PRAN WAN LADAW LABAN (16), C SHANING
(16th Ordinary Sunday, Year C)
| PRAN WAN LADAW LABAN (16), C SHANING (16th Ordinary Sunday, Year C) Hkristu hta tsawra hkungga ai nu wa hpu nau ni ndai laban pran ladaw hta laban 16 rai nga ai. Mabyin langai mi hpe tsun dan mayu ai. Ndai mabyin hta Sape langai mi gaw, gau ngwi ngwi rai nna lam nshe de du mat ai hpe tsun da ai lam rai nga ai. Guru langai mi gaw shi a sape a wenyi lam yan hta rawt jat na hpe grai ra sharawng ai majaw, shi hpe matut nna sharin achyin ai lam n ra sai sha shi hkrai sha nga lu na re ngu myit la lai wa ai. Dai majaw sara wa gaw shi hpe hka hkin gau makau na nta kaji langai mi hta shi hpe hkrai sha tawn da lai wa ai. Sape wa gaw matsan ai masha langai a prat zawn nga lai wa ai hte hpun palawng lahkawng sha lu nna, mare shawa ni a tsawra myit hte jaw sha ai hpe hkam la nna nga lai wa ai. Lani mi hta, shi a bu hkrawng hpe yu ni gawa je kau ya ai hpe mu nna grai myit n pyaw lai wa ai. Dai majaw shi gaw mare masha ni kaw na kaga langai mi hpe bai hpyi lai wa ai. Nhtoi loi mi na ai hpang, yu ni gaw shi a labu hpe bai gawa je kau ya ai. Mare masha ni hpe myit ru myit tsang n jaw mayu ai majaw, yu ni hpe jahkrit na matu nyau langai mi hpe rem na dawdan lai wa ai. Raitim, shi a manghkang gaw grau sawng wa ai. Ya gaw shi a matu sha nrai nyau a matu mung, nga chyu hpe pi hpyi ra wa ai. Ya na zawn “Hpyi sha ai lam mang hkang grai law wa ai, htekahtawng masha ni a matu mung lit grai shali ya ai zawn shi myit la lai wa ai. Dai majaw shi gaw dumsu langai mi rem na re,” nga nna bai myit lai wa ai. Shi gaw dumsu langai mi lu sai majaw, dai dumsu a matu malu masha lu na matu bai yak hkak wa ai, dai majaw nta makau na lamu ga hpe hkau na htu hkai lu hkai sha hpang wa ai. Raitim, lamu ga hta hkai sha ai bungli gaw shi a aten law law hpe bai la kau ya ai majaw, shi a tara shadik na aten yawm mat wa ai. Dai majaw, dai lamu ga hta bungli galaw na matu masha nkau mi hpe bai shap nna shangun lai wa ai. Shaning grai na ai hpang, shi a sara wa gaw shi a sape a lam hpe san sagawn na matu, bai du pru wa ai shaloi, nta kaji langai mi hpe mu na malai, hkawhkam htingnu kaba langai mi hpe mu lai wa ai majaw mau mat ai. Shi gaw mayam langai mi hpe, Ndai shara hta nye a sape langai mi nga ai shara n rai a ni? Ngu nna San ai shaloi Shi mahtai garai n jaw shi yang, shi a sape wa gaw shi a man e du tsap nga ai. “Nye kasha e Ndai lam yawng a lachyum gaw hpa rai ta?” ngu nna guru sara wa san dat ai. “Sara e Nang ndai mabyin hpe n kam sham na re,””rai tim, nye a bu hkrawng hpe mahkung lu na matu kaga lam n nga lai wa ai nga nna shi a sape gaw bai tsun dan lai wa ai. Anhte gaw, jahkring hkring, dan dawng ai n hkru n kaja ai lam ni a majaw n re ai sha, prat hta kaja ai hku sawn la da ai lam ni mung hten za mat chye nga ai. Shut shai ai shadawn shadang hte galaw ai lam ni law law nga ai, dai gaw tsin-yam tsindam byin shangun chye ai; jahkring hkring ngu na zawn, shut shai ai ten hta galaw ai kaja ai lam ni gaw anhte hpe jahten sharun ai lam ni byin sha gun chye nga ai; kalang marang shut shai ai hku galai shai galaw ai nawku htung lai ni gaw hkra machyi shangun chye nga ai. Ndai gaw ndai bat na Kabu Gara Shiga hta Yesu anhte hpe sharin ya mayu ai lam rai nga ai. Yesu gaw Lazaru a nta de du wa ai shaloi, Mari gaw shi a lagaw nhpang e dung nna shi a mungga hpe madat nga ai raitim, lusha shadu sha ai hta bungli kyin nga ai Marhta gaw, Mari n garum ai lam hpe Yesu hpe aput angun tsun lai wa ai. Dai shaloi e Yesu gaw Marhta hpe astawm tsun shadum dat ai, “Marhta, Marhta! Nang gaw amu law law a majaw myit ru myit tsang nga ndai. Rai ti mung, lam langai mi sha nang hta ra nga ai, Mari gaw grau kaja ai daw hpe lata la sai majaw, dai hpe shi kaw na n la kau ya lu na re,” ngu nna tsun lai wa ai. Ndai bat e, Marhta a bungli masa hpe anhte bai myit yu nga ga 1) Marhta A Bungli Gaw galaw Ra Ai Bungli rai nga ai. Yesu gaw Marhta a nta kaw manam hku rai nga ai, Marhta gaw manam daw ai wa re majaw, Yesu a matu lusha lajang lai wa ai. Shi dai bungli hpe n galaw yang, kaga kadai mung n galaw nga ai. Ra kadawn ai bungli langai mi mung rai nga ai. Raitim, shi a manghkang gaw, shi a kanau hpe mung, dai bungli hta shang lawm shangun mayu ai. Bungli langai hpe sha grai myit maju jung nna, kaga bungli ni hpe hkra machyi shangun ai gaw n kaja nga ai . Taawra hpu nau ni e, ‘rai tim’ ngu ai ga si gaw grai ahkyak ai. Yesu gaw Marhta hpe, “Marhta, Marhta, nang gaw amu law law a majaw myit ru myit tsang nga ndai, rai tim, lam langai sha ra ai, Mari gaw grau kaja ai daw hpe lata la kau sai,” ngu nna tsun lai wa ai. Nang bungli law ai rai na re; na a hpaga lam hta rawt jat wa na matu shakut shaja ra ai; nang gaw jahpawt jau jau rawt nna, hpang hkrat ai hku yup ra shang ra ai. Ndai ni gaw Ra kadawn ai bungli ni rai na re. Raitim…rai tim… Prat gaw bungli galaw na matu lam langai sha kun? Nang gaw lam langai ngai a matu bungli galaw ai. Nang gaw dinghku a matu bungli galaw nga ai raitim, dinghku hte aten jaw nga ai kun? Shanhte hpe shinggan woi pru ai kun? Shanhte a wenyi masa hpe nang yu ya nga ai kun? Nang grai shakut nga ai, raitim…rai tim… hkring mi hkring sa la u. Yesu tsun ai gaw, “Nang gaw lam law law hta bungli law nga ai raitim, ra kadawn ai lam langai mi nga ai… na a dinghku hpe mung yu gawn u ngu nna Tsun lai wa ai. Ra kadawn ai lam hpe n tara ai hku myit maju jung wa yang dai gaw n hkru n kaja ai wa de gale mat wa shangun nga ai.” 2) Martha A Bungli Gaw Kaja Ai Bungli rai nga ai. Marhta gaw Yesu a matu lusha shadu nga ai. Dai zawn magam gaw Kaja ai bungli rai nga ai; dai hta n hkru n kaja ai, yubak hpa mung n nga ai. Raitim, Yesu gaw shi hpe daru lai wa ai. Ra kadawn ai hte kaja ai bungli rai tim, dai aten hta, Yesu gaw Shi a wudang lam de sa wa ai ten hta, grau kaja ai magam bungli ni rai nga ai, dai hpe Mari gaw Yesu hpe grau kaja ai hku jaw lai wa ai. Dai aten hta, Yesu grau ra sharawng nga ai gaw, malu masha hta grau nna, Shi a ga madat mara na masha hpe rai nga ai. Hkawhkam Shawlumon tsun ai gaw, “Sumsing lamu a npu e galaw ai lam shagu a matu aten nga ai: shangai ai aten hte si ai aten, hkai ai aten hte shu la ai aten, sat kau ai aten hte shamai shatsai ai aten, jahten sharun ai aten hte gawgap ai aten, hkrap ngu hkrap ngoi ai aten hte ka manawt ai aten nga ai… (Hpj.1-8) tsun da nga ai. Prat hta magam bungli gaw shi shara hte shi htuk manu ai ten nga ai shawng shara jaw ra ai ten mung nga nga ai. 3) Marhta a bungli gaw nawku htung hte seng ai shingra tara rai nga ai Yesu a matu lusha lajang ai bungli gaw chyoi pra ai bungli rai nga ai, rai tim Yesu gaw Marhta hpe daru lai wa ai. Makam masham hte seng ai bungli yawng gaw kaja ai ngu n tsun lu ai. Anhte a shani shagu na lit magam ni hpe koi nna nawku htung hte seng ai magam bungli ni hpe sha gabaw da jahpai gawlaw kau ai gaw nbyin ging nga ai. Dinghku a kawa langai mi gaw, dinghku a matu gumhpraw tam amu galaw na malai, n ra ai aten ni hta nawku hpung mying gang nna dai hku sha ten shalai kau ai gaw, shut shai nga ai lam rai nga ai. Nawku hpung kata e akyu hpyi ai hte shinggyim wuhpawng magam bungli ni hta galaw ai lam gaw kaja ai, raitim shi hta kam hpa nga ai dinghku a matu gumhpraw tam na matu hprai ai hku na galaw nga ai lam gaw nbyin ging nga ai. Dai hte maren, dinghku langai a kanu langai mi mung, nta bungli galaw na malai nawku jawng hta sha aten shama taw ai lam mung shut shai nga ai lam rai nga ai. Tsawra ai hpunau nauna ni e, prat hta akyu hpyi ai hte magam bungli, gaw hkam kaja ai hte rau jawm pawng galaw ai hkrang zawn rai ra ai. Langai hpe kaga langai mi hte n mai jahpai galaw kau nga ai. Anhte a lit hpe san seng ai myit hte gun hpai na matu shaga la hkrum ai, dai aten hta sha ‘Yesu a lagaw nhpang e maria zawn sha sa dung nga na matu’ mung ra nga ai. Marai langai ngai a lagaw nhpang e dung ai gaw sape langai a hkrang masa mung rai nga ai; sharin hkam la ai a hkrang masa mung rai nga ai. Anhte gaw mungkan a myit tsang lam ni hpe tawn da nna, Yesu a lagaw nhpang e chyahkring hkring sa dung ra ai. Shi a lagaw nhpang e dung nga ai gaw, ngwi pyaw simsa ai lam hkam la lu ai; Shi a lagaw nhpang e dung ai gaw n-gun atsam lu la nga ai; Shi a lagaw nhpang e dung ai gaw hpaji byeng-ya rai nga ai; Shi a lagaw nhpang e dung nga ai gaw asak rai nga ai. Prat hta lam law law gaw ra kadawn nga na re raitim maga mi hta ndai lam ni gaw shadawn shadang n nga ai sha Yesu a lagaw nhpang e dung na ra kadawn ai lam rai nga ai. prat hta e simsa lam a matu ra ai, si hkrung si htan hta hkring sa na matu ra ai hte htani htana ngwi pyaw simsa lam a matu mung ra nga ai. |
CHYUM MUNGGA DAW NI:-
Ningpawt Ninghpang 18:1-10a ….. Abraham gaw shi hpang de du sa wa ai manam masum hpe hkap daw jaw ai a marang e, shadang sha lu na lam ga sadi jaw ya ai hkrum sai.
Kolose 1:24-28 …. Kasa Pawlu htawn shana ai mungga gaw: moi chyaloi nhkoi prat mi hte prat mi Karai Kasang makoi magap da nna, ya e Hkristu hta shi a amyu masha ni hpe shadan dan ai mungsung rai nga ai.
Luka 10:38-42 ……. Yesu gaw Martha yan Maria shan nau a nta de sa chyai ai.
#homily
#rvakachinservice