KANU KAWA SHAGRAU POI ( PARENTS’ DAY )
“NNU NWA NI HPE HKUNGGA LARA DI U”
LABAU LARA KADUN
Myanmar Mungdan, Kahtawlik Nawku Hpung hta Kanu Kawa Shagrau Poi Masat hpe galaw hpang ai labau lara kadun hpe, chye mayu ai ni mung nga na re ngu kam ai. Dai majaw, mu sawk sagawn ai hpe tang madun dat lu nngai.
Myanmar Mungdan Kahtawlik Nawku Hpung hta e, shaning 1950 lam yan kaw nna Kanu Kawa Shagrau Poi hpe lamang kaba langai hku galaw wa sai lam chye la lu ai. Lashum ga hku nna, Tara Kanu Shi hta na htihkum 4, “Na a prat galu u ga, nnu nwa ni hpe hkungga lara di u” ngu ai hpe la da nga ai. Ya daini, Myanmar Mungdan hta, Saradaw Ginwang 16 nga nga mali ai. Dai hta Jau Ginwang ni law law nga li ai. Nawku Hpung masha kashu kasha ni, tinang a chyeju madu kanu kawa ni hpe hkungga lara ai gaw; Karai Kasang ra sharawng ai lam re hpe grau chye na hkawnhkrang manu shadan chye na matu, ndai ‘Kanu Kawa Shagrau Poi’ hpe galaw nga saga ai rai.
SAN JOACHIM YAN ANNA A POI
Nawku Hpung matsun maroi ga (tradition) tsun da nga ai gaw, Joachim yan Anna gaw Chyoipra Maria a kanu yan kawa rai mali ai. July Shata 26th ya hta, San Joachim yan Anna hpe myit dum shagrau ga ai. Joachim yan Anna gaw kashu kasha lusu wa na matu, lusha gam akyu hpyi ai lam hpe grai shakut lai wa masai. Jahtum e, Karai Wa jaw ai kumhpa shayi ya langai mi hpe shangai shaprat lu masai. Dai shayi sha a mying shingteng hpe Maria (Mary) ngu nna shamying da ma ai. Maria gaw Karai Yesu a Kanu tai wa sai. Shing re majaw, San Joachim yan Anna gaw Madu Yesu a kaji kawoi (hkaiji yan hkai) yan mung rai nga mali ai.
KANU KAWA POI
San Joachim yan Anna a poi masat ninghtoi hpe la nhtawm, Myanmar Mungdan Kahtawlik Nawku Hpung gaw, Kanu Kawa Poi shagrau masat hpe galaw ai lam rai mali ai. Kaga maigan mungdan ni hkan gaw, kanu ni a poi ninghtoi (Mothers’ Day), kawa ni a poi ninghtoi (Fathers’ Day) nga nna, laksan galaw lam nga mali ai. Kanu kawa ni hpe poi lamang langai mi hta sha hkungga lara ai lam gaw, kaga mi garan ginhka n ra ai sha, rau langlata sha hkungga jaw ai, chyeju dum ai hte tsawra kabu gara lu ga rai. July 26th ya hta Kanu Kawa Poi hpe galaw ai gaw, Myanmar Mungdan hta sha nga ai. Kaga mungdan hkan Parents’ Day hpe galaw ai ninghtoi kaga ni hta galaw ma ai.
MAKAM MASHAM KABA AI
San Joachim yan Anna gaw nawku makam masham kaba ai shanla rai mali ai. Dinghku de ai hpang, shaning 20- ning daram hta kasha n lu ma ai. Dai hpang e she, Maria ngu ai shayi sha hpe lu ma ai. Dai majaw, ndai poi a marang e, shan a kangka ai hte kanu kawa lit hpe gunhpai ai lam hpe hkungga shakawn shagrau ai rai li ai. Maria hpe shapan shalat pawnba let makam hkringhtawng hpe ginlen ya ma ai.
JOACHIM A LAM
Apocryphal ngu ai Hpunau Protestant ni n hkap la ai laika langai hta tang madun tawn ai gaw, Joachim gaw lusu ai masha langai rai lu ai. Masha ni e hkungga lara hkrum ai wa mung rai nga ai. Shan lahkawng kasha garai n lu ai ten, tsawmra mi myit ru myit tsang hkrum manu ai. Dai ten ni hta akyu hpyi grai shakut sai. Jahtum e; Karai jaw ya ai shayi sha Maria hpe lu la ma ai majaw, grai kabu gara let asak naw kaji yang, shi hpe Karai kaw apnawng jaw ai lam galaw ma ai.
NAWKU DAWJAU HKRANG HTA SHALAWM DA AI
San Anna hpe shakawn shagrau ai poi ninghtoi hpe, grau jau ai kaw nna masat da sai lam chye lu ai. Jawprat 14 hta gaw, San Joachim hpe mung nawku dawjau hkrang (Liturgical Observance) hta bang shalawm la sai. Dai majaw, ndai sanpra ai masha yan Joachim hte Anna hpe July 26th ya hta shagrau sha-a ai lam rai li ai. Ndai Sanpra ai Joachim yan Anna hpe; kaji kawoi ni hpe makawp maga ya ai sanpra masha, kanu kawa ni laklai makawp maga ya ai sanpra masha ngu nna masat da nga ai.
KUNDINGHKU HKRINGHTAWNG
San Joachim yan Anna a poi ninghtoi gaw, kundinghku a ahkyak ai lit lamang hpe madun dan ya nga ai. Grau nna ma ni hpe makam hkringhtawng ginlen ya ai hta kakji kawoi ni a lit lamang mung grai ahkyak nga ai hpe shadan shadawng dan nga mali ai. Kanu kawa ni a tsawra myit, ma ni hpe shalat shapan ai hta kangka mangan -nga hkra shakut shaja ding-yang rai na matu mung ninggun jaw ya nga ai rai.
“Nu Wa ni yawng asak galu ngwipyaw hkamja ai chyeju wunli hte hpring tsup nga malit ga law!..”
Ka lajang ai; Rev.Fr.John Dashi Naw Lawn
