Kaja wa teng sha n hkru n kaja ai myit ni gaw, masha a kraw kata kaw na sha prut pru wa ai re lam masha unawng uwa hpe Madu Yesu tsun sharin shaga nga ai. Mara ngu ai gaw, shi shi hkrai sha byin wa ai n rai. Anhte marai hkum shagu a myit salum kata yaw shada ai lam ni kaw na sha byin pru wa ai rai nga ai. Dai mara hta hkrat sum mat ai, mara a mayam ni byin taw nga sai, mara lu ai ni hpe hkye mawai la na matu, Madu Yesu du sa wa ai re.

Madu Yesu gaw Karai Kasang a tsawra myit hte mara dat ya ai. Anhte hpe tsi shamai ya ai, ndai chyeju ni hpe madun dan na matu, mungkan ga de yu sa wa ai majaw, lama na Madu Yesu hpang maga de e, teng sha Karai Kasang hpe kam sham ai hte hkan tam ai rai yang, mayak manghkang lam ni a matu ra nga ai chyeju ni nga na gaw teng sha rai nga ai. Karai kasang chyu sha anhte a myit salum hpe san seng ya lu ai. Shi a hpung dagu atsam hte hpraw tsawm san seng ya lu ai re.

Dai ni e galaw ai Roma mare na Chyoipra ai Maria a nawku htingnu kaba a poi gaw, Anhte yawng hpe chyoi pra ai wenyi shanu nga ai htingnu re ai hte, anhte ni mung san seng sanpra ai magam hta, ngang kang hkra shakut ra ai lam hpe, shadum ya nga ai. Na a hkum hkrang htingnu hpe mara tsin yam ni sha, ga up taw nga ai kun? (sh) Karai Kasang a chyeju ni shara la taw nga sai kun?