PRAN WAN LADAW LABAN (22), C SHANING
(22nd Ordinary Sunday, Year C)
| Masha ni a man hta ningbaw ningla tai mayu ai rai yang tinang hkum hpe hpang e tawn nna kaga masha ni hpe shawng shara jaw u. India mungdan na sasana sara kaba William Carey gaw, ga hpaji hta kungkyang ai hte hpun kawa hpaji hta awng dang ai raitim, grai shagrit shanem ai wa rai nga ai. Shi gaw Chyum Laika hpe India ga hpan law law hku nna ga gale ya lai wa ai. Calcutta mare na hpaji ninghkring ni hte arawng aya kaba lu ai ni gaw shi hpe chye na ya ma ai. Kalang mi hta India mungdan a Governor-General wa shi hpe daw sha poi de sa lawm na matu saw shaga lai wa ai. Du sa ai masha kaba ni gaw sha ku grup yin kaw dung nga ai shaloi, saw shaga hkrum ai hta na masha langai mi gaw ndai wa gaw moi na hpinap chywi ai Carey wa nrai kun ngu tsun lai wa ai. Carey gaw dai ga hpe na nna, dai ga san san ai wa hpang de kayin nna, shagrit shanem ai myit hte, “N rai nngai Salang wa e, ngai gaw hpinap byeng ai wa sha re,” ngu nna tsun bai lai ai. Yesu gaw shana shat sha na matu saw shaga ai shaloi, manam daw ai wa gaw Hparishe rai tim, kang hta ai wa rai tim, jinghku rai tim, hpyen wa rai tim, galoi mung n nyet lai wa ai. Ndai bat na Kabu Gara Shiga hta, Laban nhtoi langai mi hta, Hparishe langai Shi hpe shat sha na matu saw shaga lai wa ai. Hparishe wa gaw kaga manang ni hte rau Shi hpe hkalem hkalau na lam galaw lai wa ai. Shanhte gaw Laban Nhtoi hta manggang kap ai masha langai hpe Shi shamai ya na kun ngu ai hpe maram yu ma ai. Yesu gaw dai masha hpe shamai ya nna, Laban Nhtoi hkring sa ai aten hpe kaga masha ni hpe kaja ai hku galaw na n jahkring kau ai hku nna grau sung hkra galaw lu ai lam hpe madun dan lai wa ai. Machyi masha hpe shamai ya ngut ai hpang, Hparishe wa saw shaga da ai manam ni gaw, arawng lu dik ai shara ni hpe lu na matu shingjawng nga ai hpe shi mu hkrup ai. Dai hpang, sha ku kaw sha n-ga, prat tup hta shagrit shanem ai lam hpe hkaw tsun dan lai wa ai.Chyum mungga daw langai sirach a laika hta**Shagrit shanem ai** hte **Kanu Kawa ni hpe hkungga lara ai** a madung lam hpe madi madun da nga ai. 1. **Kanu Kawa hpe hkungga lara ai a manu** (17-18, 20) – Kawa asak kaba nna n-gun kya wa ai hte n-gun yawm wa ai ten hta myit galu kaba ai hte lanu lahku ai lam gaw Karai Kasang a matsun ga rai nga ai. Dai zawn lanu lahku ai wa hpe “yubak mara ni hpe magap kau ya na” ngu ai ga sadi nga ai(20). Ndai lam gaw kanu kawa ni hpe tsawra ai hku nna Karai Kasang a matsan dum lama ai lam hpe saw shaga ai lam mung rai nga ai. 2. **Shagrit shanem ai a awng padang** (28-29) – Gumrawng gumtawng ai wa gaw tsin-yam hkrum na, shagrit shanem ai wa chyawm gaw Karai Kasang hte masha a man e shagrau hkrum na rai nga nga nna mung shadum da ya ai. Chyum ninghkring majing gaw tinang a hpaji hpe n shakawng ai sha, kaga masha ni hpe matsan dum myit hte sharin achyin ya chye ai (29). Ndai gaw shagrit shanem ai myit a teng man ai gawgap ai lam rai nga ai shadum ya ai. Tatut hkan sa ra ai lam- Kanu kawa ni asak kaba wa ai hte maren shanhte a n jin nngut ai lam ni hpe hkam sharang let bau maka ai hku nna Karai Kasang a shaman chyeju hpe hkam la nga ga. – Tinang chye da ai machye machyang hte awng dang ai lam ni hpe arawng la ai hku n galaw ai sha, shagrit shanem hte kaga masha ni hpe garum shingtau ai lam hta jai lang na ahkyak ai- Shagrit shanem ai ngu ai gaw gawngkya ai lam n re ai hpe dum nga ga. Kam sham ai kumla rai nga ai. “Karai Kasang gaw gumrawng gumtawng ai ni hpe shamyit kau nna, myit nem ai ni hpe chyeju jaw mu ai” (Yaku 4:6). Chyum mungga daw lahkawng Hebrew laika hta sumsing lamu na Yerusalem mare a tsawm htap ai lam hpe tsun da nga ai. Yesu hku nna karai kasang hpang de nden marai hte sit sa wa u. Karai Kasang gaw nang ngai hpe hkrit hpa wa hku n re ai sha tsawra ai wa hku hkap la nga ai. Sumsing lamu a mungdan hpe myit maju jung nga ga. Mungkan ga a ru yak tsin-yam tsindam ni gaw chyahkring mi sha rai tim, Karai Kasang a ga sadi ni gaw htani htana grin nga ai nga nna shadum ya nga ai. Kam sham ai ni gaw ndai mungkan hta tsin-yam tsindam hpe hkrum na rai tim, jahtum e shaman chyeju hkam la lu ai hte Karai Kasang a mungdan de shang lu na re ngu hpe e tsun da nga ai.Tsawra ai nu wa hpu nau ni Ndai bat na lk a kabu gara shiga hta Yesu Hkristu gaw Hparishe langai a daw sha poi nta de manam hku nna saw shaga hkrum ai, dai shara hta byin ai mabyin ni hpe sakse hkam ya ai lam rai nga ai. Ndai mabyin gaw shinggyim shingra tara hte Karai Kasang a mungdan lam hte seng ai ningmu lapran na grai shai hkat ai lam hpe madi madun ya nga ai. Yesu a sharin shaga ai lam ni hpe myit masin hta bang da nga ga. 1. Tinang hkum tinang shagrau sha-a ai lam hpe koi gam na matu rai nga ai (Luka 14:7-11). Shinggyim shingra tara masa hta: Sha ku kaw dung ai manam ni gaw, shanhte a ahkyak ai lam hte arawng aya hpe hkam la na lam hpe madung tawn ai, kaja dik ai shara ni hpe tam taw nga ai hpe Yesu muda lai wa ai. Dai zawn kyang lailen gaw anhte shinggyim myit masin hta sung sung Jung noi nga chye ai, tinang hkum hpe manu shadan ai, arawng aya hpe ra ai, mying kaba na hpe ra sharawng ai lam ni hpe madun dan nga ai. Anhte gaw jahkring hkring kaga masha ni a man hta, anhte a shinggyim nga pra lam hta, arawng aya lu ai hte manu dan ai lam hpe tam chye nga ga ai. Yesu a hpaji nyan : Yesu gaw loi ai ga shadawn langai hte sharin ya ai. Teng man ai htuk manu ai shara (npu na shara) hpe lata la u. Poi madu madu wa sa nna nang hpe “Ndai de lung wa u” ngu nna shaga ai shaloi, nang gaw sari sadang hte rai lu na re. Raitim, nang gaw tsaw ai shara hpe kalang lata shara la nna nga ai shaloi, “Ndai de yu wa u” ngu tsun yang, kaya kahpa hkrum na re ngu nna shadum tsun da nga ai. Ndai bat na kabu gara shiga gaw Madung sharin achyin ai lam hta e: “Tinang hkum hpe shagrau ai wa gaw, grit nem ai hkrum na ra ai, tinang hkum hpe shagrit ai wa gaw, shagrau ai hkrum na ra ai” (V. 11). Dai gaw Karai Kasang a Mungdan a npawt tara mung rai nga ai. Karai Kasang a man e shagrit shanem ai lam gaw jet ai mai kaja ai lam rai nga ai. Ndai shagrit shanem ai lam gaw gawng kya ai lam n re ai sha, tinang a tengman ai shara hpe chye na nna, Karai Kasang hte kaga masha ni a man hta tinang hkum hpe shara kaja hta tawn da ai lam rai nga ai. Tinang hkum hpe shatsaw na matu shakut ai hta Karai Kasang nang hpe shatsaw ya na hpe kam hpa shangun ai lam rai nga ai. 2. Hpa mung bai htang ai lam hpe n myit mada ai sha manam daw chye ra ai lam rai nga ai. Yesu gaw shi hte maren sha, shi hpe bai htang lu ai ni hpe sha saw shaga ai htunghking akyang hpe dawm kau nna, saw shaga ai wa a matu shinggyim nga pra masa hta akyu lu la na matu yaw shada let sharin ya nga ai. Ndai gaw myit mada da ai shada da akyu hkam sha lu na matu yaw shada let, shinggyim wuhpawng hta arang bang ai zawn rai nga ai. Yesu gaw nhtan shai ai hku matsun da nga ai. “Matsan mayan ni, n-gun kya ai ni, lagaw hten ai ni, myi kyaw ai ni hpe” saw shaga u (V. 13). Ndai masha ni gaw na a saw shaga ai lam hpe bai htang na matu atsam n nga ai. Shanhte hpe saw shaga ai gaw, shinggyim nga pra masa hte sut masa lam hta akyu n jaw na re. Ngu nna tsun da nga ai. Raitim Yesu a sharin achyin ai lam ni hta, Karai Kasang a tsawra myit nga ai hte maren, bai htang jaw na n myit mada ai sha jaw ai madung tara hpe madi madun ya nga ai.Karai Kasang gaw anhte hpe anhte a tsawra myit hpe bai htang ya lu ai atsam n nga ai ten kaw na anhte hpe tsawra ai. Dai hte maren, anhte mung bai htang n lu ai ni hpe tsawra myit hte garum madi shadaw ya ai shaloi, Karai Kasang a tsawra myit hpe shadan shadawng ai lam re hpe shadum ya ai. Yesu gaw, “dai zawn re ai masha ni hpe nanhte hkap hkalum la nna hkap tau la myit yang gaw, nanhte a lu myit dai” ngu nna ga sadi jaw da nga ai (V. 14). Hpa majaw Shanhte n htang jaw na n lu ai majaw, Karai Kasang shi nan nang hpe “dinghpring ai ni bai hkrung rawt wa ai shaloi” na a shabrai jaw na ra ai. Ndai gaw kam sham ai myit hte galaw ai a shabrai rai nna, Karai Kasang a matsan dum lama ai hta mahta nna lu la ai shabrai rai nga ai.Dai majaw tsawra ai hpu nau ni eTinang hkum tinang sharawt na matu n shakut ai sha, anhte a prat hta – dinghku, bungli, nawku hpung, wuhpung wuhpawng shagu hta shagrit shanem ai myit hte galaw sa wa na matu Yesu sharin ya nga ai. Tinang hkum hpe kam hpa na htan Karai Kasang hpe kam hpa nga ga. Karai Kasang a man e na a shara hpe chye nna, Shi a matsan dum lama ai hpe kam hpa ai kaw na na a manu dan ai lam pru wa na re.Tsawra myit hpe Karai Kasang a Mungdan hta dut mari sha ai lam n galaw ai. Anhte a tsawra myit hte gam jaw gam ya ai lam gaw grau nna bai htang n lu ai ni, shinggyim wuhpawng kaw na shapraw kau hkrum ai ni, tsin-yam tsindam hkrum nga ai ni hpe madung dat ra ai lam rai nga ai. Ndai lam gaw Yesu shi nan hkawm sa wa ai hte hkan sa na matu saw shaga nga ai lam rai nga ai. Shagrit shanem ai hte shada da matsan dum hkat ai a marang e, anhte gaw ndai mungkan ga a matu Karai Kasang a Mungdan hpe madun dan ai lam rai nga ga ai. Dai mungdan hta, hpang jahtum na ni gaw shawng nna, shawng na ni gaw hpang jahtum rai nga ai. Dai mungdan hta e bai nhtang na n myit mada ai sha tsawra myit jaw ya nga ai.Ndai sha ku de saw shaga hkrum ai Yesu a sharin shaga ai lam ni gaw, dai ni na ten anhte a matu grai ahkyak ai mungga rai nga ai. Tinang hkum hpe shagrit shanem ai hte chye na hkawn hkrang ai lam hpe galoi mung shamawn nga ra ai. Ndai zawn galaw ai lam ni gaw Karai Kasang a mungdan hpe hkap tau la nna, Yesu Hkristu a lagaw lahkam hpe teng sha hkan nang nga ai lam rai nga ai. Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai. Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw pranwan ladaw hta. ..hkunlahkawng … ngu na lanban rai nga ai hti ang ai ja chyum mungga ni gaw chyum mungga daw langai ..Langai ngu na. Serach laika 3: 17-18,20,28-29 chyum mungga daw lahkawng hebre hpung masha ni hpang de san paulu shagun dat ai laika 12: 18-19, 22-24 kabu gara shiga Lk 14: 1,7-14 Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law CHYUM MUNGGA DAW NI:- Sirak 3:19-21, 30-31 …… Kawa gaw kasha hpe shadum jahprang ai hta, tinang a hkum hpe shagrit shanem nga u, shaloi Madu a man e sharawng awng ai lu la na rin dai. Hebre 12:18-19, 22-24 ….. Nanhte chyawm gaw, Ziun bum hte, ahkrung nga ai Karai Kasang a mare ngu ai, sumsing lamu na Yerusalem mare de du manit dai. Luka 14:1, 7-14 …… Nang poi galaw daw yang gaw, matsan mayan ni, jahten labye ni, lagaw hten ai ni hte myi kyaw ai ni hpe shaga u. |