai.
Nanhte gaw mungkan a nhtoi rai nga myit dai. Bum ntsa e de ai mare hpe shinggang lu na n rai; pyending hpe shatu nhtawm, mung npu e tawn da ai gaw, kadai n galaw yu ai; pyending shadun hta tawn da nna, dai gaw, nta e nga ai ni nlang hte hpe jahtoi ya nga ai.
Dai rai nna, masha ni gaw nanhte a kaja ai bungli mu lu nna, sumsing lamu e nga ai nanhte a Kawa hpe shagrau sha-a lu mu ga, shanhte a man e nanhte a nhtoi hpe htoi tu shangun da mu law”.
- Na a nhtoi hpe nang gara hku magap kau, makoi kau nga ai kun? Hkrit tsang ai myit rawng nga ai kun, shing n rai, mungkan lam a nga sat nga sa lam ni hpe gara hku hkan taw nga ai kun? Shut ai lam ni nga yang, aten loi la nna mara tawngban u; Karai Kasang a tsawra mara dat ya ai hpe hkam la u.
- Na a Mawn Nsam nnan rai nga ai “Jum hte Nhtoi” hku nna sak hkrung nga sa na ngu ai, Karai Kasang kaw nan’gun atsam hpe hkam la u. Gara hku matut hkawm sa sakse hkam mai ai ngu ai hpe mung hpyi u.
Hpang Jahtum:
Anhte gaw, Karai Kasang hte seng ai lam ni hpe anhte a masing ni hta na “langai mi” “daw chyen” hku nna sha, sawn la chye nga ai. Anhte shani shanang galaw sa nga ai lam ni hpe galai shai dat ya jang, anhte gaw, shi hte anhte a lapran e nhpan kum kau chye nga ai. Dai hku Karai Kasang hpe shinggang kau ai gaw, ndai mungkan a akyu ni hpe htani htana akyu ni hta grau manu shadan ai lachyum rai nga ai.
Ndai mungkan e anhte hpe kaga masha ni a mu mada ai mu jut ni hpe sha anhte manu shadan ai rai yang, anhte gaw Karai Kasang hpe mungkan hte de a masa tara ni a “mayam” shatai kau ai rai nga ai.
Karai Kasang gaw “Hpan Madu” re. Shi chyu sha Hkawhkam re. Anhte a tsawra ai Kawa rai nga ai majaw, anhte a matu kaja dik ai lam ni hpe shi chye dik rai nga ai. Karai Kasang hpe “anhte a prat daw chyen mi hta sha” lawm shangun ai gaw “angawk” ai lam rai nga ai.
Dai majaw, na a prat jut shingnaw shagu hta Karai Kasang hpe up hkang shangun u. Mungkan a Jum hte Nhtoi tai u. Karai Kasang hpe nang hku nna dan dawng shangun u. Mungkan hpe grau kaja ai de galai shai lu hkra na a sak hkrung prat hpe jai u.
Na a prat, Karai Kasang a chyeju asak hte hpring kabrat nga u ga.
By Cardinal Charles Bo