Myitkyina Saradaw Sasana sagurem wa, Wa Saradaw John Mung Ngawn La Sam gaw ( 29 June 2025 ) ya shani Danai jau ginwang de shawng ningnan lang sa du kawan nna nawku hpung masha ni hte Laban Missa Hkungga jawm nawng lai wa ai.

Danai jau ginwang de sa du kawan ai Wa Saradaw John Mung Ngawn La Sam hpe ginwang up Wa Jau Peter Labu Naw San hte nawku hpung masha ni mung wunpawng htunghking madum sumpyi, mahkawn yu ngwi, htunghking magun shat lit, htung hking nhpye n-ga ni hte kabu gara hkap tau hkalum la ai.

Wa Saradaw hku nna mung ginwang up jau hte nawku hpung masha ni hpe chyeju dum mungga tsun ai.

Wa Saradaw tsun ai mungga:

Daini n ging n dan ai raitim mung Karai Kasang a sagu rem langai, Saradaw langai hku nna kabu gara hkap tau hkalum la ai majaw ndang tsun hkra chyeju dum ai. Daini e nanhte ngai hpe hkap tau hkalum la ai gaw ngai hpe tsawra nna, ngai hpe matsan dum nna lata da sai Madu Karai Kasang hpe nanhte hkap tau hkalum la ai lam rai sai. Ngai n ging n dan ai raitim ngai hpe Karai Kasang shi a sagu rem wa langai mi shatai da sai hte maren daini e nanhte ngai hpe ndai zawn rai hkap tau hkalum la ai gaw Karai Kasang a shaman chyeju, nanhte Karai Kasang kaw na lu la sai ni ngu ai hpe tsun dan mayu ai.

Daini e ngai nanhte hpang de sa du ai lam gaw Karai Kasang nanhte hpe e kade daram tsawra ai ngu ai hpe tsun dan mayu ai majaw sa du ai rai nga ai.

Anhte ni myit n kaji ga, ndai yak hkak ai ten hta grau nna akyu hpyi ga. Ndai yak hkak ai ten hta e anhte kahkyin gumdin nna Karai Kasang kaw manoi manat nna sak hkrung hkawm sa yang, daini anhte nanhte hkrum kadup nga ai, anhte nanhte hkawm sa ra nga ai ruyak jam jau lam ni gaw shaman chyeju tai na rai nga ai.

Daini e ndai shara hta ngai shawng ningnan lang sa du yu ai, daini anhte nanhte hpe Karai Kasang shaman chyeju jaw na matu anhte hkrum zup lu ai re. Anhte ra nga ai shaman chyeju hpe rau jawm akyu hpyi ga. Ya ndai kaw sa du lawm ai ndai daram mi myit hkrum ai hte akyu hpyi ai rai yang anhte a akyu hpyi ga hpe Karai Kasang teng sha madat ya na re.

St. Peter A& Paul laban Missa Hkungga hta nawku hpung masha ni marai ( 246 ) Ninggun Shaja Chyeju Kumla hkam la lu sai.

Missa Hkungga garai n hpang yang jau ginwang a zuphpawng gawk ningnan hpaw shaman ai hte Jubali chyinghka hpaw ai lam mung galaw la lu sai. Ya na zawn Jubali chyinghka hpe jau ginwang shara law law hta hpaw tawn da ai gaw Jinghpaw Mung hta ya ten byin taw nga ai mung masa n simsa hkawm wa hkawm sa yak ai lam ni a majaw hpung masha nga ai jau ginwang na nawku jawng ni hta Myit mada lam a Jubali chyinghka hpe hpaw ya ai rai nga ai.

Missa hkugga ngut ai hpang majan a majaw tinang a mare buga hpe tawn kau da nna hpyen koi yen hprawng du wa ai hpyen yen masha ni shanu shingbyi nga ai St. Joseph hpyen yen dabang de sa du kawan nna, dabang lit hkam Sara ni, hpyen yen masha ni hte hkrum shaga nna ninggun jaw, hpaji jaw ga ni tsun ai hte akyu hpyi shaman da ya ai.

St. Joseph hpyen yen camp hta RC, KBC, Anglican nawku hpung masha ni rau jawm shanu nga ai rai nna ya aten hpyen yen masha jahpan ( 622 ) nga ai. Majan byin ding yang naw rai nga ai majaw hpyen yen masha ni tinang mare buga de bai n htang wa na yak hkak lam ni law law nga ai. 2024 ning hta marang kaba htu, sin hkrat ai majaw hpyen yen dabang na dum nta hpri tsut ni yawng baw kayun mat ai majaw ya aten plastic hte sha galup nna mai byin ai hku rawng taw ai masa rai nga ai.

Danai jau ginwang hta 2024 ning jahpan hte maren

hpung masha htinggaw – 1314

hpung masha jahpan – 7193

nga ai lam chye lu ga ai. Danai jau ginwang gaw ya aten du hkra Nat Jaw hpe kau da nna, Kahtawlik makam masham de shang wa ai hpung masha ni law law nga ai jau ginwang mung rai nga ai.

Shiga – Julia Ja Ing