Madu Yesu Karai Kasang a lam hkaw tsun ai shaloi, ma kaji ni hte sagu kasha ni a lam hpe ga shadawn da tsun ai gaw, hpa majaw ta ngu ai hpe anhte ni sumru yu ga ai kun? Shi a hkum shi pyi Karai Kasang a sagu kasha ngu tsun da nga ai. Shawng ningnan e, ma kaji ni a mabyin lam ni hpe yu yu ga nga yang, ma ni gaw shanhte ra ai, byin mayu ai lam ni lu la na matu, kanu kawa ni kaw grai kam hpa ma ai. Bai kanu kawa a lahpyen kaw nna shalet kau hkrum ai ma ni gaw, shim lum lam n nga mat ai ngu hkam sha ma ai.

Anhte sak hkrung ai lam gaw lachyum n nga mat sai, ngu hkam la chye ma ai. Dai zawn sagu kasha ni mung madu rai nga ai sagu rem wa kaw shingbyi ai, kam hpa ai myit ni law la nga ai. Dai majaw sat na matu jin jin rai nga ai sagu kasha pyi, shi si na kaw na lawt lu na matu n shakut ai zawn, shi a madu gaw pawt marawn nna gawt shapraw kau tim pyi, sadi nga nga hte sagu rem wa madu a makau kaw sha gayin nga chye ai. Dai zawn re ai kyang lai len ni hte myit jasat ni gaw, Karai Kasang a man e kaba la ai mai kaja lam ni rai nga ai. Daini Karai Kasang gaw, ma kaji ni hte sagu kasha ni zawn hpraw tsawm ai masin salum hte tsawra matsan dum chye ai myit ni tup hkrak kam sham kam hpa nga na matu anhte yawng hpe saw shaga nga ai.