Karai Kasang Jaw Ai Simsa Ai Hpe Hkam La Ai ( The Experience of His Peace: Experiencing God )

Daini, anhte jawm sumru akyu hpyi na ga-baw gaw:

Karai Kasang hte Hkrum Ai, shing n rai, Karai Kasang Jaw ai ngwi pyaw Simsa ai hpe Hkam La ai, ngu ai rai nga ai.

Sumsing mungdan a ndai hkran de na anhte a prat hta – myit pu ba, myit tsang ai lam amyu myu hte hpring nga ai. Anhte hta na kadai mung dai hpe n tawt lai lu ai, raitim, Chyum Laika hta tsun da ai “anhte a simsa lam a Madu rai nga ai Yesu” hpe anhte lu da nga ai majaw chyeju dum ga ai. Shi hta anhte a shalan shabran ai hpe mu tam ga ai.

Daini, na a hkum hpe shi a simsa ai hte nnan bai hkayawp da ya na matu, shi kaw ap da ga. Nang myit hkrit, myit tsang ai, pu ba ai lama ma nga ai rai yang, bai hkrung rawt sai Madu Yesu hpang de la sa u. Sumsing lamu na san seng ai nsa hpe bai marawp la ga.

Chyum Mungga:

San Pawlu Htesaloni masha ni hpang de shagun ai Laika Lahkawng, Daw Kaba masum, daw kaji shi-kru (2 Htesaloni 3:16) hta:

“Ya, ngwi pyaw ai a npawt, dai Madu nan, nanhte hpe tutnawng e lam shagu hta ngwi pyaw ai, a jaw nga u ga. Dai Madu gaw nanhte nlang hte rau a nga nga u ga law” ngu shakram nga ai.

Karai Kasang hte hkrum ai ngu ai shaloi, sumsing mungdan hte bung pre dik ai lam ni hta na langai mi gaw “simsa ai lam hpe tam ai” rai nga ai. Simsa lam gaw mungkan masha ni e anhte hpe jaw ai n rai nga ai. Ndai mungkan gaw – shuk shanut ai, myit ru myit tsang hkrum ai, lama ma hpe lu la hkra ma-ja shakut ra ai, manu n dan ai lam ni hpe myit dik ai lam n nga ai sha, shachyut nna tam ai, ndai zawn re ai lam ni hte sha, gaw gap da nga ai.

Rai tim, Karai Kasang gaw, anhte ndai mungkan ntsa e naw nga ai aten hta pyi anhte a salum ni hpe shi hte anhte tsawra kanawn mazum ai nba hte makai hkayawp da ai kaw na pru wa ai sumsing mungdan a simsa ai hpe jaw ya nga ai.

Dai lam hpe, Hpilipi masha ni hpang de shangun ai Laika hta tsun da nga ai: Daw kaba mali, daw kaji, kru hte sanit (Hpilipi 4:6,7):

“Hpa lam hta mung myit hkum ru hkum tsang myit; lam shagu hta akyu hpyi nna tawngban ai hte shakawn kungdawn let, nanhte a hpyi mahpyi hpe Karai Kasang kaw shana nga mu. Shaloi chye chyang ai nga yawng hta grau lai ai Karai Kasang a ngwi pyaw ai gaw, nanhte a myit masin hte nanhte a myit mang ai hpe, Hkristu Yesu hta e bau sin na ra ai” nga nna n-gun jaw da nga ai.

Karai Kasang gaw, anhte a mungkan lam hte seng nna ru tsang ai lam ni hpe shi a agrin nga ai sumsing mungdan a ngwi pyaw simsa lam hte galai ya ai. Shi gaw anhte a mai kaja ai Kawa rai nga ai; anhte a salum ni hpe ru tsang shangun ai mayak manghkang ni hpe la kau ya nna, kaji dik ai lit ni hpe pyi shatsang ya na, Shi a Wenyi kaw na anhte n chye sawn lu ai simsa lam hpe jaw na, nga nna gasadi da nga ai.

Dai hte seng nna Madu Yesu tsun ai hpe Yawhan a Kabu Gara Shiga, Daw kaba, shi-kru, daw kaji sum-shi-masum (Yaw 16:33) hta hti lu ga ai:

“Nanhte ngai hta ngwi pyaw ai lu la myit ga, ngu nna, ndai ga ngai nanhte hpe tsun ni ai: nanhte gaw mungkan ga e nni nkri hkrum sha myit dai: rai timung, dakring dakan rai nga mu; ngai gaw mungkan ga hpe dang kau da ni ai.”

Madu Yesu hte kanawn mazum na matu tam shakut ai gaw, si ai hte anhte hpe jahten na matu maw mawn ai hpyen wa a masing mahkra hpe agrawp jahten kau lu ai Madu hpe anhte tam ai rai nga ai. Shi Madu hpe chye la ai wa gaw Awng Dang ai Wa ajet hpe chye la ai rai nga ai. Shi hpe chye la ai ni gaw, tinang hkum hpe shi a atsam hta shabawn hkayawp da ai rai nga ai. Anhte a myit tsang, hkrit kajawng ai salum ni hpe shi Madu a simsa ai Salum hta makoi da nga ai.

Dai lam hpe Esaia, Daw kaba hkun-kru, daw kaji masum (Esaia 26:3) hta ning nga tsun da nga ai: “Myit maju jung ai wa gaw, nang hta shamyet shanat nga ai majaw, nang ban sa nga shangun wu ai.”

Karai Kasang gaw, anhte a sak hkrung lam ni hpe shi a simsa ai hte masat da lu hkra – shi a kam ram ai hpe hkam la shangun mayu nga ai. Karai Kasang gaw galoi mung sadi dung ai ngu ai hpe chye ai kaw na pru ai myit ngwi simsa ai hpe ndai mungkan e n kashun la kau ya hkra, shi hta kam hpa nga na hpe ra sharawng nga ai. Shi galaw na ngu nna ga sadi da sai hpe shi kaja wa galaw na re. Shi hkum-nan tsun dan ai, shi a lam ni mung teng nga ai.

Simsa ai gaw – anhte galaw ai, myit ai, hkam sha ai ngu ai npawt nhpang hta, Karai Kasang gaw kadai rai nga ai ngu ai hpe shadan shaleng ya ai, bai, shi a hpring tsup ai atsam marai hta kam shamyet ai kaw na pru wa ai rai nga ai.

Daini, Karai Kasang gaw, sumsing mungdan a simsa ai hpe na a matu san da ya nga ai. Shi nang hpe jaw ai simsa lam gaw mungkan e jaw ai hpan n re ai majaw, kaning re ai manghkang hte ru yak lam ni hta rai tim, agrin nga na ra ai (Yawhan 14:27).

Tsawra chye ai, sumsing lamu na na a Kawa hpang de sit shang nna, na a ru tsang ai lam mahkra hpe ap kau u. Na ra ai lam ni hpe shi kaw hpyi u. Shi hta kam hpa nga u. Na tsawra ai Kawa a hkum tsup, ngang grin ai simsa ai hpe hkam la u. Na a nhtoi gaw, simsa ai lam a Karai Kasang hte myit masin salum mahkra hte jawm pawng ai kaw na pru wa ai apu asi hku nna masat da lu u ga.

Myit Sumru Akyu Hpyi Ga:

Nang, Karai Kasang hte rau kanawn mazum ai kaw na lu la ai simsa lam hpe sumru yu u. Na a kumhtaw n rai nga ai – hki ba, lit li, myit ru ai – lam ni hpe la kau na chyum mungga daw hpe sumru yu u. Ga shadawn, Yawhan, Daw kaba, shi mali, daw kaji, hkun-matsat (Yawhan 14:27):

“Ngwi pyaw ai gaw ngai nanhte hta da ya ma sade ai; nye a ngwi pyaw ai nanhte hpe ngai jaw made ai: mungkan ga na ni jaw ai zawn, ngai nanhte hpe jaw made ai n rai. Nanhte myit hkum ru myit, hkrit mung hkum hkrit myit.”

2. Nang hpe myit ru tsang shangun ai lam ni gaw hpa rai ta? Na a simsa ai hpe lagu la ai kau ya ai gaw hpa rai ta? Na a Kawa Karai Kasang a man e madun dan mayu ai, na a myit mang ai, masha ni, masa lam ni, hkrit tsang lam ni, wenyi hta gasat zingri hkrum ai lam ni gaw gara ni rai?

3. Petru a Shagun Laika Langai, Daw kaba, manga, daw kaji kru hte sanit (1 Petru 5:6-7) hta:

“Nanhte a myit ru myit tsang ai nan, shi a ntsa e kabai mara da mu” nga nna tsun da ai.

Nang hpe sharu shatsang taw ai lam mahkra hpe Karai Kasang hpe tsun dan na matu aten la u. Dai lam ni yawng hpe Shi a lagaw nhpang e sumpum da u. Dai lam ni yawng hpe “masha a hpaji marai” hta jan ai atsam hte shi hparan ya na ra ai hpe kam sham u.

Hpa majaw nga yang, Hpilipi, Daw kaba, mali, daw kaji kru the sanit (Hpilipi 4:6-7) hta ning nga tsun da nga ai:

“Hpa lam hta mung myit hkum ru hkum tsang myit; lam shagu hta akyu hpyi nna tawngban ai hte shakawn kungdawn let, nanhte a hpyi mahpyi hpe Karai Kasang kaw shana nga mu. Shaloi chye chyang ai nga yawng hta grau lai ai Karai Kasang a ngwi pyaw ai gaw, nanhte a myit masin hte nanhte a myit mang ai hpe, Hkristu Yesu hta e bau sin na ra ai.”

Hpungdim Dat Ga

Roma ni hpang de shagun ai Laika, Daw kaba, matsat, daw kaji, kru hta:

“Hkum shan myit gaw si mat ai lam rai nga ai; Wenyi a myit chyawm gaw, hkrung ai lam the ngwi pyaw ai lam rai nga ai” nga nna tsun da ai.

Anhte aten shagu hta mungkan a lam ni hpe, shing n rai, Karai Kasang hte seng ai lam ni hpe lata na ahkang nga nga ai. Chyoi Pra ai Wenyi hpe lata na myit ai rai yang, shi a apu asi ni hte hpring ai masha ni tai na maga de tsap nga ga ai. Mungkan a lam ni hpe lata ai rai yang chyawm gaw hkrat sum ai, myit ru tsang ai, hte manghkang ni nga ai maga de sa tsap hkrup na ga ai.

Mungkan lam ni gaw n grin ai, tut e galai shai nga ai. Anhte a Karai Kasang chyawm gaw htani htana agrin nga ai. Shi Madu a n-gun atsam, sadi dung ai hte ni htep ai lam ni gaw nang hpe grin ai ngwi pyaw simsa lam jaw ya u ga.

Yawng hpe Simsa lam a Madu Karai Wa shaman ya u ga!

By: Cardinal Charles Bo