(17th Ordinary Sunday, Year C)
PRANWAN LADAW LABAN (17), C SHANING
(17th Ordinary Sunday, Year C)
Hkristu hta tsawra hkungga ai nu wa hpu nau ni ndai laban gaw pran wan ladaw hta laban 17 rai nga ai.
Sagu rem ai ma kaji langai gaw Laban jahpawt langai mi hta shi a Sagu ni hpe rem sin nga yang Nawku jawng na dingsi nsen ni hpe na ai shaloi, hkai sun makau na lam hku kam sham ai hpung masha ni hkawm sa wa ai hpe shi mu nna Shi mung Karai Kasang hte matut mahkai mayu ai myit pru wa ai. “Raitim dai ma gaw ngai hpa tsun na kun?” ngu myit lai wa ai. Shi gaw akyu hpyi ga langai mi hpe mung n sharin yu ai. Raitim lahput hput di let, – a, b, c, d, ngu ai laika ga si ni hpe hti hpang nna z du Hkra shi a akyu hpyi ga ni hpe lang hte lang tsun lai wa ai.
Dai ten e masha langai mi gaw, dai ma a nsen hpe na nna, nam sumwum na lagyim yu dat ai shaloi dai ma gaw lata mayawn, myi di nna, ‘j, k, l, m…’ ngu tsun nga ai hpe mu lai wa ai. Dai la wa gaw mau let, “, nang hpa majaw a b c d ni hpe hti nga a ta ma e?” Ngu san dat yang Dai ma gaw, “Ngai akyu hpyi nga ai, shalang wa e,” ngu nna htan tsun lai wa ai. Ngut nna dai ma gaw, “Ngai gaw akyu hpyi ga langai mi mung n chye ai, salang wa e Raitim, Karai Kasang ngai hpe bau maka nna, sagu ni hpe mung bau maka ya na hpe ngai ra sharawng ai.
Dai majaw, ngai chye ai ga si yawng hpe tsun dat yang, Shi gaw dai laika ga si ni hpe shinggyin la nna, ngai tsun mayu ai hte hpyi mayu ai lam ni yawng hpe ka shapraw ya lu na re ngu ngai myit mada kam sham ai ngu nna tsun dat ai. Dai masha wa gaw mani sumsai hte, “Na a myit masin hpe shaman ya u. Nang tsun ai ga teng nga ai, Karai Kasang madat ya na re!” Ngu Tsun let, dai shani e shi na lu na kaja dik htum ai mungga hpe na lu sai hpe chye na la nna, nawku jawng de lai sa wa ai.
Dai gaw jaw ai akyu hpyi ai myit jasat rai nga ai. Ma kaji gaw ma langai zawn kamhpa ai myit hte sumsing lamu na Kawa kaw akyu hpyi nga ai.
Ndai bat na kabu gara shiga hta kasa ni gaw Yesu akyu hpyi nga ai hpe mu nna, akyu hpyi ai ladat hpe sharin ya na matu hpyi shawn lai wa ai lam hpe na lu ga ai. Yesu akyu hpyi nga ai hpe mu ai majaw, kasa ni mung shi zawn akyu hpyi na matu n-gun lu lai wa ai. Kawa hte ga shaga nga ai shaloi, Yesu a hkrang hte myit jasat hta, kasa ni shi hpe kasi la mayu wa ai lam langai ngai nga na gaw teng sha rai nga ai. Kasa ni hpyi nem ai shaloi, Yesu gaw “Anhte a Wa” ngu ai akyu hpyi ga hpe jaw ya ai sha n-ga, akyu hpyi lam shagu a hpang e nga ra ai myit masa ni hpe mung sharin ya lai wa ai. Shi gaw lam lahkawng hpe sharin ya lai wa ai: myit ndaw nhten shakut shaja ai hte ma zawn kamhpa ra ai lam rai nga ai. Yesu a prat hta akyu hpyi ai lam hte anhte akyu hpyi ai ten shagu e myit hta bang da ra ai akyu hpyi ai myit jasat ni hpe dai ni e bai myit yu nga ga.
1) Yesu a prat hta akyu hpyi ai lam
Yesu gaw anhte yawng a akyu hpyi ai lam hta kasi ningli rai nga ai. Kabu Gara Shiga hta shi gaw bum ntsa de (sh) katsi katsang re ai shara ni de shi hkrai sha sa nna akyu hpyi na matu ayan galaw lai wa ai hpe mu lu ai. Kabu Gara Shiga ni hta Yesu a sak hkrung lam hpe kadun dawk tsun dan da tim, ‘akyu hpyi ai’ hte ‘akyu hpyi ai’ ngu ai ga si ni hpe anhte a Madu hpe tsun ai shaloi n law htum hkun manga lang tsun lang da ai hpe mu lu ai. Akyu hpyi ai gaw, Yesu a prat ting hta aten hte n-gun atsam law law hpe la lai wa ai.
Yesu sumsing lamu de lung wa ai hpang, ya e mung shi a wenyi magam bungli gaw akyu hpyi ai lam rai nga ai. Anhte a yubak mara ni hpe htingrai htingrat ya ai magam bungli hpe Kalvari Bum ntsa e ngut kre sai raitim, hkye hkrang la ai magam bungli gaw matut manoi galaw nga ai hte sumsing lamu hta anhte a matu akyu hpyi ya ai hku nna naw nga nga ai.
Hebre masha ni hpang de ka shagun dat ai laika hta, “Yesu gaw shi a marang e Karai Kasang hpang de sit sa wa ai ni hpe, tsep kawp hkye hkrang la lu nga ai, kaning rai nme law, shanhte a matu hpyi nem ya na matu, tut nawng hkrung nga ai (7:25)” ngu nna tsun da nga ai. San Pawlu mung dai zawn myit ai lam hpe tsun dan nga ai, “Tara jeyang ai wa gaw kadai rai ta? Shi gaw si hkam nna bai hkrung rawt wa sai, Karai Kasang a hkra maga e hkaw dung nga ai hte, shi gaw anhte a matu mara hpyi nem ya nga ai (Roma 8:34). Akyu hpyi ai gaw anhte a Madu mungkan ga ntsa hkawm sa ai ten hta ahkyak ai shara hta lawm nna, dai gaw, ya du hkra, sumsing lamu hta Yesu a ahkyak dik ai magam bungli rai nga ai. Akyu hpyi na matu aten n jaw ai rai yang kadai mung Yesu a hpang hkan nang ai wa n mai byin nga ai. Anhte gaw Karai Kasang hte rau aten shalai ai sha n-ga, tinang a magam bungli, shamu shamawt ai lam ni yawng hkra hpe akyu hpyi ai hte ka-up da ra ai.
2. Akyu hpyi ai a wenyi lam
Dai ni na Kabu Gara Shiga hta, Yesu Hkristu gaw akyu hpyi ai lam a wenyi lam hpe “akyu hpyi ai hta galoi mung n hkring n sa rai ai masha” ngu ai ga shadawn hte lawu na ga si ni hte sang lang dan nga ai.
1) N sim n sa akyu hpyi ra ai. Nkau mi hpe Karai Kasang gaw anhte n hpyi ai sha jaw ya ai rai tim, nkau mi hpe gaw anhte hpyi ai, raitim ma
masam yu nna matut hpyi ai shaloi she jaw ya ai rai nga ai. “Galoi mung n-htum n-wai hpyi ai manang” ngu ai gaw, akyu hpyi ai hta myit rawt ai hte n-gun n yawm ai sha shakut shaja na matu Yesu n-gun jaw ai kasi ningli rai nga ai. San Pawlu mung tut nawng akyu hpyi nga na matu shadum jahprang ya ai. Ahkying ladaw shagu hta e Akyu hpyi nna hpyi nem ai lam amyu myu hte dai Wenyi hta tutnawng e akyu hpyi nga nna, a maja nga let chyoi pra ai ni nlang hte a matu mara n-gun n yawm ai sha, tut tut akyu hpyi nga mu (Ehpesu 6:18). Ngu nna tsun da nga ai. Myit rawt let, tut nawng akyu hpyi ai gaw, anhte a makam masham hpe grau sung ai hku madun dan ai sha n-ga, anhte a makam masham hpe grau jat wa shangun lu nga ai.
Kalang lang Karai Kasang gaw nang hpyi ai shaloi kalang ta shawng n jaw nna, jahkring da ya chye ai. Dai zawn lam hpe myit daw myit hten ai lam hku n re ai sha, Karai Kasang anhte hpe wenyi lam hta shaman shakyang ya ai hku nna mu mada ra nga ai. Karai Kasang gaw mungkan lam hta kaja dik ai hpe lu na matu shakut shaja na hpe shaman shakyang ya ai zawn, wenyi lam hta mung kaja dik ai hpe lu na matu shakut shaja akyu hpyi na matu shaman shakyang ya nga ai. Ndai hku nna wenyi lam ngang kang ai ni tai wa hkra sharawt ya nga ai.
ii) bai nna anhte gaw Ma ni zawn kamhpa myit hte akyu hpyi ra ai:
Karai Kasang gaw anhte a Kawa rai nga ai. Karai Kasang kaw akyu hpyi ai shaloi, “Anhte a Wa e” ngu nna shaga na matu Yesu sharin ya ai. Karai Kasang hte anhte a lapran na matut mahkai lam gaw Kawa hte kashu kasha ni a lapran na sung htum ai hku matut mahkai lam rai nga ai. Karai Kasang gaw anhte a hpyen wa (sh) zingri zingrat ai wa n rai nga ai, shi a shaman chyeju hpe atik anang la ra ai wa mung n re. De a malai, anhte hpyi ai hta jan nna jaw ya mayu ai Kawa mahtang rai nga ai. Shinggyim kawa ni gaw mara lu ai ni rai nga ai hte, kalang lang n kaja ai lam ni galaw chye tim, shanhte a kashu kasha ni hpe kaja ai lam ni jaw mayu nga ai. Dai majaw, sumsing lamu na Kawa gaw shi kaw hpyi ai ni hpe kaja ai kumhpa hte lak lai ai kumhpa ngu ai Chyoi Pra ai Wenyi hpe grau nna jaw na n rai a ni? Anhte a hpyi shawn ai lam ni gaw Shi a sari sadang hte maren rai nna, anhte a matu akyu rawng ai rai yang, Karai Kasang sharawt dat ai lata ni gaw galoi mung kaman lila hte bai n gin htang wa na re.
Chyum hpaji ninghkring Alexander Maclaren tsun lai wa ai gaw “Anhte a sumsing Kawa a tsawra myit gaw, n hkru n kaja ai lam n nga ai, n chye chyang ai lam n nga ai, kanu kawa tsawra myit a npawt nhpang hkrang mahtang rai nga ai.” Nga nna tsun lai wa ai. Shi gaw anhte hpe grai hkum tsup ai hte hpaji rawng ai hku tsawra ai majaw, Shi a kashu kasha ni ra kadawn ai lam ni hpe teng sha jaw ya na rai nga ai. Raitim, ma ni gaw nlung ni hpe muk, lapu ni gaw nga, n gaw gawk ni gaw u di re ngu nna shut chye nga ai. “Dai majaw Karai Kasang gaw anhte hpyi shawn ai hpe n ningdang kau ai. Shi gaw anhte hpe gung n jaw ai.”
Tsawra ai nu wa hpu nau ni, anhte akyu hpyi ai shaloi, ma langai mi kawa hpe kam sham ai myit hte hpyi ai zawn anhte mung akyu hpyi ra ga ai. Karai Kasang gaw anhte hpyi ai mai kaja lam hpe galoi mung ningdang kau na n re, anhte hpe hkra machyi shangun ai lam hpe mung jaw na n rai nga ai.
CHYUM MUGGA DAW NI:-
Ningpawt Ninghpang 18:20-32 ……. Abraham gaw Karai Kasang hpe hpyi nem ai hta, Sodom hte Gomorra mare na dinghpring ai masha ni hpe hkye la na matu rai nga ai.
Kolose 2:12-14 …… Kasa Pawlu Kolose masha ni hpang de shagun dat ai laika hta, nanhte kashin kamun hkam shaloi, Hkristu hte rau lup kau ai hkrum manit dai; Hkristu hte rau sharawt la ai hpe mung hkrum manit dai.
Luka 11:1-13 ….. Yesu gaw sape ni hpe akyu hpyi ai lam sharin ya wu ai.
#homily
#rvakachinservice