Daini gaw sanpra ai Martha a Feastday poi shani rai nga ai. Sanpra ai Martha gaw Lazaru hte Maria yan a kana rai nga ai.

Daini kabu gara shiga hta Madu Yesu Hkristu Sanpra ai Martha a dum nta de sa du ai lam gaw shi a kanau Lazaru si mat ai majaw shalan shabran na matu sa du ai lam rai nga ai.

Madu Yesu Hkristu hpe Martha hkap tsun ai lam hta Madu e nang ndai shara kaw nga nga ai rai yang gaw nye a kanau Lazaru si na n rai nga ai. Nang hpyi shawn ai lam ni yawng hpe kawa Karai Kasang gaw madat mara ai hte shaman ya nga ai hpe ngai chye nngai ngu nna tsun u ai.

Madu Yesu Hkristu bai htan ai lam hta ngai gaw bai hkrung rawt ai lam hte asak hkrung ai lam rai nga ai. Ngai hpe kam sham ai wa gaw si mat timung ahkrung nga na ra ai. Ga ndai hpe nang kam sham nni? Ngu nna Martha hpe san wu yang Martha gaw ngai kam sham nngai ngu nna bai htan nu ai.