Wa Sarabyin Leo XIV gaw, Wa Sarabyin Francis ka da ai Laudato si’ laika hpe lakap nna, grup yin hte shinggyim nga pra masa hta n tara ai lam ni hpe mara shagun ai hte, Karai Kasang a hpan da ai lam gaw ahkyak ai arung arai ni a matu majan gasat ai shara n re ai hpe madi madun dan ai.
2025 ning September 1 ya shani hta, 10 Lang Na Hpan da ai lam hpe makawp maga na matu akyu hpyi ai Mungkan masat Nhtoi galaw na matu Nawku hpung hkyen lajang nga ai ten, Wa Sarabyin Leo XIV a mungga hta, Hkristan ni hte kaja ai myit rawng ai masha yawng hpe, du hkra ladaw galai shai ai lam ni a majaw grau grau hkra machyi wa nga ai mungkan hta, grup yin hte shinggyim nga pra masa, tara rap ra lam hpe lawan ladan ra kadawn nga ai hpe chye na, na matu tsun shadut dat ai.
Seeds of Peace and Hope ngu ai gabaw hte July 2 ya shani shapraw ai Wa Sarabyin a mungga gaw, ya aten na Jubilee shaning a yaw shada lam the maren, kam sham ai ni hpe “myit mada lam a hkrun lam hkawm ai ni” hte Karai Kasang hpan da ai lam hpe makawp maga ai lit hpe hkap la na matu shaga nga ai.
Ningma kap nga ai mungkan ntsa na tara rap ra lam
Esaia a myihtoi ga hpe bai kahtap tsun let, Wa Sarabyin Leo gaw, daini na “hkraw htum mat sai nam mali” hpe “tsit lali ai the asi si ai sun” de galai shai wa na matu mungkan ting hpe myit mada let saw shaga dat ai. Ndai chyum laika hpe, wa sarabyin sang lang dan ai hta, ga shagawp ga shadawn n re ai sha, hkrit hpa shingra tara hte shinggyim masha ni a manghkang ni hpe hkrum katut nga ai hpe, lawan ladan galaw sa wa na matu shaga ai lam re.
Wa Sarabyin Francis a Laudato si’ ngu ai laika 10 ning hpring ai shaning hta law law lang lakap nna, “N tara ai lam ni, mungkan tara hte amyu sha ni a ahkaw ahkang ni hpe tawt lai ai, grai dan dawng ai n rap ra ai lam ni hpe n-gun jaw ai, myit marin ai lam ni, nam maling ni hpe jahtum kau ai, shingra tara hpe jahten sharun ai lam ni gaw Mungkan hpe maza shabyin ya nga ai” nga nna ka da ai.
Makau grupyin hpe jahten sharun ai lam hte matsan mayan ni hte shingdu tawn da hkrum ai ni hpe zingri zingrat ai lam hte matut mahkai let, Wa sarabyin gaw, buga masha ni a n bung ai tsin-yam tsindam ni hte sut su ai ni hte matsan ai ni a lapran na garan ginhka ai lam kaba wa ai hte, shingra tara hpe yawng a nta langai zawn n mu mada ai sha, arung arai langai zawn sha mu mada ai myit masa kumla ni hpe madi madun dan nga ai.
Shingra tara gaw majan pa zawn rai nga ai.
shingra tara hkum nan “bargaining chip” hpai makoi zawn byin mat ai, masha ni hte mungkan ga hta grau nna akyu lu na hpe ahkyak shatai ai tara masa ni hte lailen ni a npu e nga ai ni hpe Wa sarabyin yawn nga ai. Hkai sun lamu ga ni hta bawm ni hte hpring chyat mat ai hpe Wa Sarabyin Leo gaw, karai kasang hpan da ai lamu ga gaw “majan pa de gale mat wa ai” hpe makawp maga zing hkang ra ai lam hpe hkrangpan sumla langai zawn madi madun nga ai.
Ndai hkala nba lam ni gaw, “mara a majaw” rai nga ai, hpan da ai lam hpe n up hkang ai sha, “hkai sun galaw nna makawp maga” na ngu ai chyum laika hta lawm ai hkang da ai ga hpe ningdang kau ai, lanu lahku ai hte lit la ai hte, Mungkan ga hpe hkai sun langai zawn makawp maga na matu shaga la ai lam re.
Grup yin tara rap ra lam gaw shinggyim kyang lailen hte seng ai ahkyak ai lam re
Wa Sarabyin a mungga gaw, Laudato si’ a madung yaw shada lam rai nga ai “integral ecology” ngu ai Nawku hpung a ga sadi hpe bai madi shadaw ya nga ai. Makau grup yin tara rap ra lam gaw yupmang shingran n re ai sha, “makam masham kaw na shangai wa ai lit” rai nga ai ngu nna , Wa Sarabyin madi madun da nga ai.
“Kam sham ai ni a matu, lamu ga gaw, yawng mayawng hpe hpan da nna hkye hkrang la ai Yesu Hkristu a myi man hpe madun dan nga ai” nga nna ka da ai. Ndai nhtoi lam hta, mungkan ga hpe makawp maga ai lam gaw, shingra tara ra kadawn ai lam sha n-ga, grau htum ai wenyi hte shinggyim lailen lam hta shaga la hkrum ai lam mung tai wa ga ai.
Asi si ai nli tum ni.
Wa Sarabyin Leo gaw, Concrete action ngu ai tutut galaw ai hpe n-gun jaw let, aten du wa ai shaloi, simsa lam asi si wa na “tara rap ra ai nli” hpe gat hkai ai hta, tsawra myit hte shakut shaja na matu saw shaga nga ai. Castel Gandolfo kaw galaw ai Borgo Laudato Si’ masing hpe shingra tara manu dan ai lam ni hta ru jung ai hpaji masa hte wuhpung wuhpawng sak hkrung lam gaw tara rap ra ai hte myit mada shara nga ai, htawm hpang prat hpe gara hku gawgap ya lu na hpe mu lu ai kasi ningli langai hku nna tsun dan ai.
“Ndai lam gaw shaning law law na na re”, “rai tim, matut manoi sadi dung ai lam, jawm galaw ai lam hte tsawra myit hte hpawng de da ai shingra tara ting hpe hkan sa ai shaning ni ra ai.”
Htawm hpang prat a matu shaman chyeju langai mi
Karai Kasang a Wenyi yu hkrat wa na matu akyu hpyi ga hte shi a mungga hpe jahtum tawn let, shamai shatsai lam hpe ra sharawng ai mungkan gaw, lam madun dan ai nhtoi rai nga ai, hkrung rawt sai Hkristu myit mada ala nga ai nga nna wasrabyin a mungga hpungdim dat ai.
“[Laudato si’] gaw anhte hpe matut nna myit sharawt ya lu u ga, integral ecology hpe hkan sa na matu kaja ai lam hku nna grau grau hkap la lu u ga” nga nna ka da ai.