San Pra ai Petru hte Pawlu yan a Poi hta, Wa Sarabyin Leo XIV gaw, martyrdom makam masham hpe sakse hkam ai, garan gachyan ai hte mara raw ya ai lam hpe madung tawn let, Hkristan kahkyin gumdin lam hpe gaw gap sa wa na matu shaga la hkrum ai lam hpe madi madun dan lai wa ai.
San Petru hte Pawlu a Poi hta, Wa Sarabyin Leo XIV gaw, San Petru hting nu shawng hta Angelus akyu hpyi na matu zuphpawng nga ai shawa masha ni hpe shakram let, Hkristan kahkyin gumdin lam, myit malai lam, hkristan ai ni lapran hta makoi magap da ai hkau lam hte gyit hkang da ai lam ni hpe myit sumru yu na matu shaw shaga lai wa ai.
Kasa Petru yan Pawlu a sakse hkam ai lam hte asai hta gaw gap da ai Catholic a npawt nhpang hpe bai myit sumru yu let Wa Sarabyin ga hpaw hpang ai. Shan lahkawng sakjaw apnawng ai kasi hpe hkungga shakawn ai, Hkristu hpe kam sham ai majaw nni nkri hkrum ai, si hkrum ai du hkra mungkan ting na Hkristan ni hte matut mahkai ya lam rai nga ai.
“Anhte gaw sai hte seng ai ecumenism hkristan kahkyin gumdin lam ngu nna tsun mai ai” nga nna Wa Sarabyin tsun ai hta, Karai lam hta myit hkrum ai sha n-ga, kam sham ai ni a hkam sha lam ni hpe garan gachyan ai, tsin-yam tsindam ni kaw nna byin pru wa ai kahkyin gumdin lam hpe madi madun dan ai.
“Ndai n mu lu ai sung htum ai kahkyin gumdin lam gaw, hkum tsup ai hte mu lu ai hku kanawn mazum lam n lu shi ai Hkristan Nawku hpung ni a lapran e nga nga ai,” nga nna Wa sarabyin matut tsun ai. “Roma Nawku Hpung gaw, San Petru yan Pawlu yan a asai hte Nawku hpung yawng a kahkyin gumdin lam a matu ap nawng da ai” nga nna bai kahtap tsun ai.
Yesu gaw jet ai lunghkrung re.
Kabu Gara Shiga hte Petru a npawt nhpang lit hpe myit sumru let, Wa Sarabyin gaw, Yesu hpe tengman ai lunghkrung hku nna madi madun dan ai: “Shi gaw, nta gawgap ai ni lata kau ai lungdin rai nna, Karai Kasang gaw shi hpe n chun na nlung shatai nu ai.”
Ya aten hta Hkristan ni a madung masat dingsat rai nga ai, Petru hte Pawlu Papal Basilica htingnu kaba ni a arawng sadang gaw, moi aten hta shinggyim wuhpawng a shingdu kaw gara hku tsap lai wa sai hpe mu mada lu ai. “Bunghku shinggan” ngu nna, Roma htunghking ga si hpe lang nna, shanhte a sakse hkam ai lam hpang wa ai shara re, Kabu Gara Shiga rawt galu kaba ai lam gaw mungkan masha ni manu n daw dan lu ai hpe shadum ya ai lam re, nga nna tsun ai.
Wa Sarabyin Leo gaw Hkristu a hpang hkan ai ni gaw yak hkak ai lam hta hkawm sa ai, Beatitudes a..lu ai tara lam hta hkawm sa ra ai hpe sadi jaw da nga ai. Wenyi hta matsan mayan hkrum ai, sumnung shingdi ai, tara rap ra lam hpe ra sharawng ai, n tara ai hpe ninghkap ai lam ni law law nga ai hpe shi matsing da ai. Raitim, ndai lam gaw Karai Kasang a hpung shingkang dan dawng nga ai. “Karai Kasang a hpung shingkang gaw shi a manang ni hta htoi tu nna, lam hkawm ai shaloi shanhte hpe matut nna hkrang shapraw ya nga ai, myit malai lu ai kaw nna myit malai lu ai de lai di du lu nga ai.”
San Seng San Pra ai ngu ai gaw mara raw dat ya ai kaw na shangai wa ai .
Chyoipra ai ngu ai gaw hkum tsup ai kaw na shangai wa ai n rai, mara raw dat ya ai kaw na shangai wa ai lam hpe sang lang dan ai. “Ga Shaka Ningnan hta kaba dik ai Kasa ni hku nna shut shai ai lam, manghkang, yubak mara ni hpe makoi magap da ai lam n nga ai” nga nna Wa Sarabyin tsun let, “shanhte a hkyik hkam ai lam hpe mara raw ya ai hku nna hkrang shapraw ya ai” nga nna Wa Sarabyin tsun ai.
Hkristu gaw Petru yan Pawlu hpe kalang lang lata Ladawn let shaga ai zawn, masha langai hte langai hpe mung kalang lang n re ai sha, law law lang matut nna shaga nga ai. “Dai majaw galoi mung myit mada mai nga ai. Jubilee gaw shi nan ndai lam hpe shadum ya ai lam re” nga nna tsun ai.
Bai nna, Wa Sarabyin gaw, dinghku kata hte buga ginra kata kaw nna hpang nna, kahkyin gumdin lam a hpaji ninghkring ni tai wa na matu, makam masham hpung masha ni hpe saw shaga ai. “Nawku hpung kata hte Nawku hpung ni a lapran kahkyin gumdin lam gaw mara raw ya ai hte shada da kam hpa hkat ai lam ni a majaw byin pru wa ai re” nga nna tsun ai, “Yesu anhte hpe kam hpa lu yang, shi a mying ningsang hta anhte shada da teng sha kam hpa lu na re” nga nna tsun ai.
Ningma hkang ni hte garan ginhka ai lam ni naw nga ai mungkan hta, Nawku hpung gaw “masha shagu a matu tsirung hte jawng” tai ra ai ngu nna n-gun jaw shadum let, hpang jahtum, Nu Maria hte Kasa Petru yan Pawlu kaw akyu hpyi ya let hpungdim dat ai.