Dai ni kabu gara shiga hta e, Madu Yesu gaw kasa ni a myit kraw hta, shi kadai wa re ai hpe chye la sai hte rau, shi a ruyak jam jau hkam ai lam, ap nawng daw jau ai lam ni hpe matut hkaw tsun dan nga ai. Dai lam ni na la sai majaw kasa ni gaw, hkrit kajawng mat nna, nni nkri jam jau hkam, sakse hkam ra na lam ni hpe atsawm n chye madat shi ai Petru gaw, Madu Yesu hpe makawp maga nna, tsun mat wa ai. Teng sha nga yang Madu Yesu sharin shaga ya ai si hkrung si htan ngu ai lam gaw, mung sung ga sung rai nga ai.

Dai hta sha n ga, shingra tara hku nna mung, si mat ai ngu ai gaw, prat nnan hpe jaw ya ai lam rai nga ai. Shingrai hpun tu wa na matu, nli tum gaw ga gabrang ra ai. Bai ma shangai na matu kanu gaw, shawng nnan machyi hkam ra ai. Hpun lap lali ni prut pru wa na matu mung, alap dingsa ni run hkrat mat wa ra ai lam ni hpe shawng sharin dan nga ai.

Dai hte maren sha anhte ni mung, htani htana a grin nga ai asak lu la na matu gaw, shawng si ra nga ga ai. Anhte ni Madu Yesu hta si mat ai hte, anhte hkum nan si mat ai, anhte hkam la ra ai  wudang hpai let, ap nawng daw jau ai lam ni galaw shakut shaja nga ga ai.

Ya ten nang ngai ru yak jam jau hkam let, Madu Yesu a hpung shing kang hta shang lawm hkam la lu na jin jin rai sai kun?