Hpan Da Hkrum Ai Mungkan Ga a Matu Kyu Hpyi Ai Masat Nhtoi Galaw (World Day Of Prayer For Creation )
Hpan Da Hkrum Ai Mungkan Ga a Matu Kyu Hpyi Ai Masat (World Day Of Prayer For Creation ) nhtoi hku nna September 1,2025 ya shani Myitkyina San Columban Cathedral hta Misa hkungga akyu hpyi ai lam galaw la lu sai.
Hpan Da Hkrum Ai Mungkan Ga a Matu Kyu Hpyi Ai Masat (World Day Of Prayer For Creation ) nhtoi akyu hpyi Misa hkungga hta Myitkyina Saradaw Sasana a Chancellor Wa Jau Bosco Nlam Hkun Seng, Justic and Peace lit hkam Wa Jau Vincent Zinwa Shan Lum, Wa Jau Paul Kinsa Tu Awng, Wa Jau Paul Zau Sham hte Wa Jau ni marai (10),Sasana kata na magam dap shagu hta magam gun nga ai magam gun ni shanglawm lai wa sai.
Hpan Da Hkrum Ai Mungkan Ga a Matu Kyu Hpyi Ai Masat Nhtoi hta Justice and Peace lit hkam Wa Jau Vincent Shan Lum kaw nna mungga hkaw tsun ai hta Karai Kasang Hpan da hkrum ai mungkan ga hpe makawp maga na lit shatsam da hkrum ai anhte shinggyim masha ni nan Karai Kasang hpan da ai mungkan hpe shahten shaza ai ni nan rai nga ga ai nga nna tsun shadum n gun jaw lai wa sai.
Daini na nhtoi gaw mungkan ntsa hta Karai Kasang hpan da mada gaw shinggyim masha ni hpe Karai Kasang jaw ya ai chyeju kumhpa rai nga ai lam hpe myit dum na matu hte Karai Kasang hpan da ai ndai mungkan hpe makawp maga na lit kaba mungkan masha ni hta nga nga ai lam hpe shadum ya na matu n nga mat wa sai Wa Sarabyin Francis kaw nna masat da ya a shani rai nga ai.
Mali Hka Wudang
( World Day Of Prayer For Creation )
Ndai Mali Hka Wudang gaw, lai wa sai June Shata, 2025 hta, Mali Hkanu kaba ngut ai hpang, Jinghpaw Wunpawng Mungdaw a dingdung maga de na lwi hkrat wa ai, Mali Nmai Hkahku maga de na tsawt yu wa ai hpun Lahkawng hpe htu shaw la nna, galaw tawn da ai Wudang rai nga ai.
Ndai Mali Hka Wudang gaw, Jinghpaw Mungdaw sha n ga, Myanmar Mungdan kata hta, shinggyim masha ni a namak lawhpa ai myit a majaw, hkashi hkanu ni, hpun kawa bum shagawng ni, ja lungseng nhprang sut rai ni, dusat dumyeng hte ntsa palen pyen hkawm ai U numji ni, du hkra ladaw ni, jahten shaza hkrum let, anhte a lamu ga ginra gaw, hpye, machyi makaw hkrum nga ai lam hpe, shadum ya nga ai Kumla rai nga ai.
Ndai Mali Hka Wudang gaw, Mungdan kata hta byin taw nga ai dinghku majan a majaw jamjau jamhkau let, hkrap ngu hkrap ngoi nga ai amyu sha ni yawn madai nga ai nsen kaba a Kumla mung rai nga ai.
Yesu Hkristu gaw, anhte shinggyim masha ni hkye hkrang la ai hkrum lu na matu, Wudang ntsa hta jen noi si hkrum lai wa sai rai nga ai, Ndai Mali Hka Wudang gaw tsit tsawm la ai anhte a Jinghpaw Wunpawng Buga hte shingra tara yawng hpe makawp maka ya nga u ga.
Anhte shinggyim masha ni yawng mung Wa Sarabyin Francis, Laudato Si ndau shabra laika hta anhte hpe, lam madun sharin shaga nga hte maren, anhte a pyaw la ai Wunpawng buga hte shingra tara ni hpe manu shadan makawp maga sa wa nga ga ngu saw shaga dat lu ga ai.