Daini na Ja Chyum Mungga hpe hti sumru yu ai shaloi e, Yesu hkrung rawt sai lam hpe Kasa Thawma kam sham ai lam na la lu ga ai. Daini nawku hpung gaw, kasa Thawma (sh) nau n kam ai Thawma ngu ai wa a poi hpe galaw nga ga ai. Ndai kasa Thawma gaw, Madu Yesu a ningma manga hpe shi myi chyaw n mu yang, bai shi a lata hte n hkra yu yang n rup n tsen nngai, n kam sham nngai nga ai myit hpe asan sha hpaw tsun lai wa sai lam na chye lu ga ai. Shaloi Madu Yesu gaw, kasa Thawma hpe n tawn da ai, kasa ni yawng nga nga ai ten hta sa wa nna, ngwi pyaw sim sa ai gaw nanhte hte rau nga nga u ga, ngu shakram dat ai shaloi, dai ten Thawma a n rup n tsen ai n kam sham ai myit ni hkrit gajawng myit ung ang ai lam ni kam sham ai myit hte n`gun atsam ningnan bai hkam la lu sai rai nga ai.

Kasa Thawma gaw bai hkrung rawt sai Madu Yesu hpe shi hkum nan mu ai ten kaw nna, n kam sham n rup n tsen ai ga san ni hkoi mat mat wa ai zawn, anhte marai hkum shagu mung, Chyoi pra ai hkum sakramentu hpe nawku daw jau ai a marang e madu a kam sham ai n`htoi chyeju gaw anhte a salum kaw na  n kam sham ai lam ni hpe jahkoi manga kau ya lu ai hpe daini na kabu gara shiga hta anhte yawng hpe sadi jaw let ja ja shadum ya nga ai re.