Wa Sarabyin Leo gaw, Angelus akyu hpyi na matu, San Petru Htingnu shawng hta zuphpawng nga ai hpung masha ni hpe tsun shaga ai hta, ‘Madu a Akyu hpyi ga’ a ahkyak ai lam hpe shadum ya ai, Madu gaw nanhte a matu galoi mung nga nga ai hpe ahkyak shatai tsun shalawm ai raitim, shi a kaja ai lam a majaw, nanhte hpe galai shai shangun ai lam hpe mung tsun shalawm ai.“Madu a Akyu Ga” ngu ai akyu hpyi ga a atsam hte ahkyak ai lam gaw, Wa Sarabyin Leo XIV a, July shata 27 ya Laban shani na Angelus mungga a madung rai nga ai.
San Peter’s Square kaw zuphpawng nga ai kam sham ai hpung masha ni hpe tsun shaga ai shaloi, Wa Sarabyin Leo gaw, dai shani na Kabu Gara Shiga hta Yesu gaw shi a sape ni hpe shrin ya ai Madu a Akyu Ga hpe myit sawn sumru yu let tsun shadum n-gun jaw lai wa ai.
“Ndai akyu hpyi ga gaw Hkristan yawng hpe kahkyin gumdin shangun ai akyu hpyi ga rai nga ai” nga nna Wa Sarabyin tsun ai, bai nna, Madu Yesu gaw, “san seng ai, ma kasha zawn kam hpa ai, nden marai tup the Karai Kasang hpe “‘Abba’, ‘Wa’ ngu nna shaga na matu anhte hpe saw shaga nga ai hpe tsun shadum ya nga ai. Kahtawlik Nawku Hpung a Catechism tara laika hta mung, ndai lam hpe atsawm hkrak sha tsun dan da ai, “Shing rai Madu a Akyu Hpyi Ga gaw Kawa hpe anhte hpe hpaw shadan dan ai lam rai nga ai.
Wa Sarabyin Leo matut tsun ai hta, Kawa hpe kam hpa myit hte akyu hpyi ai shaloi, “anhte gaw tsawra hkrum ai kashu kasha ni re ai hpe grau nna mu tam wa ai hte shi a tsawra myit kaba ai hpe grau chye na wa ai” hpe ahkyak shatai tsun shaleng da nga ai.
Aten shagu hta nga nga ai
Daini na Kabu Gara Shiga hpe kalang bai nhtang yu yang, “n myit mada ai shana e du wa ai manam hpe hkap tau la na matu manang langai hpe shana e rawt nna karum hpyi ai, shi a kashu kasha ni hyi ai hpe kaja ai hpe jaw ya ai kawa langai a arawn alai ni gaw Karai Kasang a jet kawa tai ai arawn alai hkrang sumla hpe hpaw dan ai lam nga ai ng anna wa Sarabyin anhte hpe myit yu shangun nga ai.
Ndai hkrang sumla ni gaw, “Karai Kasang anhte shi hpang de sa wa ai shaloi, anhte hpe kaning re ai mabyin masa lam hta ratim galoi mung shingdu de n kayin kau ai” ngu ai hpe shadum ya nga ai Wa Sarabyin matut tsun ai.
Shi gaw galoi mung madat mara ya nga ai, “kalang lang chye na yak ai aten ni hta raitim, anhte chye na ai hta lai nna, hpaji byeng-ya hte lajang ya ai majaw re”. Nchye na, yakhkak ai aten ni hta pyi, kam hpa myit hte akyu hpyi ai hpe n jahkring kau ga, shi hta anhte galoi mung nhtoi hte n-gun atsam hpe mu lu na re” nga nna Wa Sarabyin aja awa tsun shadut da nga ai.
Dai hpang Wa Sarabyin Leo gaw, Madu a akyu hpyi ga hpe tsun ai shaloi, “Karai Kasang a kashu kasha ni tai wa ai chyeju hpe shagrau ai n-ga, Hkristu hta hpunau nauna ni zawn shada da tsawra lu ai kumhpa hpe bai htang na matu mung tsun shaleng dan ai” nga nna tsun shadum ai.
Karai Kasang a mai kaja ai lam hpe nanhte a prat hta shadan shadawng nga mu.
Bai nna, Wa Sarabyin gaw, “Karai Kasang hpe ‘Anhte a Wa’ ngu shaga ai shaloi, Karai Kasang a kashu kasha ni zawn arawn alai madun ra ai” ngu nna Carthage mare na San Pra ai Cyprien a ga hpe lakap nna tsun ai. Dai hte maren, San Pra ai John Chrysostom mung “N hkru n kaja ai hte shinggyim masha myit n myit ai hpe jum tek da nga yang gaw, matsan dum lama ai Karai Kasang hpe Kawa ngu nna n lu shaga ai” nga nna tsun da nga ai.
kaga masha ni hpe n hkru n kaja ai hku galaw na rai yang “Anhte gaw Karai Kasang hpe “Wa” ngu nna akyu hpyi n mai hpyi ai. De a malai, “shi a myi man gaw anhte a myi man hta dan dawng wa lu hkra, shi a kaja ai lam, myit galu kaba ai lam, matsan dum lama ai lam hta anhte hkum anhte galai shai wa ra ai ngu Wa Sarabyin tsun let ai.
Hpang jahtum, Wa Sarabyin gaw, kam sham ai hpung masha ni hpe Karai Kasang anhte hpe tsawra ai zawn tsawra lu na matu: “hpaw tsun ai, myit galu kaba ai, shada da myit tau ya ai, hkalem hkalau ai lam n nga ai sha” tsawra myit hpe hkam sha lu na matu, dai ni na nawku daw jau ai lam hku nna n-gun lu la na matu saw shaga dat ai.