Daini, anhte a salum ni hpe hpaw let, Chyoi Pra ai Wenyi a jasan jaseng ya ai hpe hkam la ai shaloi, shi n-gun jaw ai hpe hkam la nga ga.
Ya, anhte jawm sumru akyu hpyi na Ga-baw gaw: Chyoi Pra ai Wenyi hta Jasan Jaseng ai Hpe Hkam La ai ngu ai rai nga ai.
Hpunau ni e, anhte gaw, Karai Kasang a nsam hte shabung nna hpan da ai hkrum saga ai: Dai majaw, Karai Kasang gaw, anhte shi hte bung nga lu hkra, shani shagu, aten shagu, anhte hta bungli galaw nga ai.
Chyoi Pra ai Wenyi gaw, anhte hpe myit jahtoi ya ai, gram sharai, sharin shaga ya ai lam hta grai ningtawn nga ai. Shinggyim masha gaw, nnan kaw nna – shuthpyit mara, gaya gahpa, mungkan a hkiba lit li ai lam ni kaw na lawt na matu hpan da hkrum ai re. Ndai lam ni hpe anhte kaw na tsan kau ya na matu Karai Kasang hpe ahkaw ahkang jaw ai rai yang, anhte a myit masin wenyi hta ngwi pyaw simsa ai chyeju hpe hkam la na ga ai.
Chyum Mungga:
Petru a Shagun Laika Langai, Daw kaba Langai, Daw kaji Lahkawng (1Pt 1:2) hta : “Kawa Karai Kasang e tau nau chye tawn ai, Chyoi Pra ai Wenyi a jasan jaseng ya ai, Yesu Hkristu hta kam sham ai hte shi a Sai hte lapri bun hkrum ai a marang e: chyeju hte simsa ai gaw nanhte hta shalaw jahtam ya u ga law” nga nna shaman ya ai.
“Jasan jaseng ai” ngu ai ga-si hpe anhte a myi hta wan zawn kahtet ai, shakut shaja ra ai, machyi hkrum ai, hkyi ba ai ngu ai lam ni hpe myit shingran na re. Karai Kasang a kasha ni tai hkra, anhte a shut hpyit mara ni hpe dum nna dai mara ni hpe gara hku shatsai kau lu na kun ngu nna myit na re.
“San seng ai” ngu ai ga hpe Nawku Hpung makam masham hta grai lang ga ai rai tim, chye madat shut nga ga ai. Malawng maga gaw, Jasan Jaseng hkrum ai ngu ai hpe, san seng chyoi pra wa hkra shakut ai lamang, mahkrun langai hku chye madat nga ma ai. Kaja wa nga yang, jasan jaseng hkrum ai ngu ai gaw Karai Kasang a chyeju rai nga ai.
1 Petru 1 hta dai lam hte seng nna galu galang tsun da nga ai.
“Yesu Hkristu a Kasa, Petru,
Puntu, Galati, Kapadosia, Asha hte Bitania hkan bra nga ai, Karai Kasang e lata la hkrum ai hpu, nau ni e,
Kawa Karai Kasang e tau nau chye da hkrum ai, Chyoi Pra ai Wenyi e jasan jaseng ya hkrum ai, Yesu Hkristu hta kam sham nna, Shi Madu a Sai hte lapri bun hkrum ai a marang e: chyeju hte simsa ai gaw nanhte hta law htam wa u ga law.
Anhte a Madu Yesu Hkristu a Karai Kasang hte Kawa kaw, hpung shingkang shakawn kungdawn anga nga u ga!
Shi a kaba la ai matsan dum lama ai hta, Yesu Hkristu a si ai kaw nna bai hkrung rawt ai a marang e, asak hkrung ai myit mada lam de anhte hpe bai shangai ya mani ai. Dai gaw, n hten za lu ai, awu asin n rai lu ai, n wai mat ai, sumsing mungdan hta nanhte a matu san da ya ai Sali wunli rai nga ai.
Dai hpe hpang jahtum na nhtoi hta shapraw dan na matu, makam masham hku nna hkye hkrang la hkrum na, ngu ai myit mada lam hpe Karai Kasang a hpung shingkang makawp maga da ya nga ai.
Aten kadun mi a laman, hten mat chye ai Ja hpe wan hte chyam yu ai zawn nanhte a jet ai makam masham hpe chyam dinglik na matu, ru yak jamjau ai lam amyu myu a majaw nanhte yawn hkyen hkrum ra ai rai tim, nanhte kabu gara nga myit dai.
Yesu Hkristu dan pru ai shaloi, nanhte a kam sham ai gaw – shagrau shaa, hpung shingkang, shakawn kungdawn ai hkrum na myit dai.
Nanhte Madu hpe n mu yu tim, shi hpe tsawra myit dai. Nanhte shi hpe n mu yu ai rai tim, shi hta kam sham nna – hpung shingkang hte hpring ai, nanhte a makam masham kaw na pru wa ai, n chye tsun shapraw dan ai kabu gara ai, wenyi a hkye hkrang la hkrum ai hte kabu nga myit dai” (1Petru 1:1-9).
Shawng nnan e, San seng chyoi pra ai ngu ai gaw “Wenyi” hta rai nga ai. Anhte a n-gun atsam hte shakut nna lu la ai n rai, Karai Kasang anhte hta bungli galaw ai, shi a chyeju a marang e byin tai wa ai rai nga ai.
Bai, Dinghpring ai ngu ai gaw, Hkristu a sak hkrung ai, si hkam ai hte bai hkrung rawt ai lam a asi she rai nga hpe chyum mungga madi madun ya ai.
Langai Korihtu, Daw kaba Kru, daw kaji shi-langai (1Korinhtu 6:11) hta Pawlu tsun ai:
“Nanhte gaw, Madu Yesu Hkristu a Mying ningsang hte Karai Kasang a Wenyi hta kashin ya hkrum ai, shachyoi shapra ya hkrum ai, shading jahpring ya hkrum manit dai”.
Anhte a hkum shan hta gaw san seng ai ngu ai n nga; raitim, Chyoi Pra ai Wenyi hku nna gaw, ding hpring, chyoi pra san seng ai lam hpe dam lada sung htum ai hku hkam la lu ga ai.
Madu Yesu hta anhte jasan jaseng hkrum nna, Chyoi Pra ai Wenyi woi len ya nna – dinghpring ai, kamsham ai lam hta shakut shaja, kung kaba wa ga ai.
Bai, Jasang jaseng hkrum ai ngu ai gaw loi yak ai mahkrun langai re ngu ai hpe shaleng da ai. Anhte a shut hpyit mara ni hpe koi yen na ngu ai mung, loi ai bungli n rai nga ai. Raitim, dai mahkrun gaw matsan dum lama ai Karai Kasang a bungli ni rai nga ai majaw, jahtum e, anhte hpe kabu gara ai lam jaw ya nga ai (1 Pt 1:8).
Hpunau ni e, anhte chyoi pra san seng ai, dinghpring ai hte Karai Kasang hpe hkrit hkungga ai lam ni hpe tam ga ai rai yang, Chyoi Pra ai Wenyi hte kanawn mazaum ai lam hpe shawng tam ra ga ai.
Na a nsin sin nga ai salum hta Karai Kasang a tsaw ra lanu lahku ai, atsam rawng ai, shi a lata hte ahtawk hkra ya na matu ahkang jaw u. Mungkan ga na lam ni a majaw nang hkam sha nga ai wunma ni, machyi hkrum ai lam ni hpe shamai shatsai ya na matu ahkang jaw u.
Anhte a san seng chyoi pra ai lam gaw Karai Kasang a chyeju hte matsan dum ai lam rai nga ai. Dai majaw asim sha nga nna shut hpyit mara hte yawn hkyen ai lam sha nga ai na a prat hta, kabu awlaw ai hte jahpring ya rit ngu nna akyu hpyi u.
Akyu Hpyi Ga:
- Karai Wa gaw, shi a chyeju, tsawra, matsan dum lama ai lam ni hpe nang hta shapraw ya mayu nga ai ngu ai hpe sumru u.
“Kawa Karai Kasang e tau nau chye tawn ai, Chyoi Pra ai Wenyi a jasan jaseng ya ai, Yesu Hkristu hta kam sham ai hte shi a Sai hte lapri bun hkrum ai a marang e: chyeju hte simsa ai gaw nanhte hta law htam wa u ga law” (1Pet 1:2).
- Na a sak hkrung prat hpe Chyoi Pra ai Wenyi hpe hpaw madun u. Karai Kasang hpe hkrit hkungga ai hte san seng chyoi pra ai lam ni kaw na makoi magap da ai daw ni hpe shapraw dan lu na matu akyu hpyi u. Shi Madu hpe tawngban nna mara dat ya ai hpe hkam la u.
“Tinang a shut hpyit mara hpe makoi magap da ai wa gaw galu kaba na n rai; tinang a shut hpyit mara ni a matu hpyi nem tawngban nna dai lam ni hpe kau da ai wa gaw matsan dum la ai hpe hkrum na ra ai ” (Ga Shagawp 28:13).
- Chyoi Pra ai Wenyi nang hpe shamai shatsai ya na matu hpyi u. Nang machyi hkrum nga ai aten hta shi kanang e nga ai hpe san yu u. Hpyen wa e nang hpe masu tsun ai lam ni hpe mung madun shangun u.
“Anhte tinang a mara ni hpe kau da nna, dinghpring ai hte asak hkrung lu na matu, Shi anhte a mara ni hpe shi a hkum hta wudang ntsa e gun la kau ya sai. Shi a wunma ni a marang e anhte shamai shatsai ya ai hkrum saga ai” (1Pet 2:24).
Hpungdim Dat na matu:
Anhte ya, akyu hpyi shangut wa ai hte rau, Karai Kasang a mara dat ya ai hte shamai shatsai ya ai hku nna lu la ai kabu gara, lawt lu ai chyeju hpe hkam la lu u ga. Karai Kasang kaw na anhte hkam la lu ai kumhtaw gaw: tsaw ra ai, simsa ai, kabu gara ai rai nga ai. Shut hpyit mara a lit kaw na anhte hpe hkye la na matu Madu Yesu si hkam sai. Nang hta ashanu nga ai Chyoi Pra ai Wenyi a marang e, Karai Kasang a chyoi pra ai masat dazik hpe nang hkam la nna Shi a kasha tai nga sanu ga law.
By Cardinal Charles Bo
