Daini na anhte a akyu hpyi myit sumru ai lam hta, Madu Karai Kasang kaja wa shanu nga ai hpe tatut hkam sha lu myit ga law! Daini anhte jawm sumru akyu hpyi na ga-baw gaw: Karai Kasang, Shi a Hpung Shingkang hte Kaja Wa Nga Nga Ai ngu ai re.

Karai Kasang shanu nga ai lam gaw kaja wa rai nna, tsawra ai hte hpring ai, tsep kawp galai shai mat wa shangun ai atsam rawng nga ai.  Machyi hkrum ai hpe shamai shatsai ya ai.  Mat mat sai hpe bai mu tam la nna jaw ai shara de bai woi wa ai.  Hkyi ba hkrum ai ni hpe ban sa jaw ai, nsin sin ai shara de nhtoi hpe la sa ya ai, salum wenyi a hkraw-hkun dik ai shara de Karai Kasang a tsawra matsan dum lama ai marang hpe htu hkrat shangun ai. 

Chyum Mungga:

Shakawn Kungdawn Daw kaba Latsa-e- sumshi-jahku, daw kaji sanit hte matsat (Shakawn 139:7,8) hpe madat yu ga:

“Na a Wenyi kaw nna ngai gara de sa na rai ta?  Na a man kaw nna ngai gara de hprawng na rai ta?  Ngai sumsing lamu de lung tim, dai shara hta Nang nga ndai!  Si ai ni a ga de ngai yu sa tim, dai yang e Nang nga nga ndai!”

Daini na aten hta, Hkristan ni law law wa, Karai Kasang kaja wa nga nga ai hpe tatut, matut manoi n hkrum yu, n hkam sha ma ai gaw grai myit tsang hpa rai nga ai.  Chyum Laika hta gaw – Karai Kasang, shi a hpung shingkang atsam hte hkrung nga ai majaw, masha law law a prat galai shai mat wa ai, mungkan pinra labau ni galai shai mat wa ai lam sakse law law hpe anhte mu hti lu ga ai.

Moshe hte shi a Akyu hpyi ginsum prat kaw nna Yesu a Kasa ni a prat Pentecoste de du hkra, Karai Kasang shi a amyusha ni hpe mauhpa lamik kumla law law, amyu myu madun dan nna, galai shai mat wa shangun sai.   Madu Yesu mung, sumsing mungdan kaw sha n rai, ndai dinghta ga ntsa e naw nga ai aten kaw nna, anhte Karai Kasang hte rau matut mahkai kanawn mazum nga lu hkra si hkam ya sai.

Karai Kasang hte matut manoi, man man matut mahkai, kanawn mazum nga ai lam hpe Ga Shaka Dingsa the Ningnan – lahkawng yen hta – san pra ai masha ni law law kasi madun lai wa masai. Karai Kasang gaw, nang hte hku hkau kanawn mazum ai hpe bai shagrin la mayu ai majaw, shi kaja wa shanu nga ai lam, nang hpe shadum madun ya nga ai.  Yesu si hkam ai a marang e, hpa lam rai tim, nang hpe shi kaw nna n jahka kau lu ai.

Karai Kasang nang hte ni htep nga ai ngu ai teng man ai lam hpe na a myit masin salum ma hkra hte hkap la u; Karai Kasang nang hte hkrum nna, na a prat hpe galai shai ya na hpe kam sham u. 

Chyum Laika na kasi ni hpe jawm yu ga:

Shakawn Kungdawn Daw kaba Latsa-e- sumshi-jahku, daw kaji sanit hte matsat (Shakawn 139:7,8): hta

“Na a Wenyi kaw nna ngai gara de sa na rai ta?  Na a man kaw nna ngai gara de hprawng na rai ta?  Ngai sumsing lamu de lung tim, dai shara hta Nang nga ndai!  Si ai ni a buga de ngai yu sa tim, dai yang e Nang nga nga ndai!”

Kasa Laika, Daw kaba Shi-sanit, daw kaji, hkun-kru kaw nna hkun-matsat (Kasa 17:26-28) hta tsun ai gaw:

Karai Kasang gaw, ahkying aten ladaw ni hte shanhte a jarit shara ni hpe masat da ngut jang, lamu ga man shagu de pra sa wa na matu, masha marai langai mi kaw nna masha amyu, mungdan shagu hpe shabyin da nu ai.  Shanhte gaw shanhte a Hpan Madu hpe tam ra ai, shi hpang de sit sa ra ai hpe hkam sha na rai ma ai. 

Teng sha nga yang, shi gaw, anhte marai shagu hte n tsan nga ai.  Kaning rai nme nga yang, ‘Shi hta anhte hkrung nga nna shamu shamawt nga ga ai, shi a marang e anhte byin tai nga ga ai’; nanhte a nchyin sara ni tsun ai hte maren, “Anhte gaw shi a kashu kasha ni rai nga ga ai’.

Karai Kasang gaw “omnipresent” ngu ai – shara shagu hta nga nga ai, shi kaja wa nga nga ai hpe mung, anhte mu chye lu ga ai.   Dawi hkawhkam mung tsun ai: “Na a man e, hpring tsup ai kabu gara lam nga nga ai; na a hkra maga e ngamu ngamai ai gaw htani htana rai nga ai” (Shakawn 16:11).  

Chyum Laika ni hta yu dat ai shaloi, Karai kasang nga ai lam gaw kaja wa re ai, kaja ai, anhte a matu rai nga ai, ngu ai hpe kam shut na lam n nga ai.  Karai Kasang gaw nang shi hte hkrum, kanawn na matu hpan da sai hpe kam u.  Nang galaw ai lam – kaja ai, n kaja ai amu ni a majaw n re ai sha, shi a chyeju san san gawp e sha, shi hte hkrum lu ai rai nga ai.  Raitim, Karai Kasang gaw shi nga nga ai lam hpe nang kaw atik anang gaw n madun dan na re. 

Magap hpaw nna hkap la ai shara hpe she, shi jahpring ya ai.  Shi jaw mayu ai hpe hkam la na matu, na a prat hta shara jaw ya na matu, nang hpe ngwi pyaw si mani ai nsen hte shi shaga ai.

Karai Kasang a shanu nga ai lam hpe sawk tam ai hta grau kaja ai sak hkrung lam n nga sai. Shi Madu hta bansa la ai hta aten shama ai gaw, Yesu Madu hku nna nang hpe jaw ya ai nga-mu nga-mai lam a matu npawt gaw hpang ai rai nga ai. 

Karai Kasang hte hkrum na matu shakut ai hta Na a lit gaw, shi hpe tam ai lam rai nga ai.  Shi hpe hkrum na matu aten jaw ai shaloi, na a salum chyinghka hpe mung hpaw da u, shi a mungga hta kam sham u, shaloi, kabu gara, tsawra ai, asak a hka-hpawk hpe nang mu la na ndai.  Karai Kasang shanu nga ai lam a kumla rai nga ai galai shai ai lam hpe mung, nang hkam sha na ndai. 

Tara Jahprang Laika, Daw Kaba mali, daw kaji hkun-jahku (Tara Jahprang 4:29) hta tsun da ai:

“Na a Madu Kara Kasang hpe nang tam nna, nang shi hpe mu lu na ndai.  Na a myit masin salum wenyi mahkra hte, nang shi hpe tam ai rai yang, nang shi hpe mu na ndai”.  

Dai majaw, shi a mungga hpe nang sumru let akyu hpyi nga yang, Ahkrung nga ai Karai Kasang a shanu nga ai lam hpe tam u.

Akyu Hpyi Sumru Yu Ga:

1. Karai Kasang shanu nga ai lam hpe myit sumru yu u.  Na la ai Karai Kasang a Mungga hpe htan nna, na a kam sham ai hpe jasu ya shangun u.

Shakawn Kungdawn daw Kaba Latsa e mali-shi-manga, daw kaji, shi-matsat hta:

“Madu gaw, shi hpe shaga ai ni hte ani-sha nga nga ai, teng man ai lam hta shi hpe shaga ai ni hte ani-sha nga nga ai” nga nna tsun da ai.  

• Ya, Karai Kasang a shanu nga ai lam a mai kaja ai hpe sumru yu u.  Asak hkrung ai Karai Kasang hte hkrum katut ai, nang hti hkrup ai mauhpa lam ni gaw na a ra sharawng ai myit hpe mung jasu ya u ga. 

Shakawn Kungdawn, Daw Kaba shi-kru, daw kaji, shi-langai (Shakawn 16:11) hta tsun da ai hpe sumru yu u:

“Asak de woi sa ai lam nang ngai hpe madun nit dai; Na a man e, hpring tsup ai kabu gara lam nga nga ai; na a hkra maga e ngamu ngamai ai gaw htani htana rai nga ai”.  

• Shi a shanu nga ai hpe tau la na matu na a salum hpe hpaw ya u.  Karai Kasang a ni htep nga ai lam hpe madun dan na matu Chyoi Pra ai Wenyi kaw hpyi u.  Nang shi hpe tam ai shaloi shi hpe mu lu na matu, shi hpe tam nna shi a ga hpe mung kam u.

Tara Jahprang Laika, Daw Kaba mali, daw kaji hkun-jahku (Tara Jahprang 4:29) hta tsun da ai hpe sumru yu u:

“Na a Madu Kara Kasang hpe nang tam nna, nang shi hpe mu lu na ndai.  Na a myit masin salum wenyi mahkra hte nang shi hpe tam ai rai yang, nang shi hpe mu na ndai”.

Hpang Jahtum Hpumdim Dat Ga:

Na a Madu Karai Kasang a hkyik-hkam galu kaba ai hpung shingkang hpe nang tam mu lu u ga.  Kawa Karai a man e aten man man nga ai kasha nang tai u ga. 

Na a Hkristan prat gaw, Karai Kasang a shingkang shingwang hte hpring nga nna, atsam rawng ai prat tai nga u ga. Dai Madu Karai Kasang hpe matut manoi sharawng awng ai myit hte tam nga nna, shi hte rau galu kaba ai prat de galai shai wa u ga.

Yawng hpe Karai Wa shaman ya u ga!

By Cardinal Charles Bo