Num sha ni hta nang gaw nachying shaman chyeju lu lit dai law. Na a hkritung na ma mung shaman chyeju lu nga ndai law. Ya kaw nna masha yawng gaw nang hpe A lu ai jan ngu shamying na mara ai. Madu Yesu a Kanu re ai majaw, Karai Kasang gaw shi hpe hkum hkrang hten za ai lam si hkrung si htang ai hpe n hkrum shangun nna, htani htana ngwi pyaw ai hpe hkam sha lu na matu, Maria a hkum hkrang hte Wenyi hpe Sumsing mungdan de woi shalun la hkrum ai re.

Maria a madat mara hkap la chye ai myit jasat a majaw, Karai Kasang gaw kaba dik ai lam shi hte shi kaw nna alak mi hku jaw ya sai. Ya daini Maria gaw, Shi a kasha awng dang lu ai si hkrung si htan lam hpe tawt lai lu nna sumsing mungdan kaw du nga sai re. Maria sumsing mungdan de woi shalung la ai poi gaw, anhte a matu myit mada lam, Maria gaw anhte a matu kasi kaja, anhte a kanu anhte a matu htinglu htinglai kyu hpyi ya ai majaw, anhte ni yak hkak jam jau ai hkrun lam matut hkawm nga tim, Maria zawn Karai Kasang a myit ra ai hte maren byin wa u ga YES, Mai Sa ngu hkap la nna, tinang a udang hpai let sumsing mungdan du hkra hkawm sa ga law. Chyeju hte hpring ai Nu Maria anhte a matu akyu hpyi ya rit law. Amen.