Kanu kawa ni gaw tinang a kashu kasha ni hpe grai tsawra manu shadan nga ai majaw yak hkak jam jau hkrum sha na amu magam ni hpe galaw shangun na n rai nga ai. Kashu kasha ni nga mu nga mai, ngwi pyaw simsa kabu gara lu na matu galoi mung shanhte ra sharawng nga ai.

Yesu Hkristu a hpang hkan nang ai ngu ai gaw tinang a pyaw hpa lam, nga mu nga mai lam ni hpe tawn kau da nna, shinggyim masha yawng a matu sak jaw ap nawng, daw jau ai lam rai nga ai re. Sasana magam lam hta yak hkak jam jau hkrum na lam gaw teng sha rai nga ai lam hpe  Yesu Hkristu gaw tsun shadum da nu ai re.

Daini na kabu gara shiga hta ngai hpe tsawra ai hta kanu kawa hpe grau nna tsawra ai wa gaw ngai hte n ging n dan nga ai. Tinang a Udang hpai let nye a hpang e n hkan ai wa gaw ngai hte n ging dan nga ai nga nna Yesu tsun da nu ai.