Daini na akyu hpyi sumru ai lamang a matu lata da ai ga-baw gaw:
Chyoi Pra ai Wenyi e Woi Lakawn Ai ngu ai rai nga ai.
Na a sak hkrung lam gara daw hta Chyoi Pra ai Wenyi a woi lakawn ai hpe ra nga nta?
Hpa baw yak hkak lam, daw dan la ra ai lam, shing n rai, mabyin masa ni gaw nang hpe dip gamyet da nga ai kun?
Gara lam a matu, daini, Karai Kasang a mungga hpe nang na mayu ai kun?
Anhte a matu kabu hpa lam gaw:
Ndai hkrit tsang hpa, magyi magaw, manai makai re ai mungkan hkrun lam hku, anhte hpe woi lakawn lam madun ya na kup tsup dik ai Lam Woi Wa hpe anhte lu da ga ai.
Roma 8:14 hta:
“Karai Kasang a Wenyi e woi lakawn la hkrum ai ni gaw, Karai Kasang a kashu kasha ni rai nga ma ai” nga nna leng leng tsun da ai. Karai Kasang a kasha ni anhte rai nga ga ai hte maren, anhte a kraw kata e rawng nga ai Chyoi Pra ai Wenyi a woi awn ya ai hpe shadang tup lu ga ai; Kadai langai mi mung n ngam da hkrum ai. Dai chyeju hpe anhte tinang nan shakut nna lu la ai n rai; ngai grau myiman pa ai majaw ngai grau lu ai, ngu ai mung n nga ai.
Karai Kasang gaw shi anhte yawng hpe tsawra ai majaw, shi a Chyoi Pra ai Wenyi kumhpa hpe jaw da sai. Shi lajang da sai hpring tsup ai asak de woi wa mayu ai majaw, anhte a kraw kata de dai Wenyi hte jahpring ya sai. Dai majaw, Hkristu hku nna, Chyoi Pra ai Wenyi hta, anhte hpe jaw da sai dai woi awn lakawn ai kumhpa hpe anhte grau mu chye tam sawk la lu na matu hka ja la ga.
Shawng nnan, Chyoi Pra ai Wenyi hte Karai a Mungga rau bungli galaw ai ngu ai hpe hkap la ra ga ai. Shan shada nhtan n shai hkat ai. Chyoi Pra ai Wenyi hte shi myit jahtoi ya nna ka da sai Mungga gaw Hkristan sak hkrung prat a matu ahkyak nga ai.
Galati 5:16-18 hta tsun da ai:
Kaning rai nme law, hkum shan gaw Wenyi hte nhtan shai nna marin nga ai; Wenyi mung hkum shan hte nhtan shai nna marin nga ai: nanhte galaw mayu ai n galaw myit ga, dai lahkawng gaw shada da nhtan shai hkat nga ma ai. Dai Wenyi e nanhte hpe lakawn la myit yang gaw, nanhte dai jep ai tara a npu e rai nga myit dai n rai”.
Chyoi Pra ai Wenyi a woi lakawn ai lam gaw ndai mungkan a nga sat nga sa lailen lam hte ading tawk nhtan shai nga ai. Shi ra sharawng ai gaw anhte a du hpe gyit hkang da ai shut hpyit mara kaw nna raw dat ya nhtawm, sim sa, kabu gara ai hte anhte a Kawa Karai hte ni htep hku hkau kanawn mazum ai de woi sa mayu nga ai.
Shi a woi lakawn ningbaw ai lam yawng gaw, gawng kya nna wai mat lawan ai ndai mungkan ga a pyaw hpa lam n re ai sha; Karai kasang hta myit dik myit pyaw hpa lam hte htani htana asak de du na matu rai nga ai.
Dai rai yang, dai htani htana asak de du hkra Cyoi Pra ai Wenyi a woi lakawn ai hpang de gara hku hkan na ga ta?
Galati 5:25 hta gaw: “Anhte dai Wenyi hte hkrung nga ga yang gaw, dai Wenyi hte mung hkawm nga ga” nga nna San Pawlu shadut tsun ai.
Gara hku hkawm na ga ta? Shawng nnan,
Chyoi Pra ai Wenyi gaw hpa hte bung ai kun, ngu ai hpe chye na matu aten la ra ga ai. Shi gaw marai langai rai nga ai. Shi a woi lakawn ningbaw ai hpe anhte hkam sha lu ai. Nang marai langai ngai hte hku hkau hpang ai zawn, shi hte mung hku hkau hpang mai ai.
Kaja dik ai gaw – Shi hte nang (man hkrum) shaga hkat ai (one-on-one) rai nga ai. Anhte hta byin chye ai gaw, anhte shawa hpawng de du jang she, shing n rai, tinang grai pu ba, myit ru ai lam ni hte hkrum jang she, Chyoi Pra ai Wenyi a woi awn ai hpe hpyi chye nga ga ai.
Raitim, makoi magap ai shara (machyi shim ai) hta she, Chyoi Pra ai Wenyi a lam woi, hpaji jaw ai nsen hpe, mungkan a nji n-gu, garu kachyi nga ai nsen ni hte shai ai hku, na lu ai.
Mungkan a magyi magaw re ai hkrun lam hta Chyoi Pra ai Wenyi a lahkam hta hkan hkawm lu na matu, machyi shim ai hku nna she, shi hte hku hkau kanawn mazum ai hpe hpang la mai nga ai.
Yawhan 16:13 hta Yesu tsun ai:
“Dai teng man ai Wenyi du sa jang, shi gaw teng man ai lam yawng mayawng nanhte hpe madun na ra ai: dai wa gaw shi a myit hte tsun na ra ai n rai, na la lu ai hte made tsun dan na ra ai: htawm hpang de byin na ra ai lam mung, shi nanhte hpe tsun dan na ra ai.”
Chyoi Pra ai Wenyi gaw, Wa karai Kasang kaw na shi na la ai lam ni hpe nang hpe htawn tsun dan mayu ai. Wa Karai nang hpe tsaw ra ai lam, nang ra ai lam ni hpe jahkum shatsup ya na lam, machyi ai hpe shamai ya na, nang hpe galai shai ya na, hkye mawai la na, ngu ai masing ni hpe shadan dan mayu nga ai.
Hkum tsup ai asak de nang hpe woi lakawn sa na hpe shi ra sharawng nga ai. Daini nan, machyi shim ai shara na a kraw lawang hta, Chyoi Pra ai Wenyi hte hku hkau lu hkra aten la u. Nang akyu hpyi ai shaloi, Karai Kasang shi hkum hpe nang kaw shadan dan na matu hpyi u. Nang hta rawng nga ai Karai Kasang hta akyu hpyi let ban sa la u. Shi gaw, nang kabye da ai aga hta pyi nang hte grau ni nga ai.
Akyu Hpyi Ga:
- Karai Kasang gaw hpring tsup ai asak de nang hpe woi lakawn mayu nga ai, ngu ai hpe sumru yu u.
“Karai Kasang a Wenyi e woi lakawn la hkrum ai ni gaw, Karai Kasang a kashu kasha ni rai nga ma ai” Roma 8:14.
- Chyoi Pra ai Wenyi shi a hkum hpe nang kaw shadan dan na matu hpyi u. Shi kadai re ngu ai hpe hka ja na matu aten la u. Shi nang hpe shaga na matu, Shi a hku hkau ai lam hpe gara hku chye lu na ngu ai hpe mung hpyi u.
“Dai Wenyi nan anhte a wenyi hte hkrum nna, anhte Karai Kasang a kashu kasha ni rai nga ga ai hpe, sakse hkam ya nga ai” Roma 8:16.
- Na a prat hpe Chyoi Pra ai Wenyi kaw hpaw madun u. Shi nang hpe woi shaw la mayu ai shara gaw gara ni rai kun, ngu ai hpe san yu u. Shi nang hpe gara maga de woi lakawn mayu ai kun san yu u. Shi nang hpe woi len ai maga de hkan nang na ngu nna myit hkut daw dan da u.
Galati 5:16-18 hpe bai madat yu ga:
“Da ndai ngai nanhte hpe tsun nngai gaw, Wenyi hte hkawm nga mu; shaloi hkum shan a marin ai lam hpe nanhte shadik na myit dai n rai.
Kaning rai nme law, hkum shan gaw Wenyi hte nhtan shai nna marin nga ai; Wenyi mung hkum shan hte nhtan shai nna marin nga ai: nanhte galaw mayu ai n galaw myit ga, dai lahkawng gaw shada da nhtan shai hkat nga ma ai.
Dai Wenyi e nanhte hpe lakawn la myit yang gaw, nanhte dai jep ai tara a npu e rai nga myit dai n rai”.
Hpang Jahtum Hku nna:
Nang hkum shan ra marit ai hpe hkan na matu gunglau hkrum ai ten hta, Wenyi hta hkawm sa na hpe mahtang lata u. Matai dawk mayu wa jang, na a sari sadang hpe mahtang makawp u. Masha ni a sari hpe jahpoi ya ai, n shawp n kap ai amu ni hpe galaw mayu wa jang, Wenyi hta sak hkrung ai hpe mahtang lata la u.
Karai Kasang hte kaga masha ni hpe tsawra ai lam hpe lata u. Chyoi Pra ai Wenyi hte rau hkawm sa nna, shi nang hpe woi du mayu ai mauhpa asak hpe mu lu na matu shakut u.
Yawng hpe Chyoi Pra ai Wenyi aten shagu hta, lam woi ya nna ngwi pyaw simsa nga mu ga!
By Cardinal Charles Bo