Karai Wa gaw – “Na a prat hpe tsawra ai, kabu gara ai, simsa ai hte masat da sai”. Hkraw hkun ai ga hta tu ai hpun gaw asi kaja n si lu ai; asi kaja law law si lu na matu shi hta ra nga ai – hka, gasau, nbung, tsing magang ai, lakung lakying ni hpe tsan kau ai zawn re ai ni hpe law law htam htam lu la yang she, kaja ai asi law law hpe si ya lu nga ai.
Chyum mungga hpe kalang bai madat la yu ga:
“Wenyi a asi chyawm gaw tsawra ai, kabu gara ai, ngwi pyaw ai, myit galu kaba a, matsan dum ai, mai kaja ai kangka ai, myit nem ai hte tinang myit hpe hkang lu ai rai nga ai: dai lam hte hpe hkum lu na tara mi n nga ai”.
Ndai chyum mungga daw hpe na la ai shaloi, anhte kadai hte seng nga ai ngu ai hpe shingran mu ai. Tsawra ai, kabu gara ai, ngwi pyaw simsa ai hte hpring nga ai masha ni tai mayu wa ai.
Myit galu ai, matsan dum lama ai, mai kaja ai myit rawng mayu wa ai. Nang hpe sadi dung ai, sumnung ai, tinang hkum hpe hkang dang ai masha ngu nna masat hkrum na hpe n sharawng wa ai kun?
Ndai masat kumla, lailen ni hta hpring tsup ai asak, Madu Yesu hpe mu lu ga ai. Yesu ngai hta shanu nga ai. Maga mi hku bai yu yang, Chyoi Pra ai Wenyi ngai hta shangai shaprat shalat ya mayu ai lam ni hpe nye a prat hta n mu mada lu ai mung nga na re. Anhte a shut hpyit mara ni hte gawng run gawng kya ai prat hta dai mai kaja ai lam ni hpe gara hku mu mada lu na rai?
Wa Karai Kasang tsun nga ai: Shi jaw ai chyeju hte sha dai apu asi kaja ni hpe si lu ai. Anhte a shinggyim masha atsam hte sha gaw dai kaja ai akyang lailen ni hpe n shapraw dan lu ga ai.
Ngai shapraw dan lu ai gaw tingkyeng akyu chyu sha yu ai, lagawn ai, myit tsaw myit dap ai lam ni sha rai na re. Raitim, “Karai Kasang hte rai yang, yawng mayawng hpe dang di lu ga ai” (Mt. 19:26). Dai majaw mung, Chyum mungga gaw, dai kaja ai lailen ni hpe Wenyi a apu asi ni ngu nna shamying ai rai nga ai. Karai Kasang a mauhpa atsam hte shi a chyeju kaw nna shangai shaprat dat ai rai nga ai.
Dai rai yang, dai mauhpa asi ni hpe shapraw dan lu na matu, anhte a kraw dung salum hta Chyoi Pra ai Wenyi hpe gara hku shara jaw ya lu na ga ta?
Karai Kasang hte anhte rau nga shaman ai rai yang, anhte shi zawn rai wa ga ai. Shi a man e anhte hkawm sa ga yang, shi a tsawra ai lam a shingkang shingwang gaw anhte a salum ni hpe mung galai shai wa shangun ai. Aten la nna, Shi hta manoi nga ga ai rai yang, mauhpa lam ni, lamik kumla ni hpe shi anhte hta shabyin ya ai.
Shi a tsawra ai hpe anhte hkam la na matu aten lu jaw magang, anhte a gawng run ai hte shut hpit ai lam ni kaw na shamai shatsai ya hkrum nna, anhte a prat mung grau kaja ai de galai shai magang rai nga ai. Dai majaw, shani shagu, shi Madu a man e dung nna shi a tsawra ai hpe hkam la ra ga ai.
Chyoi pra san seng ai de du na dumbrat lam n nga ai. Makam masham shadik ai lam hta masu n mai ai. Chyoi pra ai shara ni de du shang nna Karai Kasang a myiman hpe mu lu na matu Madu Yesu Lam hpaw da ya sai. Dai Lam hpe nang hkan shadik ai rai yang, Karai Kasang gaw na a matu hkik hkam ai lam ni hpe galaw ya na ra ai.
Shi a tsawra ai hpe hkap la u. Na hkum hpe mung, na a makau grupyin na mungkan lam ni hpe mung galai shai ya na matu, nang hpe shi tsun ai Ga hpe madat hkap la u. Dai mungga hpe myit sumru yu nna, na a salum hpe Yesu a salum hte bung wa hkra sharai ya na matu aten jaw u.
Akyu Hpyi Ga:
- Nang hta Chyoi Pra ai Wenyi a apu asi ni hpe si shangun mayu ai Karai Kasang a “ra sharawng lam”, si shangun lu ai Karai Kasang a “atsam” hpe myit dum sumru yu u. Shi a mungga hpe bai madat yu nna myit mada lam hpe shangang la ga:
“Wenyi a asi chyawm gaw tsawra ai, kabu gara ai, ngwi pyaw ai, myit galu kaba a, matsan dum ai, mai kaja ai kangka ai, myit nem ai hte tinang myit hpe hkang lu ai rai nga ai: dai lam hte hpe hkum lu na tara mi n nga ai”.
- Karai Kasang shanu nga ai hpe dum let, shi a tsawra ai hta shamyet shanat nga ga. Shi hta manoi nga lu hkra aten la ga. Nang hta gawng kya ai shara ni hpe myit nga na malai, shi a mai kaja ai lam hpe mahtang shingran mu ga. Nang hpe shi hpang de woi lakawn la na matu hkraw ya ga.
- Nang hta asi si shangun na matu Chyoi Pra ai Wenyi kaw hpyi u. Tsawra ai, kabu gara ai, ngwi pyaw simsa ai ngasat ngasa lam ni hta woi awn shangun u.
Myit galu ai, matsan dum lama ai, mai kaja ai chyeju hte nang hpe mung, na makau grupyin na ni hpe mug jahprig ya na matu hpyi u. Sadi dung kangka ai, sumnung shingdi ai, tinang myit hpe hkang dang ai lam ni hte dan dawng ai masha shatai ya rit ngu nna mung hpyi u.
Hpang Jahtum:
Lahta e tsun lai wa sai masat kumla, kyang lailen ni hpe nang hkrai shakut nna lu la mai ai baw n re, ngu ai hpe dum chye nga na gaw ahkyak nga ai. Karai Kasang e nang hpe tsawra ai a apu asi she re.
Nang gaw na a atsam hte sha Aten tup, galoi mung kangka sadi dung, matsan dum chye, sumnung shingdi nga na ngu ai gaw n mai byin ai.
Chyoi Pra ai Wenyi a atsam, shi masat ya ai hte sha mai byin ai.
Shani tup Chyoi Pra ai Wenyi hte kanawn mazum nga u. Chyoi Pra ai Wenyi a apu asi ni hpe madun dan na matu nang yak hkak hkrum nga ai rai yang, jahkring mi azim sha nga nna Chyoi Pra ai Wenyi kaw garum hpyi u.
Shi a mu-jut hte shi hkam sha ai lam ni hpe san yu u. Shi gaw nang hte rau anga nga ai; na a prat hpe chyeju hpring tsup ai hku sak hkrung lu hkra shi garum ya mayu nga ai.
By- Cardinal Charles Bo
