Htai Ya Ai Wa – Wa Jau Dr. Joseph Gawlu Yung Wa

Ga San –   1.Hkalup hpung ni hte Kahtawlik ni, num jaw num la hkat ai shaloi, lama na Hkalup hpung num jan gaw hkalup hkam la sai rai yang, Kahtawlik la kaw wa nna, hpung bai wa shang jang mara lu na kun?   

  2.   Hkalup hkam la nna, Kahtawlik Hpung na Kashin Kamun hpe bai hkam la mai na kun?

Htai –  “Makam masham” ngu ai gaw Karai Kasang a chyeju hte Shi kaw na kumhpaw kumhpa san san rai nga ai; anhte shakut nna lu la ai n re, nga nna Ehpesu 2:8-9 hta tsun da nga ai.  

Karai Kasang gaw, maigan amyu ni hpe mung (dai gaw anhte myusha ni hpe mung tsun ai re), asak hkrung ai hte seng ai myit malai lam jaw manu hka, nga nna Kasa 1:18 hta Karai Kasang hpe shakawn ma ai. 

Dai majaw, dinghku shang let, hkungran ai majaw, Hkalup hpung kaw nna, Kahtawlik de shang wa ai rai rai, Kahtawlik kaw nna Hkalup de bai nhtang wa mat ai rai rai, ahkyak ai ga-san gaw: nang shut hpyit mara kaw nna chyoi pra san seng ai prat de galai shai sani? Chyoi Pra ai Wenyi hpe hkap la sani, ngu ai rai nga ai.  Daini na aten hta, hkristan makam masham hpung ni mati ni zawn tu kabrawng nga ma ai.

Bai Baptisma ngu ai hkap lup hkam ai, kashin kamun hkam ai hpe Mt. 28:19 hta rawng ai, “Kawa a, Kasha a, Chyoi Pra ai Wenyi a amying Ningsang hta ngai nang hpe baptisma jaw nngai” ngu ai hkrang hpe lang ai rai yang gaw, Kashin Kamun hpe (2) lang bai n jaw ra sai.

San Ai Wa –  Zau Bung Jau Aseng, Zau Bung Mare kaw na, ya, Loije kaw shanu nga ai Roselin Labya Bawk Htoi